ഗസ്സ സിറ്റി: വെടിനിർത്തൽ കരാർ ലംഘിച്ച് ഗസ്സയിൽ ആക്രമണം തുടരുന്നതിനിടെ കൂടുതൽ കരാർ ലംഘനവുമായി ഇസ്റാഈൽ. ബന്ദികളെ ഹമാസ് മോചിപ്പിക്കുന്നതിനു വേഗം പോരെന്ന് ആരോപിച്ച്, ബന്ദികളെ വേഗത്തിൽ മോചിപ്പിക്കുന്നതു വരെ കരാർ പ്രകാരം പ്രതിദിനം ഗസ്സയിലേക്കു കടത്തിവിടേണ്ട സഹായ ട്രക്കുകളിൽ പകുതിയും പിടിച്ചുവയ്ക്കുമെന്ന് ഇസ്‌റാഈൽ ഭീഷണിപ്പെടുത്തി. അതോടൊപ്പം ഈജിപ്തുമായി അതിർത്തി പങ്കിടുന്ന റഫ ക്രോസിങ് തുറക്കുന്നത് വൈകുമെന്നും മുന്നറിയിപ്പു നൽകി.

എന്നാൽ റഫ അതിർത്തി തുറക്കാൻ ഒരുക്കങ്ങൾ നടക്കുന്നതായും ഇന്നു തുറക്കുമെന്നും ഉദ്യോഗസ്ഥർ പറഞ്ഞു. നൂറുകണക്കിന് ട്രക്കുകൾ റഫ അതിർത്തിയിലെത്തിയതായി റിപ്പോർട്ടുണ്ട്. ഇന്നലെ 600 ട്രക്കുകൾ ഗസ്സയിലേക്കു കടത്തിവിടുമെന്നാണ് പറഞ്ഞിരുന്നത്. എന്നാൽ കരം ഷാലോം ഉൾപ്പെടെ മറ്റ് അതിർത്തികളിലൂടെയാണ് ഇപ്പോൾ ട്രക്കുകൾ ഗസ്സയിലെത്തുന്നത്. കുടിവെള്ളവും ഭക്ഷ്യവസ്തുക്കളും അവശ്യ സാധനങ്ങളും ഇന്ധനവും മരുന്നുകളുമടങ്ങിയ നിരവധി ട്രക്കുകൾ ഇന്നലെ ഗസ്സയിലെത്തി. 

ALSO READ: അവസാനിക്കാത്ത ക്രൂരത; ഗസ്സയിലേക്കുള്ള സഹായം നിയന്ത്രിക്കുമെന്ന് ഇസ്‌റാഈല്‍, ട്രക്കുകളുടെ എണ്ണം പകുതിയായി കുറച്ചു,  നാല് മൃതദേഹം കൂടി വിട്ടുനല്‍കി ഹമാസ്

വെടിനിർത്തലിനു ശേഷം ഗസ്സയിൽ ഇതുവരെ എത്തിയത് 130 സഹായ ട്രക്കുകളാണെന്ന് യു.എൻ വേൾഡ് ഫുഡ് പ്രോഗ്രാം അറിയിച്ചു.

ഇസ്റാഈൽ ആക്രമണം തുടരുന്നു

വെടിനിർത്തൽ നിലവിൽവന്ന് മൂന്നു ദിവസമായിട്ടും ഗസ്സയിൽ ഇസ്റാഈൽ സൈന്യം ഒറ്റപ്പെട്ട ആക്രമണം തുടരുകയാണ്. ഡ്രോണുകൾ ഉപയോഗിച്ചുള്ള ആക്രമണം ഗസ്സയിലേക്ക് തിരിച്ചെത്തുന്ന ഫലസ്തീനികളെ ലക്ഷ്യമിട്ടാണെന്നാണ് റിപ്പോർട്ട്. 24 മണിക്കൂറിനിടെ 19 ഫലസ്തീനികളുടെ മൃതദേഹങ്ങൾ ആശുപത്രികളിലെത്തിയതായി ഗസ്സ ആരോഗ്യ മന്ത്രാലയം അറിയിച്ചു. തടവുകാരുടെ കൈമാറ്റം നടക്കുന്നുണ്ടെങ്കിലും ഇപ്പോഴും ഗസ്സയിലെ നൂറിലേറെ ഡോക്ടർമാരും ആരോഗ്യ പ്രവർത്തകരും ഇസ്റാഈലി ജയിലുകളിലാണ്.

