കാഠ്മണ്ഡു: നേപ്പാളില്‍ സോഷ്യല്‍മീഡിയാ നിരോധനത്തിനെതിരേ തെരുവിലിറങ്ങിയ യുവാക്കള്‍ക്ക് മുന്നില്‍ സര്‍ക്കാര്‍ മുട്ടുമടക്കി. സോഷ്യല്‍മീഡിയീ നിരോധനം നീക്കിയ സര്‍ക്കാര്‍, യുവാക്കളോട് പ്രക്ഷോഭം അവസാനിപ്പിക്കാന്‍ അഭ്യര്‍ത്ഥിച്ചു. 
പ്രതിഷേധക്കാരും സുരക്ഷാ സേനയും തമ്മിലുള്ള അക്രമാസക്തമായ ഏറ്റുമുട്ടലില്‍ ഹിമാലയന്‍ രാജ്യത്തുടനീളം കുറഞ്ഞത് 20 പേര്‍ കൊല്ലപ്പെടുകയും 300 ലധികം പേര്‍ക്ക് പരിക്കേല്‍ക്കുകയും ചെയ്തിരുന്നു. പിന്നാലെ ഇന്നല രാത്രിയോടെയാണ് കെപി ശര്‍മ്മ ഒലിയുടെ നേതൃത്വത്തിലുള്ള നേപ്പാള്‍ സര്‍ക്കാര്‍ 26 സോഷ്യല്‍ മീഡിയ പ്ലാറ്റ്‌ഫോമുകള്‍ നിരോധിക്കാനുള്ള മുന്‍ തീരുമാനം പിന്‍വലിച്ചതായി പ്രഖ്യാപിച്ചത്.

സോഷ്യല്‍ മീഡിയ സൈറ്റുകള്‍ നിരോധിക്കാനുള്ള മുന്‍ തീരുമാനം സര്‍ക്കാര്‍ പിന്‍വലിച്ചതായി നേപ്പാള്‍ കമ്മ്യൂണിക്കേഷന്‍, ഇന്‍ഫര്‍മേഷന്‍ ആന്‍ഡ് ബ്രോഡ്കാസ്റ്റിംഗ് മന്ത്രി പൃഥ്വി സുബ്ബ ഗുരുങ് പ്രഖ്യാപിച്ചു. 'ജനറല്‍ ഇസഡിന്റെ ആവശ്യം പരിഗണിച്ച് സോഷ്യല്‍ മീഡിയ തുറക്കാന്‍ സര്‍ക്കാര്‍ ഇതിനകം തീരുമാനിച്ചു,- അടിയന്തര മന്ത്രിസഭാ യോഗത്തിന് ശേഷം മന്ത്രി പറഞ്ഞു. സോഷ്യല്‍ മീഡിയ പ്ലാറ്റ്‌ഫോമുകള്‍ അടച്ചുപൂട്ടാനുള്ള മുന്‍ തീരുമാനത്തില്‍ സര്‍ക്കാര്‍ ഖേദിക്കുന്നില്ലെന്നും ഗുരുങ് പറഞ്ഞു.
ഈ വിഷയം ഒരു മറയായി ഉപയോഗിച്ച് പ്രതിഷേധങ്ങള്‍ നടന്നിരുന്നത് പരിഗണിച്ചാണ് മുന്‍ തീരുമാനം വേണ്ടെന്നു വച്ചത്. ജനറല്‍ ഇസഡ് ഗ്രൂപ്പിനോട് പ്രതിഷേധം പിന്‍വലിക്കാന്‍ അഭ്യര്‍ത്ഥിക്കുകയാണെന്നും മന്ത്രി പറഞ്ഞു.

അക്രമത്തെക്കുറിച്ച് അന്വേഷിക്കാന്‍ മന്ത്രിസഭ അന്വേഷണ സമിതി രൂപീകരിച്ചു. റിപ്പോര്‍ട്ട് തയ്യാറാക്കാന്‍ 15 ദിവസത്തെ സമയം നല്‍കിയിട്ടുണ്ട്.

