ബെംഗളൂരു: കര്‍ണാടക മന്ത്രിയും കോണ്‍ഗ്രസ് നേതാവുമായ പ്രിയങ്ക് ഖാര്‍ഗെക്കെതിരെ വധഭീഷണി മുഴക്കിയ പ്രതി പിടിയില്‍. ദാനപ്പ നരോണിനെന്ന യുവാവിനെയാണ് മഹാരാഷ്ട്ര പൊലിസിന്റെ സഹായത്തോടെ ബെംഗളൂരു പൊലിസ് അറസ്റ്റ് ചെയ്തത്. ആര്‍എസ്എസിനെ നിരോധിക്കണമെന്ന പ്രിയങ്ക് ഖാര്‍ഗെയുടെ പരാമര്‍ശത്തിന് പിന്നാലെയാണ് ഇയാള്‍ ഫോണില്‍ വിളിച്ച് വധഭീഷണി മുഴക്കിയത്. 

സര്‍ക്കാര്‍ സ്‌കൂളുകളിലും പൊതുസ്ഥലങ്ങളിലും ആര്‍എസ്എസ് പ്രവര്‍ത്തനം നിരോധിക്കണമെന്ന് ആവശ്യപ്പെട്ട് പ്രിയങ്ക് ഖാര്‍ഗെ മുഖ്യമന്ത്രി സിദ്ധരാമയ്യക്ക് കത്തെഴുതിയിരുന്നു. ആര്‍എസ്എസിന്റെ പ്രവര്‍ത്തനങ്ങള്‍ ഭരണഘടനയുടെ ആത്മാവിന് വിരുദ്ധമാണ് എന്നായിരുന്നു ഖാര്‍ഗെയുടെ പരാമര്‍ശം. കത്ത് പുറത്ത് വന്നതിന് പിന്നാലെയാണ് മന്ത്രിയെ പ്രതി ഫോണില്‍ വിളിച്ച് അസഭ്യം പറയുകയും, ഭീഷണിപ്പെടുത്തുകയും ചെയ്തത്. 

ഖാര്‍ഗെ നല്‍കിയ പരാതിയുടെ അടിസ്ഥാനത്തില്‍ ബെംഗളൂരു സദാശിവനഗര്‍ പൊലിസ് കേസെടുത്തു. പിന്നാലെ പ്രതി ഒളിവില്‍ പോയി. തുടര്‍ന്ന് മഹാരാഷ്ട്രര പൊലിസും ബെംഗളൂരു പൊലിസും സംയുക്തമായി നടത്തിയ ഓപ്പറേഷനിലാണ് പ്രതിയെ പിടികൂടിയത്. കോടതിയില്‍ നിന്ന് അനുമതി ലഭിച്ച ശേഷം പ്രതിയെ ബെംഗളൂരുവിലേക്ക് കൊണ്ടുവരുമെന്ന് സിറ്റി പൊലിസ് അറിയിച്ചു. 

ALSO READ: താമരശ്ശേരി ഡോക്ടർക്ക് വെട്ടേറ്റ സംഭവം: 9 വയസ്സുകാരിയുടെ മരണകാരണം അമീബിക് മസ്തിഷ്ക ജ്വരമല്ല; വൈറൽ ന്യുമോണിയെന്ന് പോസ്റ്റ്മോർട്ടം റിപ്പോർട്ട്

അതേസമയം ആർ.എസ്.എസിനെതിരെ ശക്തമായ സമീപനം സ്വീകരിക്കാനുള്ള തയ്യാറെടുപ്പിലാണ് കർണാടക. സർക്കാർ എയ്ഡഡ് സ്‌കൂളുകളുടെയും പൊതു മൈതാനങ്ങളുടെയും സംസ്ഥാന സർക്കാരിന്റെ മറ്റ് സംവിധാനങ്ങളുടേയും പരിസരത്ത് ആർ.എസ്.എസ് ശാഖാ യോഗങ്ങൾ നടത്തരുതെന്ന നിർദേശം മുന്നോട്ട് വെച്ചിരിക്കുകയാണ് കർണാടക മുഖ്യമന്ത്രി സിദ്ധരാമയ്യ. ആർ.എസ്.എസ് വിഷയത്തിൽ തമിഴ്‌നാട് സർക്കാർ എടുത്ത നിലപാടുകളെ കുറിച്ച് പഠിക്കാൻ ചീഫ് സെക്രട്ടറി ശാലിനി രജനീഷിനോട് മുഖ്യമന്ത്രി നിർദ്ദേശിച്ചതായും റിപ്പോർട്ടുകളുണ്ട് . സർക്കാർ ഓഫിസുകളിൽ സംഘടിപ്പിക്കുന്ന പ്രവർത്തനങ്ങൾ നിയന്ത്രിക്കാനുള്ള തമിഴ്‌നാട് സർക്കാരിന്റെ നീക്കത്തെക്കുറിച്ച് പഠിക്കാൻ ആവശ്യപ്പെട്ടതായി മുഖ്യമന്ത്രി സിദ്ധരാമയ്യ അറിയിച്ചു. 

accused who issued a death threat against Karnataka minister and Congress leader Priyank Kharge has been arrested.