ഏഷ്യ കപ്പ് സൂപ്പർ ഫോറിലെ രണ്ടാം മത്സരത്തിനായുള്ള തയ്യാറെടുപ്പിലാണ് ഇന്ത്യ. നാളെ നടക്കുന്ന മത്സരത്തിൽ ബംഗ്ലാദേശാണ് സൂര്യകുമാർ യാദവിന്റെയും സംഘത്തിന്റെയും എതിരാളികൾ. സൂപ്പർ ഫോറിലെ ആദ്യ മത്സരത്തിൽ പാകിസ്താനെ വീഴ്ത്തിയാണ് ഇന്ത്യ ബംഗ്ലാദേശിനെതിരെ കളത്തിൽ ഇറങ്ങുന്നത്. മറുഭാഗത്ത് ശ്രീലങ്കയെ സൂപ്പർ ഫോറിലെ ആദ്യ മത്സരത്തിൽ കീഴടക്കിയാണ് ബംഗ്ലാദേശ് എത്തുന്നത്. 

ഈ മത്സരത്തിൽ തിളങ്ങാൻ സാധിച്ചാൽ മലയാളി സൂപ്പർതാരം സഞ്ജു സാംസണ് ഇന്ത്യൻ പരിശീലകൻ ഗൗതം ഗംഭീറിനെ മറികടക്കാൻ അവസരമുണ്ട്. ഇതിനായി സഞ്ജുവിന് വേണ്ടത് വെറും മൂന്ന് റൺസ് മാത്രമാണ്. സഞ്ജു ഇതുവരെ 42 മത്സരങ്ങളിൽ നിന്നും 930 റൺസ് ആണ് നേടിയിട്ടുള്ളത്. ഇന്ത്യക്കായി 37 ടി-20 മത്സരങ്ങളിൽ നിന്നും 932 റൺസാണ് ഗംഭീർ നേടിയിട്ടുള്ളത്.  ഇന്റർനാഷണൽ ടി-20യിൽ 1000 റൺസ് പൂർത്തിയാക്കാനുള്ള സുവർണാവസവും  സഞ്ജുവിന്റെ മുന്നിണ്ട്. 70 റൺസ് കൂടിയാൽ ഇന്റർനാഷണൽ ടി-20യിൽ ഇന്ത്യക്കായി 1000 റൺസ് നേടുന്ന പന്ത്രണ്ടാമത്തെ താരമാവാനും സഞ്ജുവിന് സാധിക്കും. 

ഗ്രൂപ്പ് ഘട്ടത്തിൽ ഒമാനെതിരെയുള്ള അവസാന മത്സരത്തിൽ അർദ്ധ സെഞ്ച്വറി നേടി സഞ്ജു തിളങ്ങിയിരുന്നു. മത്സരത്തിൽ 45 പന്തിൽ 56 റൺസ് നേടിയാണ് സഞ്ജു ഇന്ത്യൻ ടീമിന്റെ ടോപ് സ്കോററായത്. മൂന്ന് വീതം ഫോറുകളും സിക്സുകളും ആണ് സഞ്ജു നേടിയത്. ഈ തകർപ്പൻ പ്രകടനങ്ങൾക്ക് പിന്നാലെ മത്സരത്തിലെ പ്ലെയർ ഓഫ് ദി മാച്ച് അവാർഡും സഞ്ജുവിനെ തേടിയെത്തി.

അതേസമയം സൂപ്പർ ഫോറിലെ ത്രില്ലർ പോരാട്ടത്തിൽ പാകിസ്താനെതിരെ ഇന്ത്യ ആറ് വിക്കറ്റിന്റെ തകർപ്പൻ വിജയമാണ് സ്വന്തമാക്കിയത്. മത്സരത്തിൽ പാകിസ്താൻ ഉയർത്തിയ 171 റൺസിന്റെ വിജയലക്ഷ്യം 18.5 ഓവറിൽ നാല് വിക്കറ്റ് നഷ്ടത്തിൽ സൂര്യകുമാർ യാദവും സംഘവും മറികടക്കുകയായിരുന്നു. 

അർദ്ധ സെഞ്ചറി നേടിയ ഓപ്പണർ അഭിഷേക് ശർമ്മയുടെ കരുത്തിലാണ് ഇന്ത്യ വിജയിച്ചു കയറിയത്. 39 പന്തിൽ നിന്നും 74 റൺസാണ് താരം അടിച്ചെടുത്തത്. ആറ് ഫോറുകളും അഞ്ചു കൂറ്റൻ സിക്‌സുകളും അടങ്ങുന്നതായിരുന്നു താരത്തിന്റെ പ്രകടനം. മത്സരത്തിലെ പ്ലയെർ ഓഫ് ദി മാച്ച് അവാർഡും അഭിഷേകാണ് സ്വന്തമാക്കിയത്.  അഭിഷേകിന് പുറമെ 28 പന്തിൽ 47 റൺസ് നേടിയ ശുഭ്മൻ ഗില്ലും ഇന്ത്യയുടെ വിജയത്തിൽ നിർണായക പങ്കുവഹിച്ചു. 

India is preparing for the second match of the Asia Cup Super Four. Suryakumar Yadav and his team will face Bangladesh in tomorrow's match. If he can shine in this match, Malayali superstar Sanju Samson has a chance to surpass Indian coach Gautam Gambhir.