ഷാര്‍ജ: ഷാര്‍ജയില്‍ മരിച്ച നിലയില്‍ കണ്ടെത്തിയ വിപഞ്ചികയുടെയും മകള്‍ ഒന്നരവയസ്സുകാരിയായ വൈഭവിയുടെയും കേസ് വഴിത്തിരിവിലേക്ക്. കേസ് അന്വേഷിക്കുന്ന ക്രൈംബ്രാഞ്ച് യുവതിയുടെ ഭര്‍ത്താവ് നിതീഷ് മോഹനെതിരെ ലുക്കൗട്ട് നോട്ടീസ് പുറപ്പെടുവിച്ചു. നിലവില്‍ യുഎഇയില്‍ ഉള്ള ഇയാളെ ചോദ്യം ചെയ്യാനായി കേരളത്തില്‍ എത്തിക്കാന്‍ നീക്കം നടക്കുന്നുണ്ട്.

ദുബൈയിലെ സ്വകാര്യ കമ്പനിയില്‍ ഫെസിലീറ്റീസ് എഞ്ചിനീയറായി ജോലി ചെയ്യുന്ന നിതീഷ് ഇപ്പോഴും യുഎഇയിലാണുള്ളത്. 

കഴിഞ്ഞ ജൂലൈ എട്ടിനാണ് ഷാര്‍ജ അല്‍ നഹ്ദയിലുള്ള അപ്പാര്‍ട്‌മെന്റില്‍ കൊല്ലം സ്വദേശിനിയായ വിപഞ്ചികയെയും മകള്‍ വൈഭവിയെയും മരിച്ച നിലയില്‍ കണ്ടെത്തിയത്. അപ്പാര്‍ട്‌മെന്റിലെ വീട്ടുജോലിക്കാരി അറിയിച്ചതിനെ തുടര്‍ന്ന് അധികൃതര്‍ നടത്തിയ പരിശോധനയിലാണ് ഇരവരുടെയും മൃതദേഹങ്ങള്‍ കണ്ടെത്തിയത്.

ALSO READ: വിദേശകാര്യ മന്ത്രാലയത്തിന്റെ അനുമതി വാങ്ങും; വിപഞ്ചിക കേസിൽ ഷാർജയിലേക്ക് അന്വേഷണം വ്യാപിപ്പിക്കാൻ ഒരുങ്ങി ക്രൈംബ്രാഞ്ച് 

നിതീഷ് മറ്റൊരു സ്ഥലത്തായിരുന്നു താമസം. യുവതിയുടെയും കുഞ്ഞിന്റെയും മൃതദേഹങ്ങള്‍ കണ്ടെത്തുമ്പോള്‍ അപ്പാര്‍ട്‌മെന്റ് അകത്തു നിന്ന് പൂട്ടിയ നിലയിലായിരുന്നു. വിപഞ്ചികയുടെ മകള്‍ വൈഭവിയുടെ മൃതദേഹം നാട്ടിലേക്ക് കൊണ്ടുപോകണമെന്നാണ് യുവതിയുടെ കുടുംബം ആഗ്രഹിച്ചത്. എന്നാല്‍ കുഞ്ഞിന്റെ മൃതദേഹം ദുബൈയില്‍ തന്നെ സംസ്‌കിരിക്കണമെന്ന് യുവതിയുടെ ഭര്‍ത്താവ് വാശി പിടിക്കുകയായിരുന്നു.

കുട്ടി ശ്വാസം മുട്ടിയും അമ്മ തൂങ്ങിമരിക്കുകയായിരുന്നു എന്നാണ് ഷാര്‍ജയിലെ ഫോറന്‍സിക് റിപ്പോര്‍ട്ടില്‍ രേഖപ്പെടുത്തിയിരുന്നത്. ജബല്‍ അലി ശ്മശാനത്തിലായിരുന്നു വൈഭവിയുടെ സംസ്‌കാരം. യുവതിയുടെ മൃതദേഹം കുടുംബം നാട്ടിലേക്ക് കൊണ്ടുവന്ന് സംസ്‌കരിച്ചു. യുവതിയുടെ രണ്ടാമത്തെ പോസ്റ്റ്‌മോര്‍ട്ടം റിപ്പോര്‍ട്ട് കൂടി ലഭിച്ച ശേഷം അന്വേഷണം വിപുലീകരിക്കാനാണ് അന്വേഷണ സംഘത്തിന്റെ പദ്ധതി.

A major development in the vipanchika case as authorities issue a lookout notice against husband nitish mohan.