ബീജിംഗ്: തെക്കൻ ചൈനയിൽ തപഹ് ചുഴലിക്കാറ്റ് ശക്തമായതിനെ തുടർന്ന് പതിനായിരക്കണക്കിന് ആളുകളെ മാറ്റിപ്പാർപ്പിച്ചു. കാറ്റിനെ തുടർന്ന് വിമാന സർവിസുകൾ തടസ്സപ്പെടുകയും സ്കൂളുകൾ അടയ്ക്കുകയും ചെയ്തു. മണിക്കൂറിൽ 108 കിലോമീറ്റർ (മണിക്കൂറിൽ 67 മൈൽ) വേഗതയിൽ വീശിയടിച്ച കൊടുങ്കാറ്റ് കരയിലേക്ക് എത്തുന്നതിനുമുമ്പ് തെക്കൻ ചൈനയിലുടനീളം 60,000 പേരെ ഒഴിപ്പിച്ചതായി അധികൃതർ അറിയിച്ചു.

ഇന്ന് രാവിലെ ഗ്വാങ്‌ഡോങ് പ്രവിശ്യയിലെ തായ്‌ഷാൻ നഗരത്തിൽ ശക്തമായ കാറ്റും പേമാരിയുമാണ് റിപ്പോർട്ട് ചെയ്തത്. ചൈനയിലെ നാല് തലങ്ങളിലുള്ള മുന്നറിയിപ്പ് സംവിധാനത്തിലെ മൂന്നാമത്തെ ഉയർന്ന മുന്നറിയിപ്പ് നൽകിയിരുന്നതായി ചൈനയിലെ ഒഫീഷ്യൽ വാർത്ത ചാനലായ സിസിടിവി റിപ്പോർട്ട് ചെയ്തു. ഗുവാങ്‌ഡോങ് കാലാവസ്ഥാ ബ്യൂറോയാണ് മുന്നറിയിപ്പ് പുറപ്പെടുവിച്ചത്.

ഗുവാങ്‌ഡോങ്ങിലെ അടിയന്തര മാനേജ്‌മെന്റ് വകുപ്പ് എല്ലാ പുറം ജോലികളും നിർത്തിവയ്ക്കാനും പാർക്കുകൾ, ബീച്ചുകൾ പോലുള്ള വിനോദ മേഖലകൾ അടച്ചിടാനും ഉത്തരവിട്ടു. പ്രദേശത്തെ മുഴുവൻ സ്‌കൂളുകൾക്കും അവധി പ്രഖ്യാപിച്ചു. ഈ വർഷം ഇതുവരെ 16 ചുഴലിക്കാറ്റുകളാണ് ഗ്വാങ്‌ഡോങ്ങിനെ ബാധിച്ചത്. 

ALSO READ: നേപ്പാളില്‍ പ്രതിഷേധം സമാധാനപരമായിരുന്നു; എല്ലാ ആക്രമണവും തുടങ്ങിയത് പൊലിസ്; അവർ അവന്റെ തലയ്ക്ക് നേരെ നിറയൊഴിച്ചു

തപഹ് ചുഴലിക്കാറ്റ് വടക്കുപടിഞ്ഞാറോട്ട് നീങ്ങുമെന്നും പ്രവിശ്യ വിടുന്നതുവരെ വൈദ്യുതി നഷ്ടപ്പെടാൻ സാധ്യതയുള്ളതായി അധികൃതർ വ്യക്തമാക്കി. നഗരത്തിൽ 3,300 അടിയന്തര ഉദ്യോഗസ്ഥർ സജ്ജരാണെന്ന് ചൈനീസ് സ്റ്റേറ്റ് മീഡിയ റിപ്പോർട്ട് ചെയ്തു. ജിയാങ്‌മെൻ, മാവോമിംഗ്, സുഹായ് എന്നീ തെക്കൻ നഗരങ്ങളും ചുഴലിക്കാറ്റ് മുന്നറിയിപ്പുകൾ നൽകുകയും സ്‌കൂളുകൾക്ക് അവധി പ്രഖ്യാപിക്കുകയും ചെയ്തു.

ഹോങ്കോങ്ങിൽ, നൂറുകണക്കിന് വിമാന സർവീസുകൾ ചുഴലിക്കാറ്റിനെ തുടർന്ന് റദ്ദാക്കി. വിമാന സർവീസുകൾ എപ്പോൾ ആരംഭിക്കുമെന്നറിയാത്തതിനാൽ പലയിടത്തും യാത്രക്കാർ വിമാനത്താവളത്തിൽ കുടുങ്ങി. ഹോങ്കോങ്ങിന് പടിഞ്ഞാറുള്ള അയൽ നഗരമായ യാങ്ജിയാങ്ങിൽ, 26 ഓഫ്‌ഷോർ വിൻഡ് പ്ലാറ്റ്‌ഫോമുകളിൽ നിന്ന് 1,785 തൊഴിലാളികളെയും മത്സ്യ ഫാമുകളിൽ നിന്ന് 2,026 പേരെയും ഒഴിപ്പിച്ചു. ചുഴലിക്കാറ്റ് ബാധിത പ്രദേശങ്ങളിലെ താമസക്കാർ ജാഗ്രത പാലിക്കണമെന്ന് അധികൃതർ മുന്നറിയിപ്പ് നൽകിയിട്ടുണ്ട്.