വാഷിങ്ടൺ: യു.എസിൽ ട്രംപ് സർക്കാർ ഏർപ്പെടുത്തിയ നിയന്ത്രണങ്ങളിൽ പ്രതിഷേധിച്ച് സൈനിക ആസ്ഥാനമായ പെന്റഗണിൽ നിന്ന് മാധ്യമ റിപ്പോർട്ടർമാർ ഇറങ്ങിപ്പോയി. ഇതേത്തുടർന്ന് അമേരിക്കയിലെ എല്ലാ പ്രധാന മാധ്യമ സ്ഥാപനങ്ങളിൽ നിന്നുമുള്ള പെന്റഗൺ റിപ്പോർട്ടർമാരുടെ ബാഡ്ജുകൾ പ്രതിരോധ വകുപ്പ് കണ്ടുകെട്ടിയെന്ന് പെന്റഗൺ പ്രസ് അസോസിയേഷൻ അറിയിച്ചു.

ദേശീയ സുരക്ഷാ റിപ്പോർട്ടിങ്ങിനെ കുറ്റകൃത്യമാക്കുമെന്നും അതിൽ ഉൾപ്പെടുന്നവരെ പ്രോസിക്യൂഷന് വിധേയമാക്കുമെന്നുമുള്ള പുതിയ മാധ്യമ നയത്തിൽ ഒപ്പിടില്ലെന്ന് തീരുമാനിച്ചതിനെ തുടർന്നാണ് നടപടി. ക്ലാസിഫൈഡ് രേഖകൾ, ചില പ്രത്യേക വിവരങ്ങൾ എന്നിവ ആവശ്യപ്പെട്ടാൽ അവരെ സുരക്ഷാ ഭീഷണിയുള്ളവരായി മുദ്രകുത്താമെന്നും അവരുടെ പെന്റഗൺ പ്രസ് ബാഡ്ജുകൾ റദ്ദാക്കാമെന്നും ഉൾപ്പെടെയുള്ള പുതിയ നിയമങ്ങൾ പെന്റഗൺ റിപ്പോർട്ടർമാർ അംഗീകരിക്കണമെന്ന് നയം ആവശ്യപ്പെടുന്നു.

അസോസിയേറ്റഡ് പ്രസ്, ദ ഗാർഡിയൻ, ബ്ലൂംബർഗ്, ന്യൂയോർക്ക് ടൈംസ്, വാൾസ്ട്രീറ്റ് ജേണൽ, വാഷിങ്ടൺ പോസ്റ്റ്, റോയിട്ടേഴ്‌സ്, സി.എൻ.എൻ തുടങ്ങി 30ലേറെ മാധ്യമങ്ങളുടെ റിപ്പോർട്ടർമാരാണ് പെന്റഗൺ വിട്ടത്. ട്രംപ് സർക്കാരുമായി അടുത്ത ബന്ധം പുലർത്തുന്ന ഫോക്‌സ് ന്യൂസ്, ന്യൂസ് മാക്‌സ് എന്നിവയും പെന്റഗൺ വിട്ടു. പത്രസ്വാതന്ത്ര്യത്തിന്റെ ഇരുണ്ട ദിനമാണിതെന്ന് നൂറിലേറെ മാധ്യമസ്ഥാപനങ്ങൾ അംഗമായ പെന്റഗൺ പ്രസ് അസോസിയേഷൻ പറഞ്ഞു.  ലോകത്തിലെ ഏറ്റവും ശക്തമായ സൈന്യത്തിന്റെ സമഗ്രമായ കവറേജിന്റെ തടസപ്പെടുത്തലിനെ കുറിച്ച് മുന്നറിയിപ്പ് നൽകിക്കൊണ്ട് 30 മാധ്യമ സ്ഥാപനങ്ങളെങ്കിലും പത്രപ്രവർത്തകർക്കായുള്ള പുതിയ പെന്റഗൺ നയത്തിൽ ഒപ്പിടാൻ വിസമ്മതിച്ചു.