ന്യൂഡല്‍ഹി: പ്രതിപക്ഷ നേതാവ് രാഹുല്‍ ഗാന്ധിയുടെ വോട്ട് വെട്ടല്‍ ആരോപണങ്ങള്‍ തള്ളി തെരഞ്ഞെടുപ്പ് കമ്മീഷന്‍. വോട്ടര്‍ പട്ടികയില്‍നിന്ന് ആളുകള്‍ അറിയാതെ അവരെ നീക്കംചെയ്യുന്നുവെന്ന രാഹുല്‍ ഗാന്ധിയുടെ ആരോപണം അടിസ്ഥാനരഹിതമാണെന്ന് കമ്മീഷന്‍ വാദിക്കുന്നു. 

'ഓണ്‍ലൈനായി ആര്‍ക്കും ആരെയും വോട്ടര്‍ പട്ടികയില്‍നിന്ന് നീക്കംചെയ്യാനാകില്ല. രാഹുലിന്റെ പരമാര്‍ശം തെറ്റും അടിസ്ഥാനരഹിതവും ആണ്' കമ്മീഷന്‍ വ്യക്തമാക്കി. 

എന്നാല്‍ കര്‍ണാടകയിലെ അലന്ദ് മണ്ഡലത്തില്‍ വോട്ടര്‍മാരെ ഇത്തരത്തില്‍ നീക്കംചെയ്യാന്‍ ഒരു ശ്രമം നടന്നിരുന്നുവെന്നും ഇത് പരാജയപ്പെട്ടെന്നും കമ്മീഷന്‍ വ്യക്തമാക്കി. സംഭവവുമായി ബന്ധപ്പെട്ട് കേസ് ഫയല്‍ ചെയ്തിട്ടുണ്ടെന്നും കമ്മീഷന്‍ പറഞ്ഞു.

മുഖ്യതെരഞ്ഞെടുപ്പ് കമീഷണര്‍ ഗ്യാനേഷ് കുമാര്‍ വോട്ടുകൊള്ളക്കാരെ സംരക്ഷിക്കുന്നുവെന്ന് ഇന്ന് രാഹുല്‍ ഗാന്ധി ആരോപിച്ചിരുന്നു. പ്രതിപക്ഷത്തിന് വോട്ടുചെയ്യുന്നവരെയും ദലിതുകളെയും പാര്‍ശ്വവല്‍കൃത വിഭാഗങ്ങളെയും പ്രത്യേകം ലക്ഷ്യമിട്ടാണ് രാജ്യത്ത് വോട്ട് അട്ടിമറി നടക്കുന്നത്. താന്‍ വെറുതെ പറയുന്നതല്ല, പ്രതിപക്ഷ നേതാവെന്ന ഉത്തരവാദിത്തത്തോടെയാണ് ആരോപണമുന്നയിക്കുന്നതെന്നും രാഹുല്‍ പറഞ്ഞു.100 ശതമാനം തെളിവുകള്‍ മുന്നില്‍ വെച്ചിട്ടും തെരഞ്ഞെടുപ്പ് കമീഷന്‍ ഉറങ്ങുകയാണെന്നും അദ്ദേഹം കുറ്റപ്പെടുത്തി. 

ALSO READ: രാജ്യത്ത് വ്യാപക വോട്ട് വെട്ടല്‍  തെളിവ് നിരത്തി രാഹുല്‍; ലക്ഷ്യം വെക്കുന്നത് ദലിത് ന്യൂനപക്ഷങ്ങളെ, ഹൈഡ്രജന്‍ ബോംബ് വരാനിരിക്കുന്നേയുള്ളു 

കര്‍ണാടകയിലെ അലന്ദ് മണ്ഡലത്തില്‍ ഇത്തരത്തില്‍ 6018 വോട്ടുകള്‍ ഇത്തരത്തില്‍ വ്യാജ അപേക്ഷകള്‍ നല്‍കി നീക്കിയതിന്റെ വിശദാംശങ്ങളും രാഹുല്‍ പുറത്തുവിട്ടിരുന്നു. വോട്ട് വെട്ടലിന് ഇരയായവരെയും അദ്ദേഹം വാര്‍ത്താസമ്മേളനത്തില്‍ ഹാജരാക്കിയിരുന്നു. അന്വേഷണത്തിന്റെ ഭാഗമായി കര്‍ണാടക സി.ഐ.ഡി, 18 തവണ കത്തയച്ചിട്ടും കമീഷന്‍ പൂര്‍ണമായ വിവരങ്ങള്‍ നല്‍കാന്‍ തയാറായിട്ടില്ലെന്നും രാഹുല്‍ ചൂണ്ടിക്കാട്ടി. 

❌Allegations made by Shri Rahul Gandhi are incorrect and baseless.#ECIFactCheck

✅Read in detail in the image attached 👇 https://t.co/mhuUtciMTF pic.twitter.com/n30Jn6AeCr

— Election Commission of India (@ECISVEEP) September 18, 2025

14 മിനിറ്റിലാണ് ഒരു ബൂത്തില്‍ 12 വോട്ടുകള്‍ നീക്കാന്‍ അപേക്ഷകള്‍ സമര്‍പ്പിക്കപ്പെട്ടത്. മറ്റൊരിടത്ത് 36 സെക്കന്റില്‍ രണ്ട് അപേക്ഷകള്‍ പൂരിപ്പിച്ച് സമര്‍പ്പിക്കപ്പെട്ടു. ഇതെല്ലാം വിരല്‍ ചൂണ്ടുന്നത് ആസൂത്രിതമായ ഇടപെടലിലേക്കാണെന്നും അദ്ദേഹം പറഞ്ഞു. ആളുകളെ ഉപയോഗിച്ചല്ല, സോഫ്റ്റ്‌വെയര്‍ ഉപയോഗിച്ചാണ് ഇത് ചെയ്യുന്നതെന്ന് രാഹുല്‍ ഗാന്ധി ചൂണ്ടിക്കാട്ടി. 

അതേസമയം, താന്‍ മുമ്പ് സൂചിപ്പിച്ച ഹൈഡ്രജന്‍ ബോംബ് ഇതല്ലെന്നും അത് പിന്നാലെ വരുന്നുണ്ടെന്നും അദ്ദേഹം പറഞ്ഞു.

the election commission of india has dismissed opposition leader rahul gandhi’s allegations of voter suppression, stating that claims of voters being removed from the rolls without their knowledge are unfounded.