ടോക്കിയോ: ഫുഡ് ഡെലിവറി ആപ്പുകളെ കബളിപ്പിച്ച് രണ്ട് വർഷത്തോളം സൗജന്യ ഭക്ഷണം കഴിച്ച യുവാവ് അറസ്റ്റിൽ. ജപ്പാനിലാണ് സംഭവം. ഭക്ഷണം ഓർഡർ ചെയ്ത്, ഫുഡ് ഡെലിവറി ചെയ്തതിന് ശേഷം ഭക്ഷണം ലഭിച്ചില്ലെന്ന് നടിച്ച് ഇയാൾ ആയിരത്തിലധികം തവണ സൗജന്യമായി ഭക്ഷണം കഴിച്ചതായാണ് വിവരം.

ഐച്ചി പ്രിഫെക്ചറിലെ നഗോയയിൽ നിന്നുള്ള തകുയ ഹിഗാഷിമോട്ടോ എന്ന വ്യക്തിയാണ് അറസ്റ്റിലായത്. ഒരു പ്രമുഖ ഡെലിവറി ആപ്പിൽ നിന്ന് 1,095 തവണയാണ് ഇയാൾ ഫുഡ് ഓർഡർ ചെയ്തത്. ബെന്റോ ബോക്സുകൾ, ചിക്കൻ സ്റ്റീക്കുകൾ തുടങ്ങി പലതരം വിഭവങ്ങൾ കഴിച്ച ഇയാൾ ഒരു രൂപ പോലും നൽകിയില്ല. ആകെ 3.7 ദശലക്ഷം യെൻ (ഏകദേശം $24,000) യിലധികം രൂപയുടെ നഷ്ടമാണ് ഇയാൾ കമ്പനിക്ക് വരുത്തി വെച്ചത്.

ഹിഗാഷിമോട്ടോയുടെ തട്ടിപ്പ് രീതി വളരെ ലളിതമായിരുന്നു. ഓർഡർ ചെയ്യുമ്പോൾ 'കോൺടാക്റ്റ്‌ലെസ് ഡെലിവറി' തിരഞ്ഞെടുക്കുക. ഭക്ഷണം ലഭിച്ച ശേഷം, അത് എത്തിയില്ലെന്ന് ഡെലിവറി പ്ലാറ്റ്‌ഫോമിന് സന്ദേശം അയക്കുക. തുടർന്ന് റീഫണ്ട് നേടുക. മാസങ്ങളായി ഇയാൾ ഈ രീതിയായിരുന്നു പിന്തുടർന്ന് വന്നിരുന്നത്. 2023 ഏപ്രിൽ മുതൽ തൊഴിൽരഹിതനായതു മുതൽ ഇയാൾ തട്ടിപ്പ് നടത്തി വരികയായിരുന്നുവെന്ന് അന്വേഷണ ഉദ്യോഗസ്ഥർ വ്യക്തമാക്കി.

ALSO READ: മ്യാൻമറിൽ സർക്കാർ വിരുദ്ധ പ്രതിഷേധക്കാർക്ക് നേരെ പാരാ​ഗ്ലെെഡർ ഉപയോ​ഗിച്ച് ബോംബിട്ടു; 24 മരണം; 47 പേർക്ക് ​ഗുരുതര പരിക്ക്

വ്യാജ പേരുകളിലും പ്രീപെയ്ഡ് മൊബൈൽ നമ്പറുകളിലും രജിസ്റ്റർ ചെയ്ത 124 വ്യാജ അക്കൗണ്ടുകൾ ഉപയോഗിച്ചാണ് ഇയാൾ തട്ടിപ്പ് നടത്തിയിരുന്നത്. ഓരോ തവണയും ഓർഡർ ചെയ്ത ശേഷം കുറച്ച് ദിവസങ്ങൾക്കകം അക്കൗണ്ട് റദ്ദാക്കിയിരുന്നതിനാൽ ഇയാളെ കണ്ടെത്താൻ ബുദ്ധിമുട്ടായിരുന്നു.

ജൂലൈ 30-ന് ഡെമേ-കാൻ ആപ്പിൽ മറ്റൊരു വ്യാജ അക്കൗണ്ട് സൃഷ്ടിച്ച് ഐസ്ക്രീം, ബെന്റോസ്, സ്റ്റീക്കുകൾ എന്നിവ ഓർഡർ ചെയ്തതോടെയാണ് ഇയാൾ പിടിയിലാകുന്നത്. ഭക്ഷണം ലഭിച്ചിട്ടും എത്തിയില്ലെന്ന് അറിയിച്ച ഇയാൾക്ക് അന്നേ ദിവസം മാത്രം 16,000 യെൻ (ഏകദേശം $105) റീഫണ്ട് ലഭിച്ചിരുന്നു.

പൊലിസ് പിടിയിലായപ്പോൾ ഇയാൾ കുറ്റം സമ്മതിച്ചു. "ആദ്യം ഞാൻ ഈ തന്ത്രം പരീക്ഷിച്ചു നോക്കുകയായിരുന്നു. വഞ്ചനയിൽ വിജയം കണ്ടതോടെ എനിക്ക് നിർത്താൻ കഴിഞ്ഞില്ല," ഹിഗാഷിമോട്ടോ മൊഴി നൽകി.

സംഭവത്തെ തുടർന്ന്, ഡെലിവറി ആപ്പായ Demae-can ഐഡന്റിറ്റി പരിശോധനകൾ കർശനമാക്കുമെന്നും സംശയാസ്പദമായ റീഫണ്ട് രീതികൾ നിരീക്ഷിക്കാൻ പുതിയ സംവിധാനം കൊണ്ടുവരുമെന്നും അറിയിച്ചു. യുവാവിന്റെ തട്ടിപ്പിനെക്കുറിച്ച് ഓൺലൈനിൽ പലരും അത്ഭുതം പ്രകടിപ്പിച്ച് രംഗത്തെത്തി. 

an unemployed 38-year-old from nagoya, japan, exploited a glitch in the demae-can app by selecting contactless delivery, receiving the food, and then claiming it never arrived to get refunds.