തൃശൂർ: സിനിമാ സംഗീത സംവിധായകൻ ഔസേപ്പച്ചൻ തൃശൂരിൽ ബിജെപി സംഘടിപ്പിച്ച പരിപാടിയിൽ എത്തി. ബിജെപി സംസ്ഥാന ഉപാധ്യക്ഷൻ ബി. ഗോപാലകൃഷ്ണൻ നയിക്കുന്ന ബിജെപി വികസന മുന്നേറ്റ ജാഥയുടെ വേദിയിലാണ് ഔസേപ്പച്ചൻ പങ്കെടുക്കുന്നത്. ഭാരതം നമ്മുടെ അമ്മയാണെന്നും നമ്മുടെ രാജ്യത്തിന് വേണ്ടി ഒറ്റക്കെട്ടായി പ്രവർത്തിക്കണമെന്നും പ്രസംഗത്തിൽ ഔസേപ്പച്ചൻ പറഞ്ഞു. രാജ്യത്തിന്റെ വളർച്ചയ്ക്ക് വേണ്ടി പ്രയത്നിക്കുന്ന ആളാണ് ബി ഗോപാലകൃഷ്ണനെന്നും ഔസേപ്പച്ചൻ ബിജെപി വേദിയിൽ പറഞ്ഞു. 

പിന്നാലെ, ഔസേപ്പച്ചനെ ബി. ഗോപാലകൃഷ്ണൻ ബിജെപിയിലേക്ക് ക്ഷണിച്ചു. വരുന്ന നിയമസഭാ തെരഞ്ഞെടുപ്പിൽ ബിജെപി സ്ഥാനാർഥിയായി മത്സരിക്കണമെന്നും ഗോപാലകൃഷ്‌ണൻ പറഞ്ഞു. ബിജെപിയുടെ വാതിൽ തുറന്നിട്ടിക്കുകയാണ്, ഒപ്പം അണിചേരണമെന്നും അദ്ദേഹം പറഞ്ഞു. മുണ്ട് പൊക്കി കാണിക്കുന്ന ആളുകളെ അല്ല, വികസനത്തിന്റെ കാഴ്ചപ്പാടിൽ പ്രവർത്തിക്കുന്ന ആളുകളെയാണ് കേരളത്തിന് ആവശ്യമെന്നും ബി. ഗോപാലകൃഷ്ണൻ പറഞ്ഞു. 

ഔസേപ്പച്ചനൊപ്പം രാഷ്ട്രീയ നിരീക്ഷകൻ എന്ന ലേബലിൽ ചാനൽ ചർച്ചകളിൽ എത്താറുള്ള ഇടത് സഹയാത്രികൻ ഫക്രുദ്ദീൻ അലിയും വേദിയിലെത്തിയിരുന്നു. ഫക്രുദ്ദീൻ അലിയെയും ഗോപാലകൃഷ്ണൻ ബിജെപിയിലേക്ക് ക്ഷണിച്ചു. പോസിറ്റീവ് രാഷ്ട്രീയം ഇഷ്ടപ്പെടുന്ന ആളാണ് താൻ എന്ന് പറഞ്ഞ ഫക്രുദ്ദീൻ അലി, കക്ഷി രാഷ്ട്രീയത്തിന് അപ്പുറം പരിപാടിയുടെ ആശയമാണ് തന്നെ ഈ വേദിയിലേക്ക് എത്തിച്ചത് എന്നും പറഞ്ഞു.  ബി ഗോപാലകൃഷ്ണൻ നല്ല നേതാവാണ് എന്നും അദ്ദേഹം കൂട്ടിച്ചേർത്തു.