കൊച്ചി: കൊച്ചി കോർപറേഷന്റെ ഇടപ്പള്ളി സോണൽ ഓഫീസിലെ രണ്ട് ഉദ്യോഗസ്ഥർ കൈക്കൂലി വാങ്ങുന്നതിനിടെ വിജിലൻസിന്റെ പിടിയിൽ. സൂപ്രണ്ട് ലാലിച്ചനും ഇൻസ്പെക്ടർ മണികണ്ഠനുമാണ് അറസ്റ്റിലായത്. ഒരാളിൽ നിന്ന് 5000 രൂപയും മറ്റൊരാളിൽ നിന്ന് 2000 രൂപയും വിജിലൻസ് പിടിച്ചെടുത്തു.

അഭിഭാഷകനായ ഉമർ ഫാറൂഖ്, ഭൂമിയുടെ പേര് മാറ്റുന്നതിനായി 2025 മേയ് മാസം മുതൽ കോർപറേഷന്റെ ഇടപ്പള്ളി സോണൽ ഓഫീസുമായി ബന്ധപ്പെട്ടിരുന്നു. ഈ സമയത്താണ് ഉദ്യോഗസ്ഥർ കൈക്കൂലി ആവശ്യപ്പെട്ടത്. ഇതിനെതിരെ ഉമർ ഫാറൂഖ് വിജിലൻസിന് പരാതി നൽകി. പരാതിയുടെ അടിസ്ഥാനത്തിൽ നടത്തിയ പരിശോധനയിൽ, കൈക്കൂലി വാങ്ങുന്നതിനിടെ ലാലിച്ചനെയും മണികണ്ഠനെയും വിജിലൻസ് സംഘം പിടികൂടുകയായിരുന്നു.

കോർപറേഷനിലെ അഴിമതിക്കെതിരെ യൂത്ത് കോൺഗ്രസ് പ്രവർത്തകർ കോർപറേഷൻ ഓഫീസിലേക്ക് പ്രതിഷേധ മാർച്ച് നടത്തി. ഉദ്യോഗസ്ഥർക്കെതിരെ കർശന നടപടി ആവശ്യപ്പെട്ടാണ് മാർച്ച് സംഘടിപ്പിച്ചത്. അറസ്റ്റിലായ ഉദ്യോഗസ്ഥർക്കെതിരെ തുടർനടപടികൾ പുരോഗമിക്കുകയാണ്.