ന്യൂഡൽഹി: റഷ്യയിൽ നിന്നുള്ള എണ്ണ ഇറക്കുമതി നിർത്തുമെന്ന് പ്രധാനമന്ത്രി നരേന്ദ്ര മോദി ഉറപ്പ് നൽകിയെന്ന യുഎസ് പ്രസിഡന്റ് ഡൊണാൾഡ് ട്രംപിന്റെ വാദത്തിന് ഇന്ത്യയും റഷ്യയും ശക്തമായ മറുപടി നൽകി. ഇന്ത്യൻ ഉപഭോക്താക്കളുടെ താൽപ്പര്യങ്ങൾ സംരക്ഷിക്കുക എന്നതാണ് ഇന്ത്യയുടെ പ്രഥമ പരിഗണനയെന്ന് വിദേശകാര്യ മന്ത്രാലയം വ്യക്തമാക്കി. അതേസമയം, റഷ്യൻ എണ്ണ ഇന്ത്യൻ സമ്പദ്‌വ്യവസ്ഥയ്ക്ക് നിർണായകമാണെന്ന് റഷ്യയും പ്രതികരിച്ചു.

"ഇന്ത്യൻ സർക്കാരിന്റെ നയങ്ങൾക്കനുസരിച്ചാണ് ഞങ്ങൾ മുന്നോട്ടുപോകുന്നത്. ഈ നയങ്ങൾ ഇന്ത്യൻ ജനതയുടെയും ദേശീയ സമ്പദ്‌വ്യവസ്ഥയുടെയും താൽപ്പര്യങ്ങൾ പ്രതിഫലിപ്പിക്കുന്നു. ഈ ലക്ഷ്യങ്ങൾ ഇന്ത്യ-റഷ്യ ബന്ധത്തിന് വിരുദ്ധമല്ല. എണ്ണ, വാതക മേഖലകളിൽ ഇന്ത്യയുമായുള്ള സഹകരണം ഞങ്ങൾ തുടരും," റഷ്യ ഔദ്യോഗിക പ്രസ്താവനയിൽ അറിയിച്ചു.

"ഇന്ത്യ എണ്ണയുടെയും വാതകത്തിന്റെയും പ്രധാന ഇറക്കുമതിക്കാരാണ്. അസ്ഥിരമായ ഊർജ മേഖലയിൽ ഉപഭോക്താക്കളുടെ താൽപ്പര്യങ്ങൾ സംരക്ഷിക്കുകയാണ് ഞങ്ങളുടെ മുൻഗണന. ഞങ്ങളുടെ ഇറക്കുമതി നയങ്ങൾ ഈ ലക്ഷ്യത്തെ അടിസ്ഥാനമാക്കിയാണ് രൂപപ്പെടുത്തിയിരിക്കുന്നത്," വിദേശകാര്യ മന്ത്രാലയ വക്താവ് രൺധീർ ജയ്‌സ്വാൾ വ്യക്തമാക്കി.

"ഊർജ വിലയും സുരക്ഷിതമായ വിതരണവും ഉറപ്പാക്കുക എന്നതാണ് ഞങ്ങളുടെ ഊർജ നയത്തിന്റെ പ്രധാന ലക്ഷ്യങ്ങൾ. വിപണി സാഹചര്യങ്ങൾക്കനുസരിച്ച് ഊർജ സ്രോതസ്സുകൾ വിപുലീകരിക്കുകയും വൈവിധ്യവൽക്കരിക്കുകയും ചെയ്യുന്നത് ഈ നയത്തിന്റെ ഭാഗമാണ്," അദ്ദേഹം കൂട്ടിച്ചേർത്തു.

"കഴിഞ്ഞ ദശകത്തിൽ ഞങ്ങളുടെ ഊർജ സംഭരണം വികസിപ്പിക്കാൻ ഞങ്ങൾ ശ്രമിച്ചിട്ടുണ്ട്. ഇത് സ്ഥിരമായി പുരോഗമിച്ചു. നിലവിലെ യുഎസ് ഭരണകൂടവുമായി ഊർജ സഹകരണം കൂടുതൽ ആഴത്തിലാക്കാൻ ചർച്ചകൾ നടക്കുന്നുണ്ട്," വിദേശകാര്യ മന്ത്രാലയം വ്യക്തമാക്കി.

റഷ്യൻ എണ്ണ ഇറക്കുമതിയെ ട്രംപ് നിരന്തരം വിമർശിച്ചിരുന്നു. എന്നാൽ, ഇന്ത്യൻ പൗരന്മാർക്ക് ഏറ്റവും മികച്ച വില ലഭ്യമാക്കുക മാത്രമാണ് തങ്ങളുടെ ലക്ഷ്യമെന്ന് വിദേശകാര്യ മന്ത്രി ഡോ. എസ്. ജയശങ്കർ വ്യക്തമാക്കിയിരുന്നു. റഷ്യൻ എണ്ണ ഇറക്കുമതി തുടർന്നതിനാൽ, യുഎസ് ഇന്ത്യയ്ക്കെതിരെ ഇറക്കുമതി തീരുവ വർധിപ്പിക്കാനുള്ള നടപടികൾ സ്വീകരിച്ചിരുന്നു.