ഷാർജ: ആറ് മാസത്തിലേറെയായി കണ്ടുകെട്ടിയ വാഹനങ്ങളും മോട്ടോർസൈക്കിളുകളും തിരികെ എടുക്കാത്ത ഉടമകൾക്ക് മുന്നറിയിപ്പുമായി ഷാർജ മുനിസിപ്പാലിറ്റി. വാഹനങ്ങൾ തിരിച്ചെടുക്കാൻ ഉടമസ്ഥർക്ക് നാല് ദിവസത്തെ സാവകാശം അനുവദിച്ചിട്ടുണ്ട്. അതേസമയം, ഇനിയും തിരിച്ചെടുക്കാത്ത വാഹനങ്ങൾ പൊതുലേലത്തിൽ വിൽക്കും. 

ഇന്ന് (2025 സെപ്തംബർ 8) പുറപ്പെടുവിച്ച ഉത്തരവിൽ, മുനിസിപ്പാലിറ്റി യാർഡുകളിൽ സൂക്ഷിച്ചിരിക്കുന്ന കാറുകൾ, മോട്ടോർസൈക്കിളുകൾ, മറ്റ് യന്ത്രസാമഗ്രികൾ എന്നിവയുടെ ഉടമകൾ 2025 സെപ്റ്റംബർ 11-ന് മുമ്പ് ഇൻഡസ്ട്രിയൽ ഏരിയ 5-ലെ ഇൻസ്പെക്ഷൻ ആൻഡ് കൺട്രോൾ വിഭാഗത്തിൽ ഹാജരാകണമെന്ന് നിർദ്ദേശിച്ചിട്ടുണ്ട്. 

ALSO READ: സഊദിയിൽ വ്യാഴാഴ്ച വരെ ശക്തമായ മഴയ്ക്കും, കാറ്റിനും സാധ്യത; താഴ്വരകളിലേക്കും തടാകങ്ങളിലേക്കുമുള്ള യാത്രകൾ ഒഴിവാക്കാൻ നിർദേശം 

കണ്ടുകെട്ടലിന് കാരണമായ പ്രശ്നങ്ങൾ പരിഹരിക്കണമെന്നും, നിശ്ചിത സമയപരിധിക്കുള്ളിൽ വാഹനം വിട്ടുകിട്ടാനുള്ള നടപടികൾ പൂർത്തിയാക്കണമെന്നും അധികൃതർ അറിയിച്ചു. അതേസമയം, “നടപടി സ്വീകരിക്കാത്തപക്ഷം, വാഹനങ്ങൾ ലേലം ചെയ്യേണ്ടിവരും,” അറിയിപ്പിൽ വ്യക്തമാക്കി. 

ഉപേക്ഷിക്കപ്പെട്ട വാഹനങ്ങളും ഉപകരണങ്ങളും നീക്കം ചെയ്യാനുള്ള ഷാർജയുടെ ശ്രമത്തിന്റെ ഭാഗമാണ് ഈ കാമ്പയിൻ. ഈ പ്രശനം പരി​ഗണിക്കാതിരുന്നാൽ സുരക്ഷാ പ്രശ്നങ്ങൾക്കും ദൃശ്യ മലിനീകരണത്തിനും കാരണമാകുമെന്ന് അധികൃതർ പറഞ്ഞു.