തിരുവനന്തപുരം: തിരുവനന്തപുരം മണ്ണന്തല അമ്പഴങ്ങോട് ഗുണ്ടാ ആക്രമണം. പഴം പഴുത്തില്ലെന്ന് പറഞ്ഞ് കടയുടമയെ വെട്ടിപരിക്കേല്‍പ്പിച്ചു. പടക്കങ്ങള്‍ എറിഞ്ഞ് സ്ഫോടനമുണ്ടാക്കിയ സംഘം നിരവധി വാഹനങ്ങള്‍ തകര്‍ത്തു. 

തിങ്കളാഴ്ച്ച അര്‍ധരാത്രി 12.30ഓടെയാണ് സംഭവം നടന്നത്. രണ്ട് ഗുണ്ടാ സംഘങ്ങള്‍ തമ്മിലുള്ള കുടിപ്പകയാണ് ആക്രമണത്തിന് കാരണമെന്നാണ് പൊലിസ് പറയുന്നത്. നിരവധി കേസുകളില്‍ പ്രതിയായ ശരത്തും കൂട്ടാളികളുമാണ് ആക്രമണം നടത്തിയത്. 

ബൈക്കില്‍ പോകുമ്പോള്‍ പതിയെ പോവാന്‍ ശരത്തുള്‍പ്പെട്ട ഗുണ്ടാസംഘത്തോട് മറ്റൊരു സംഘത്തിലെ ഗുണ്ട പറഞ്ഞതാണ് സംഘര്‍ഷത്തിന് കാരണം. ഇതിനു പിന്നാലെ ശരത്തും കൂട്ടാളികളും പറഞ്ഞയാളിന്റെ വീട്ടിലേക്ക് പടക്കമെറിഞ്ഞു. റോഡരികില്‍ നിര്‍ത്തിയിട്ടിരുന്ന മൂന്ന് ഓട്ടോറിക്ഷകളും രണ്ട് കാറുകളും ഒരു ബൈക്കും അടിച്ചുതകര്‍ക്കുകയും ചെയ്തു.

പിന്നാലെ കടയില്‍ കയറി പഴം കഴിച്ചതിന് ശേഷം പഴം പഴുത്തില്ലെന്ന് പറഞ്ഞ് കടയുടമയേയും ആക്രമിക്കുകയായിരുന്നു. അക്രമിസംഘം ആദ്യം ബീഡി വാങ്ങിയെന്നും പിന്നീട് പഴമെടുത്തപ്പോള്‍ അത് പഴുത്തില്ലെന്ന് പറഞ്ഞതോടെയാണ് ആക്രമണം അഴിച്ചുവിട്ടതെന്നും കടയുടമ പൊന്നയ്യന്‍ പറഞ്ഞു. പഴക്കുലകള്‍ വെട്ടിനശിപ്പിക്കുകയും വാളുപയോഗിച്ച് പൊന്നയ്യനെ ആക്രമിക്കുകയുമായിരുന്നു. രണ്ട് സ്‌കൂട്ടറിലും ബൈക്കിലുമായി എട്ട് പേരുടെ സംഘമാണ് എത്തിയതെന്ന് പൊന്നയ്യന്‍ പറഞ്ഞു.