4 മൃതദേഹങ്ങൾകൂടി കൈമാറി ഹമാസ്

നാല് ഇസ്റാഈലി ബന്ദികളുടെ മൃതദേഹങ്ങൾ കൂടി ഹമാസ് ചൊവ്വാഴ്ച റെഡ് ക്രോസിനു കൈമാറി. ഇതോടെ ഹമാസ് കൈമാറിയ മൃതദേഹങ്ങൾ എട്ടായി. ഹമാസ് കൈമാറിയ നാലു മൃതദേഹങ്ങളിൽ മൂന്നെണ്ണവും ബന്ധുക്കൾ തിരിച്ചറിഞ്ഞു. എന്നാൽ നാലാമത്തേത് ബന്ദികളുടേതല്ലെന്ന് ഇസ്റാഈൽ അറിയിച്ചു. ഫലസ്തീനി സ്ത്രീയുടേതാണെന്നാണ് ഇസ്‌റാഈൽ പറയുന്നത്.

ഗസ്സ നഗരം പൂർണമായും തകർന്നടിഞ്ഞ അവസ്ഥയിലായതിനാൽ മരിച്ച ബന്ദികളുടെ മൃതദേഹാവശിഷ്ടങ്ങൾ കണ്ടെത്തി കൈമാറുകയെന്നത് വലിയ വെല്ലുവിളിയാണെന്ന് ഹമാസ് പറയുന്നു. ബന്ദികളിൽ മിക്കവരും ഇസ്റാഈലി സേനയുടെ വ്യോമാക്രമണത്തിലാണ് കൊല്ലപ്പെട്ടത്. ചില മൃതദേഹങ്ങളുള്ളത് ഇസ്റാഈൽ സേനയുടെ നിയന്ത്രണത്തിലുള്ള പ്രദേശങ്ങളിലാണെന്നും ഹമാസ് റെഡ് ക്രോസ് അധികൃതരെ അറിയിച്ചു.

ALSO READ: ഹമാസ് കമാന്‍ഡര്‍, ഫതഹ് നേതാവ്, സഹോദരങ്ങള്‍, മാധ്യമവ്രര്‍ത്തകര്‍... മോചിതരായവരില്‍ വൈവിധ്യങ്ങളേറെ; മൂന്നര പതിറ്റാണ്ട് ജയിലില്‍ കിടന്നവരും | The Story of Palestine Prisoners
ഗസ്സയിലുള്ള 21 ഇസ്റാഈലി ബന്ദികളുടെ മൃതദേഹങ്ങളും കൈമാറുകയെന്നത് വെടിനിർത്തൽ കരാറിലെ പ്രധാന ഉപാധികളിലൊന്നാണ്. ഇതോടൊപ്പം 360 ഫലസ്തീനികളുടെ മൃതദേഹങ്ങൾ ഹമാസിനും കൈമാറും. ചൊവ്വാഴ്ച 45 മൃതദേഹങ്ങളാണ് കൈമാറിയത്.

റഫ അതിർത്തിയുടെ നിയന്ത്രണം ഈജിപ്തിനു നൽകണമെന്നാണ് വെസ്റ്റ് ബാങ്ക് ഭരിക്കുന്ന ഫലസ്തീൻ അതോറിറ്റിയുടെ ആവശ്യം. ഹമാസ് അധികാരത്തിലെത്തിയതോടെ 2007ലാണ് ഇസ്റാഈൽ റഫ അടച്ചത്. റഫ അതിർത്തിയിൽ ദീർഘകാലാടിസ്ഥാനത്തിൽ ഇ.യു ബാം (ഇ.യു ബോർഡർ അസിസ്റ്റൻസ് മിഷൻ) സ്ഥാപിക്കാൻ സന്നദ്ധമാണെന്ന് യൂറോപ്യൻ യൂനിയൻ അറിയിച്ചു. 2005 മുതൽ അതിർത്തി അടയ്ക്കുന്നതുവരെ ഇ.യു സേന ആയിരുന്നു റഫ അതിർത്തി നിയന്ത്രിച്ചിരുന്നത്.