നേരത്തെ ജന്‍ സി (ജനറേഷന്‍ ഇസെഡ്) ഓണ്‍ലൈനില്‍ ആരംഭിച്ച പ്രതിഷേധങ്ങള്‍, മധ്യ കാഠ്മണ്ഡുവിലും മറ്റ് നഗരങ്ങളിലും പാര്‍ലമെന്റിന് പുറത്ത് ബഹുജന പ്രകടനങ്ങളായി വളരുകയായിരുന്നു. നിരോധനം മാത്രമല്ല, ഒലിയുടെ സര്‍ക്കാരിനെതിരെ വ്യാപകമായ അഴിമതി ആരോപണങ്ങളും ഉയര്‍ത്തിക്കാട്ടി. സര്‍ക്കാര്‍ തീരുമാനത്തിനെതിരേ ജന്‍ സി (ജനറേഷന്‍ ഇസെഡ്) വിഭാഗക്കാരാണ് കാഠ്മണ്ഡുവിലെ പാര്‍ലമെന്റ് കെട്ടിടത്തിനു സമീപം തടിച്ചുകൂടി പ്രക്ഷോഭം നടത്തിയത്. പ്രതിഷേധക്കാര്‍ക്കു നേരെ പൊലിസ് ആദ്യം ജലപീരങ്കി പ്രയോഗിച്ചു. ബറ്റണും റബര്‍ ബുള്ളറ്റും ഉപയോഗിച്ചുവെന്ന് വാര്‍ത്താവിനിമയ മന്ത്രി പ്രിഥ്വി സുബ്ബ പറഞ്ഞു.

അതീവസുരക്ഷാ മേഖലയായ പാര്‍ലമെന്റിനു സമീപമുള്ള റോഡ് കലാപക്കളമായി. പ്രക്ഷോഭകര്‍ മതിലില്‍ ഇരച്ചുകയറി.
കാഠ്മണ്ഡു ജില്ലയില്‍ കര്‍ഫ്യൂ പ്രഖ്യാപിച്ചു.

നേപ്പാള്‍ പ്രധാനമന്ത്രി കെ.പി ശര്‍മ ഓലി ഫേസ്ബുക്ക്, ഇന്‍സ്റ്റഗ്രാം, ടിക് ടോക്ക്, വാട്‌സ്ആപ്പ് അടക്കമുള്ള 26 സമൂഹമാധ്യമങ്ങള്‍ നിരോധിച്ച് ഉത്തരവിട്ടിരുന്നു. രാജ്യത്ത് സമൂഹമാധ്യമങ്ങള്‍ രജിസ്റ്റര്‍ ചെയ്തിട്ടില്ലെന്നാണ് പ്രധാനമന്ത്രിയുടെ വാദം. ആവര്‍ത്തിച്ചുള്ള അഭ്യര്‍ഥനകളെത്തുടര്‍ന്ന് സമൂഹമാധ്യമ പ്ലാറ്റ്‌ഫോമുകള്‍ക്ക് നേപ്പാളില്‍ രജിസ്റ്റര്‍ ചെയ്യുന്നതിനായി ഓഗസ്റ്റ് 28ന് സര്‍ക്കാര്‍ ഏഴ് ദിവസത്തെ സമയപരിധി നിശ്ചയിച്ചിരുന്നു. ഇത് അവസാനിച്ചതോടെയാണ് രാജ്യത്ത് വിലക്കേര്‍പ്പെടുത്തിയത്.

പ്രതിഷേധങ്ങളെ തുടര്‍ന്ന് പ്രധാനമന്ത്രിയുടെയും രാഷ്ട്രപതിയുടെയും വസതിക്ക് പുറത്ത് സൈന്യത്തെ വിന്യസിച്ചിട്ടുണ്ട്.

Nepal has lifted a ban on social media platforms following mass protests and the killing of 19 people in clashes with security forces, a government minister said.