കാഠ്മണ്ഡു: നേപ്പാളിൽ അഴിമതിക്കെതിരെയും സമൂഹമാധ്യമ നിരോധനത്തിനെതിരെയും യുവാക്കൾ നടത്തിയ പ്രതിഷേധം സമാധാനപരമായിരുന്നുവെന്നും പൊലിസിന്റെ അക്രമമാണ് സംഘർഷത്തിന് കാരണമെന്നും പ്രതിഷേധക്കാർ ആരോപിച്ചു. പാർലമെന്റിലേക്കുള്ള പ്രതിഷേധ മാർച്ചിനിടെ പൊലിസ് നടത്തിയ വെടിവെപ്പിൽ 16 പേർ കൊല്ലപ്പെടുകയും 100-ലധികം പേർക്ക് പരിക്കേൽക്കുകയും ചെയ്തതായി റിപ്പോർട്ടുകൾ. പരിക്കേറ്റവരിൽ 10 പേരുടെ നില ഗുരുതരമാണെന്ന് ന്യൂ ബനേശ്വർ ആശുപത്രി അധികൃതരെ ഉദ്ധരിച്ച് നേപ്പാൾ മാധ്യമങ്ങൾ റിപ്പോർട്ട് ചെയ്തു.

ALSO READ: സോഷ്യല്‍ മീഡിയ നിരോധനം: നേപ്പാളില്‍ പ്രതിഷേധം ശക്തമാകുന്നു, മരണം 14 ആയി, നൂറിലധികം പേര്‍ക്ക് പരുക്ക്

പ്രതിഷേധം സമാധാനപരമായി നടത്താനായിരുന്നു പദ്ധതിയെന്ന് പ്രതിഷേധക്കാർ എഎൻഐയോട് പറഞ്ഞു. എന്നാൽ, മാർച്ച് മുന്നോട്ടുപോകവെ പൊലിസ് അക്രമം ആരംഭിച്ചുവെന്നാണ് ഇവരുടെ ആരോപണം. "ഞങ്ങൾ സമാധാനപരമായ പ്രതിഷേധം നടത്താൻ ശ്രമിച്ചു. പക്ഷേ, പൊലിസ് ജനങ്ങൾക്ക് നേരെ വെടിയുതിർക്കുകയായിരുന്നു. ഇത് സമാധാനപരമായ പ്രതിഷേധത്തിന്റെ സത്തയ്ക്ക് വിരുദ്ധമാണ്. അധികാരികൾക്ക് ഞങ്ങളുടെ മേൽ അവരുടെ ശക്തി അടിച്ചേൽപ്പിക്കാനാവില്ല," ഒരു പ്രതിഷേധക്കാരൻ പറഞ്ഞു.

റോഡിൽ നിന്നിരുന്ന തന്റെ സുഹൃത്തിന്റെ തലയിൽ പൊലിസ് വെടിവെച്ചതായി മറ്റൊരു പ്രതിഷേധക്കാരൻ വെളിപ്പെടുത്തി. "അവൻ റോഡിൽ നിൽക്കുകയായിരുന്നു, പൊലിസ് അവന്റെ തലയിൽ നിറയൊഴിച്ചു," അവൻ പറഞ്ഞു. മറ്റൊരാളുടെ സുഹൃത്തിന്റെ കൈയിൽ വെടിയുണ്ട തറച്ചതായും, പൊലിസ് മനപ്പൂർവം മുട്ടിന് മുകളിൽ വെടിവെച്ചതായും പ്രതിഷേധക്കാർ ആരോപിച്ചു.

പ്രതിഷേധം ശക്തമായതോടെ സർക്കാർ 'ഷൂട്ട് അറ്റ് സൈറ്റ്' ഉത്തരവ് പുറപ്പെടുവിച്ചു. പാർലമെന്റിന് പുറത്തെ നിയന്ത്രിത മേഖലയിൽ പ്രതിഷേധക്കാർ പ്രവേശിക്കാൻ ശ്രമിച്ചപ്പോൾ പൊലിസ് തടഞ്ഞതാണ് സംഘർഷത്തിന് വഴിവെച്ചത്. പ്രതിഷേധം അടിച്ചമർത്താൻ പൊലിസ് നടപടികൾക്ക് പിന്നാലെ കാഠ്മണ്ഡുവിൽ സൈന്യം വിന്യസിച്ചിട്ടുണ്ട്.