തിരുവനന്തപുരം: നിയമസഭയില്‍ തുടര്‍ച്ചയായ മൂന്നാം ദിവസവും അടിയന്തര പ്രമേയത്തില്‍ ചര്‍ച്ച. സംസ്ഥാനത്തെ അനിയന്ത്രിതമായ വിലക്കയറ്റം നിയമസഭയില്‍ ചര്‍ച്ച ചെയ്യും. പ്രതിപക്ഷം കൊണ്ടുവന്ന അടിയന്തര പ്രമേയത്തില്‍ സ്പീക്കര്‍ അനുമതി നല്‍കി.

ഉച്ചയ്ക്ക് 12 മണി മുതല്‍ രണ്ട് മണിക്കൂറാണ് ചര്‍ച്ച നടക്കുക. പി.സി വിഷ്ണുനാഥ് എം.എല്‍.എയാണ് അടയന്തര പ്രമേയത്തിന് നോട്ടിസ് നല്‍കിയത്. 

സഭാ സമ്മേളനത്തിന്റെ ആദ്യദിനം പൊലിസ് അതിക്രമത്തെക്കുറിച്ചും ഇന്നലെ അമീബിക് മസ്തിഷ്‌ക ജ്വരം വര്‍ധിക്കുന്ന സാഹചര്യത്തെക്കുറിച്ചുമാണ് ചര്‍ച്ച നടന്നത്. 

സാധാരണ ജനങ്ങള്‍ക്ക് ജീവിക്കാന്‍ കഴിയാത്ത അവസ്ഥയിലേക്ക് കാര്യങ്ങള്‍ നീങ്ങുകയാണെന്നും, ജനങ്ങളുടെ കയ്യില്‍ പണമില്ലാത്ത സാഹചര്യത്തില്‍ സംസ്ഥാന സര്‍ക്കാരോ ഭക്ഷ്യവകുപ്പോ പ്രതിസന്ധി പരിഹരിക്കാനായി ഒന്നും ചെയ്യുന്നില്ലെന്നുമാണ് പ്രതിപക്ഷം ആരോപിക്കുന്നത്.

അതേസമയം, മലയോര കര്‍ഷകരുടെ ചിരകാല ആവശ്യം പരിഗണിക്കപ്പെടുന്ന വനം, വന്യജീവി എന്നിവയുമായി ബന്ധപ്പെട്ട രണ്ട് ഭേദഗതി ബില്ലുകള്‍ ഇന്ന് സഭയില്‍ അവതരിപ്പിക്കും. കേരളത്തിന്റെ പൊതുആവശ്യമെന്ന നിലയില്‍ പ്രതിപക്ഷത്തിന്റെ കൂടി പിന്തുണ ബില്ലിന് ലഭിക്കുമെന്നാണ് പ്രതീക്ഷിക്കപ്പെടുന്നത്. 

രാജ്യത്തെ മറ്റ് സംസ്ഥാനങ്ങളില്‍ നിന്നു വ്യത്യസ്തമായി കേരളത്തിലും ജാര്‍ഖണ്ഡിലുമാണ് വനം നിയമ ഭേദഗതി കൂടുതലായി വേണ്ടിവരുന്നത്. ഈ രണ്ടു സംസ്ഥാനങ്ങളും മനുഷ്യ-വന്യജീവി സംഘര്‍ഷങ്ങള്‍ പോലുള്ള വിഷയങ്ങള്‍ അഭിമുഖീകരിക്കുന്നുണ്ടെന്നതാണ് കാരണം. 
കേരളത്തില്‍ വര്‍ധിച്ചുവരുന്ന മനുഷ്യവന്യജീവി സംഘര്‍ഷത്തിന് പരിഹാരമായി ഈ മാസം കേരള മന്ത്രിസഭ കരട് വന്യജീവി സംരക്ഷണ (ഭേദഗതി) ബില്ലിന് അംഗീകാരം നല്‍കിയിരുന്നു. 

പാര്‍പ്പിട പ്രദേശത്ത് ഒരു വ്യക്തിയെ ആക്രമിക്കുകയും പരുക്കേല്‍പ്പിക്കുകയും ചെയ്യുന്ന വന്യമൃഗത്തെ കൊല്ലാന്‍ നിലവിലെ നടപടിക്രമങ്ങളിലെ പല കാലതാമസങ്ങളും മറികടന്ന് അനുമതി നല്‍കുന്നത് പ്രദേശത്തെ താമസക്കാരുടെ ജീവനും സ്വത്തിനും സുരക്ഷയൊരുക്കാന്‍ വഴിയൊരുക്കുമെന്ന് കരുതപ്പെടുന്നു.

സ്വകാര്യ ഭൂമിയില്‍ വളരുന്ന ചന്ദനം മുറിക്കാനും വില്‍ക്കാനും അനുമതി നല്‍കുന്നതിനായി 1961ലെ കേരള വനം നിയമം ഭേദഗതി ചെയ്യുന്നതാണ് രണ്ടാമത്തെ ബില്‍. തടികള്‍ക്ക് വിപണി മൂല്യം ലഭിക്കുന്നുണ്ടെന്ന് ഉറപ്പുവരുത്തി ചന്ദനം കൃഷി ചെയ്യാന്‍ സ്വകാര്യ വ്യക്തികളെ ഈ വ്യവസ്ഥ പ്രോത്സാഹിപ്പിക്കുമെന്നാണ് കരുതുന്നത്.