ദുബൈ: ദീർഘദൂര യാത്രകളിൽ ഉണർന്നിരിക്കാൻ കാപ്പിയെയും മറ്റ് എനർജി ഡ്രിങ്കുകളെയും അമിതമായി ആശ്രയിക്കുന്ന യുഎഇയിലെ ഡ്രൈവർമാർക്ക് കർശനമായ മുന്നറിയിപ്പുമായി ആരോഗ്യ വിദഗ്ധർ. കഫീൻ ജാഗ്രത വർദ്ധിപ്പിക്കുമെങ്കിലും, അതിന്റെ അമിത ഉപയോഗം ഡ്രൈവിംഗിലെ ഏകാഗ്രതയെയും പ്രതികരണ സമയത്തെയും പ്രതികൂലമായി ബാധിക്കുമെന്നും അത് റോഡപകടങ്ങൾക്ക് വഴിവെക്കുമെന്നും ഡോക്ടർമാർ ചൂണ്ടിക്കാട്ടുന്നു.

ദീർഘദൂര ഡ്രൈവിംഗിൽ പലരും ആശ്രയിക്കുന്ന ഉത്തേജകമാണ് കഫീൻ. എന്നാൽ, മിതത്വം പാലിച്ചില്ലെങ്കിൽ ഇത് വിപരീതഫലങ്ങൾ ഉണ്ടാക്കുമെന്ന് അൽ സഫയിലെ മെഡ്‌കെയർ ആശുപത്രിയിലെ ഇന്റർവെൻഷണൽ കാർഡിയോളജി സ്പെഷ്യലിസ്റ്റ് ഡോ. ജാൻ നിക്ലാസ് സ്ട്രിക്ലിംഗ് അഭിപ്രായപ്പെട്ടു.

"കഫീൻ രക്തക്കുഴലുകൾ ചുരുക്കുകയും 'അഡ്രിനാലിൻ' പോലുള്ള സമ്മർദ്ദ ഹോർമോണുകൾ വർദ്ധിപ്പിക്കുകയും ചെയ്യുന്ന ഒരു ഉത്തേജകമാണ്. ഇത് ഹൃദയമിടിപ്പും രക്തസമ്മർദ്ദവും വർദ്ധിപ്പിക്കും. അമിതമായി കഴിക്കുന്നത് ഹൃദയമിടിപ്പ്, ഉത്കണ്ഠ, വിറയൽ, അസ്വസ്ഥത എന്നിവയ്ക്ക് കാരണമാകും. ഇവയെല്ലാം ഡ്രൈവിംഗിലെ ശാന്തതയെയും ശ്രദ്ധയെയും ബാധിക്കും," ഡോ. സ്ട്രിക്ലിംഗ് വ്യക്തമാക്കി.

ALSO READ: ദുബൈ: മഴക്കാലത്ത് വൈദ്യുതി തടസം ഒഴിവാക്കാം: ചെയ്യേണ്ട 6 കാര്യങ്ങൾ വ്യക്തമാക്കി DEWA 

ക്ഷീണത്തെ മറയ്ക്കുന്നു, മാറ്റുന്നില്ല

ഉണർവിനായി കഫീനെ മാത്രം ആശ്രയിക്കുന്നത് അപകടകരമാണെന്നും ഡോക്ടർമാർ പറയുന്നു. കഫീൻ ക്ഷീണത്തെ മറച്ചുവെക്കുക മാത്രമാണ് ചെയ്യുന്നത്, അത് പൂർണമായി ഇല്ലാതാക്കുന്നില്ല. ഉത്തേജക പ്രഭാവം കുറഞ്ഞുകഴിയുമ്പോൾ ഏകാഗ്രതക്കുറവ്, നിർജ്ജലീകരണം, ക്ഷീണം എന്നിവ ഉണ്ടാകാനുള്ള സാധ്യത വർദ്ധിപ്പിക്കും.

"ക്ഷീണം ഒഴിവാക്കാൻ കഫീൻ മാത്രം ഉപയോഗിക്കുന്നതിന് പകരം, മിതമായ കഫീൻ ഉപയോഗം പതിവായ വിശ്രമ ഇടവേളകൾ, ധാരാളം വെള്ളം കുടിക്കൽ, ആരോഗ്യകരമായ ഭക്ഷണം എന്നിവയുമായി സംയോജിപ്പിക്കണം," ഡോ. സ്ട്രിക്ലിംഗ് ഉപദേശിച്ചു.

ഡെലിവറി സ്റ്റാഫ്, ദീർഘദൂര ഡ്രൈവർമാർ തുടങ്ങിയ പതിവായി കഫീൻ ഉപയോഗിക്കുന്നവർക്ക് 'കഫീൻ ക്രാഷുകൾ' ഉണ്ടാകാനുള്ള സാധ്യത കൂടുതലാണ്. കഫീൻ അളവ് പെട്ടെന്ന് കുറയുമ്പോൾ ഉണ്ടാകുന്ന ഊർജ്ജനഷ്ടം, ക്ഷോഭം, തലവേദന എന്നിവയെയാണ് 'കഫീൻ ക്രാഷ്' എന്ന് വിളിക്കുന്നത്. ഈ ലക്ഷണങ്ങൾ പ്രതികരണ സമയത്തെയും ഡ്രൈവിംഗിലെ ശ്രദ്ധയെയും ദോഷകരമായി ബാധിക്കും.

അമിതമായ കഫീൻ ഉപഭോഗം ഡ്രൈവിംഗ് പിഴവുകൾക്കും അപകടങ്ങൾക്കും സാധ്യത വർദ്ധിപ്പിക്കുമെന്ന് അബൂദബിയിലെ മെഡിയോർ ആശുപത്രിയിലെ സ്പെഷ്യലിസ്റ്റ് സൈക്യാട്രിസ്റ്റ് ഡോ. ബിനോ മേരി ചാക്കോ മുന്നറിയിപ്പ് നൽകി. "ഉയർന്ന അളവിൽ കഫീൻ കഴിക്കുമ്പോൾ അമിത ഉത്തേജനം മൂലം പ്രതികരണ സമയം വൈകുകയും വേഗതയെയും ദൂരത്തെയും കുറിച്ചുള്ള വിവേചനശേഷി കുറയുകയും ചെയ്യും," ഡോ. ചാക്കോ പറഞ്ഞു.

പ്രതിദിനം ഏകദേശം 400 മില്ലിഗ്രാം കഫീൻ (നാല് കപ്പ് ബ്രൂഡ് കോഫിക്ക് തുല്യം) സുരക്ഷിതമാണെന്ന് ഡോ. ചാക്കോ അഭിപ്രായപ്പെട്ടു. ഈ പരിധി കവിയുന്നത് ഉത്കണ്ഠ, പരിഭ്രാന്തി, ക്ഷോഭം, വിറയൽ, ഹൃദയമിടിപ്പ്, കