റിയാദ്: റിയാദിൽ റിയൽ എസ്റ്റേറ്റ് ചട്ടങ്ങൾ ലംഘിച്ചതിന് നിരവധി ഭൂവുടമകൾക്കെതിരെ സൗദി റിയൽ എസ്റ്റേറ്റ് ജനറൽ അതോറിറ്റി (റെഗ) നിയമനടപടി ആരംഭിച്ചു. ഭൂവുടമ-വാടകക്കാരൻ ബന്ധങ്ങളെ നിയന്ത്രിക്കുന്ന ചട്ടങ്ങളുടെ നിരവധി ലംഘനങ്ങൾ കണ്ടെത്തിയതിനെ തുടർന്ന് ആണിത്. റിയൽ എസ്റ്റേറ്റ് നിയന്ത്രണങ്ങളും നിയമനിർമ്മാണവും പാലിക്കുന്നുണ്ടെന്ന് ഉറപ്പുവരുത്തുന്നതിനും വാടക വിപണിയിൽ സന്തുലിതാവസ്ഥ കൈവരിക്കുന്നതിനുമുള്ള റെഗയുടെ തുടർച്ചയായ മേൽനോട്ട ശ്രമങ്ങളുടെ ഭാഗമാണിത് എന്ന് അധികൃതർ പ്രസ്താവനയിൽ പറഞ്ഞു.

ലഭിച്ച മൊത്തം പരാതികളുടെ എണ്ണം 268 ആണെന്നും അതിൽ 250 എണ്ണത്തിന് അനുബന്ധ രേഖകൾ പൂർത്തിയാക്കിയതായും 18 ഭൂവുടമകൾക്കെതിരെ ചട്ടങ്ങൾ ലംഘിച്ചതിന് നടപടിക്ക് തുടക്കമിട്ടതായും അതോറിറ്റി അറിയിച്ചു. തലസ്ഥാന നഗരയില്‍ അഞ്ചു വര്‍ഷത്തേക്ക് പാര്‍പ്പിട, വാണിജ്യ വാടക ഉയര്‍ത്തുന്നത് വിലക്കുന്ന മന്ത്രിസഭാ തീരുമാനം പരിഗണിക്കാതെ കെട്ടിടങ്ങൾക്ക് വാടക ഉയര്‍ത്തിയ ഉടമകൾക്ക് എതിരെ ആണ് നടപടി സ്വീകരിച്ചത്. റിയാദ് നഗരപരിധിയില്‍ റെസിഡന്‍ഷ്യല്‍, കൊമേഴ്സ്യല്‍ പ്രോപ്പര്‍ട്ടി വാടക കരാറുകളില്‍ വാര്‍ഷിക വാടക വര്‍ധനവ് സെപ്റ്റംബര്‍ 25 മുതല്‍ അഞ്ചു വര്‍ഷത്തേക്കാണ് താല്‍ക്കാലികമായി വിലക്കിയിരിക്കുന്നത്. നിലവിലുള്ള വാടക കരാറുകള്‍ക്കും പുതിയ കരാറുകള്‍ക്കും ഇത് ഒരുപോലെ ബാധകമാണ്. 

റിയാദ് നഗരത്തിലെ വാടക മൂല്യം ഉയർത്തുക, ഒഴിഞ്ഞുകിടക്കുന്ന സ്വത്തുക്കളുടെ വാടക അവസാനത്തെ വാടക കരാറിന്റെ മൂല്യത്തേക്കാൾ വർദ്ധിപ്പിക്കുക, "ഇജർ" പ്ലാറ്റ്ഫോം വഴി വാടക കരാറുകൾ രജിസ്റ്റർ ചെയ്യാതിരിക്കുക തുടങ്ങിയ ലംഘനങ്ങൾ ആണ് ഇവർ നടത്തിയത്. കൂടാതെ കരാർ പുതുക്കുന്നതിൽ നിന്ന് വിട്ടുനിൽക്കുകയോ വാടകക്കാരനെ ഒഴിഞ്ഞുപോകാൻ നിർബന്ധിക്കുകയോ ചെയ്ത പരാതികളും ഇവർക്കെതിരെ ഉണ്ട്.

നിയമം ലംഘിച്ച 11 റിയൽ എസ്റ്റേറ്റ് ബ്രോക്കർമാരെ റിയൽ എസ്റ്റേറ്റ് ബ്രോക്കറേജ് നിയമത്തിന്റെ ലംഘനങ്ങൾ അവലോകനം ചെയ്യുന്നതിനുള്ള കമ്മിറ്റിക്ക് റഫർ ചെയ്തിട്ടുണ്ട്. 

അംഗീകൃത നിയന്ത്രണ നടപടിക്രമങ്ങൾക്കനുസൃതമായാണ് എല്ലാ ലംഘനങ്ങളും പിന്തുടരുന്നതെന്നും റിയൽ എസ്റ്റേറ്റ് വിപണിയെ നിരീക്ഷിക്കുന്നതും ലംഘന സ്വഭാവം കണ്ടെത്തുന്നതും തുടരുകയാണെന്നും അതോറിറ്റി പറഞ്ഞു. വാടക ബന്ധങ്ങളെ നിയന്ത്രിക്കുന്ന നിയന്ത്രണ വ്യവസ്ഥകൾ പാലിക്കാനും എല്ലാ കരാറുകളും "ഇജർ" പ്ലാറ്റ്ഫോം വഴി രേഖപ്പെടുത്താനും അതോറിറ്റി ഭൂവുടമകളോടും കുടിയാന്മാരോടും റിയൽ എസ്റ്റേറ്റ് ബ്രോക്കർമാരോടും ആവശ്യപ്പെട്ടു.  

The Real Estate General Authority (REGA) has initiated legal action against a number of landlords for violating real estate regulations in Riyadh. This was after detecting several violations of regulations governing landlord-tenant relationships during the past period.