കുവൈത്ത് സിറ്റി: രാജ്യത്തെ എല്ലാ പൊതുപാർക്കുകളിലും സിസിടിവി ക്യാമറകൾ സ്ഥാപിക്കാൻ ഒരുങ്ങി പബ്ലിക് അതോറിറ്റി ഫോർ അഗ്രികൾച്ചർ അഫയേഴ്‌സ് ആൻഡ് ഫിഷ് റിസോഴ്‌സസ് (PAAAFR). രാജ്യത്തെ പൊതു സൗകര്യങ്ങളുടെ സുരക്ഷയും സംരക്ഷണവും വർധിപ്പിക്കുന്നതിന്റെ ഭാഗമായാണ് ഈ നീക്കം. സന്ദർശകരെ നിരീക്ഷിക്കുക, അനുചിതമായ പെരുമാറ്റങ്ങൾ തടയുക, പൊതുമുതൽ നശിപ്പിക്കുന്നത് തടയുക എന്നിവ ലക്ഷ്യമിട്ടാണ് ഈ പദ്ധതി നടപ്പാക്കുന്നത്.

പദ്ധതിക്ക് ആവശ്യമായ ബജറ്റ് കണ്ടെത്തുന്നതാനായി ബന്ധപ്പെട്ട അധികാരികളുടെ അനുമതി കാത്തിരിക്കുകയാണ്. അടുത്ത വർഷം മുതൽ പദ്ധതി നടപ്പാക്കാനാണ് ലക്ഷ്യമിടുന്നതെന്നും ഔദ്യോ​ഗിക വൃത്തങ്ങൾ സൂചിപ്പിച്ചു. രാജ്യമെമ്പാടുമുള്ള പൊതുപാർക്കുകളുടെ നടത്തിപ്പ്, പരിപാലനം, മൊത്തത്തിലുള്ള അന്തരീക്ഷം എന്നിവ മെച്ചപ്പെടുത്താനുള്ള പദ്ധതിയുടെ ഭാഗമാണിത്. പാർക്കുകളുടെ പരിപാലനത്തിൽ സന്ദർശകരുടെ പെരുമാറ്റവും ഒരു പ്രധാന ഘടകമാണ്. മാലിന്യം വലിച്ചെറിയുക, പൊതുമുതൽ നശിപ്പിക്കുക തുടങ്ങിയ നിരവധി വെല്ലുവിളികളാണ് പാർക്കുകൾ നേരിടുന്നത്.

ALSO READ: യുഎഇയിൽ ഇന്ന് സ്വർണ വിലയിൽ ഇടിവ്

ഷുവൈഖ് ബീച്ചിൽ നടത്തിയ പൈലറ്റ് പ്രോജക്റ്റ് ഇതിന് ഉദാഹരണമായി അതികൃതർ ചൂണ്ടിക്കാട്ടുന്നു. അവിടെ നിരീക്ഷണ ക്യാമറകൾ സ്ഥാപിച്ചത് പൊതുമുതൽ നശിപ്പിക്കുന്നത് ഗണ്യമായി കുറയ്ക്കുകയും പാർക്കിലെ വൃത്തി വർധിപ്പികയും ചെയ്തു. ഈ വിജയം പിന്തുടർന്നാണ് രാജ്യത്തെ എല്ലാ പൊതുപാർക്കുകളിലേക്കും ക്യാമറ നിരീക്ഷണം വ്യാപിപ്പിക്കുന്നത്. മരം മുറിക്കൽ, ശുചിമുറികൾ, ജലസേചന സംവിധാനങ്ങൾ എന്നിവ കേടുവരുത്തൽ തുടങ്ങിയ വിഷയങ്ങളിൽ മെയിന്റനൻസ് കമ്പനികൾ നൽകിയ പരാതികളോടുള്ള പ്രതികരണം കൂടിയാണ് ഈ നടപടി.

ഇതിന് പുറമെ, അതോറിറ്റി മറ്റു പലപദ്ധതികളും പ്ലാൻ ചെയ്യുന്നുണ്ട്. സബാഹ് അൽ-അഹമ്മദ് സിറ്റി, ജാബർ അൽ-അഹമ്മദ് സിറ്റി, അബ്ദുള്ള അൽ-മുബാറക് ഏരിയ തുടങ്ങിയ പ്രദേശങ്ങളിൽ പുതിയ പൊതുപാർക്കുകൾ നിർമ്മിക്കുന്നതും ഇതിൽ ഉൾപ്പെടുന്നു. പൊതുമുതൽ സംരക്ഷണം മാത്രമല്ല, താമസക്കാർക്കും സന്ദർശകർക്കും സുരക്ഷിതവും ആസ്വാദ്യകരവുമായ അന്തരീക്ഷം ഒരുക്കുക കൂടിയാണ് ഇതിലൂടെ ലക്ഷ്യമിടുന്നതെന്നും പബ്ലിക് അതോറിറ്റി വ്യക്തമാക്കി.

Kuwait is planning to install CCTV cameras in all public parks to enhance security and protect public property. This move aims to ensure the safety of citizens and residents, as well as to prevent vandalism and other forms of misconduct in public spaces