കാൻബെറ: ഓസ്‌ട്രേലിയയ്‌ക്കെതിരായ നാലാം ടി20യിൽ ഇന്ത്യയ്ക്ക് 48 റൺസിന്റെ തകർപ്പൻ ജയം. ഇന്ത്യൻ സ്പിന്നർമാർ ഓസ്‌ട്രേലിയൻ ബാറ്റിംഗ് നിരയെ എറിഞ്ഞിട്ടതോടെ അഞ്ച് മത്സരങ്ങളുള്ള പരമ്പരയിൽ ഇന്ത്യ 2-1 ന്റെ നിർണ്ണായക ലീഡ് സ്വന്തമാക്കി.

കാരറ ഓവലിൽ നടന്ന മത്സരത്തിൽ ആദ്യം ബാറ്റ് ചെയ്ത ഇന്ത്യ, ശുഭ്മാൻ ഗില്ലിന്റെ (46) മികച്ച പ്രകടനത്തിന്റെ പിൻബലത്തിലാണ് 8 വിക്കറ്റ് നഷ്ടത്തിൽ 167 റൺസെടുത്തത്. ഓസ്‌ട്രേലിയക്കായി നഥാൻ എല്ലിസും ആദം സാംപയും മൂന്ന് വിക്കറ്റുകൾ വീതം വീഴ്ത്തി.

ALSO READ: ഏകദിനത്തിൽ മികച്ച പ്രകടനം നടത്താൻ ആ താരം എന്നെ സഹായിക്കണം: സൂര്യകുമാർ യാദവ് 

ഓസ്ട്രേലിയ 119-ന് ഓൾ ഔട്ട്

168 റൺസ് വിജയലക്ഷ്യവുമായി ഇറങ്ങിയ ഓസ്‌ട്രേലിയക്ക് ഇന്ത്യൻ സ്പിന്നർമാർക്ക് മുന്നിൽ പിടിച്ചുനിൽക്കാനായില്ല. കൃത്യതയാർന്ന ബൗളിംഗ് പ്രകടനത്തിലൂടെ ഓസ്‌ട്രേലിയൻ ബാറ്റ്‌സ്മാൻമാരെ ഇന്ത്യ വരിഞ്ഞുമുറുക്കി. 18.2 ഓവറിൽ വെറും 119 റൺസിന് ഓസ്‌ട്രേലിയ ഓൾ ഔട്ടായി.

ALSO READ: അഭിഷേകിനെ ഭയമില്ലാത്ത ബാറ്ററാക്കി മാറ്റിയത് അവർ രണ്ട് പേരുമാണ്: യുവരാജ് 

ഇന്ത്യൻ സ്പിന്നർമാരാണ് വിജയത്തിൽ നിർണ്ണായക പങ്ക് വഹിച്ചത്. വാഷിംഗ്ടൺ സുന്ദർ 1.2 ഓവറിൽ വെറും 3 റൺസ് മാത്രം വഴങ്ങി 3 വിക്കറ്റുകൾ വീഴ്ത്തി. അക്‌സർ പട്ടേലും ശിവം ദുബൈയും 2 വിക്കറ്റുകൾ വീതം നേടി. കേവലം 28 റൺസിനിടെയാണ് ഓസ്ട്രേലിയയ്ക്ക് അവസാന ഏഴ് വിക്കറ്റുകൾ നഷ്ടമായത്. 30 റൺസെടുത്ത ക്യാപ്റ്റൻ മിച്ചൽ മാർഷ് ആണ് ഓസ്‌ട്രേലിയയുടെ ടോപ് സ്കോറർ.

പരമ്പരയിൽ 2-1 ന് മുന്നിലെത്തിയതോടെ ഇന്ത്യ തോൽക്കില്ലെന്ന് ഉറപ്പായി. പരമ്പരയിലെ അഞ്ചാമത്തെയും അവസാനത്തെയും മത്സരം ശനിയാഴ്ച ബ്രിസ്‌ബേനിൽ നടക്കും.

team india delivered a dominant spin performance to outclass australia, securing a thumping win and taking a 2-1 lead in the series.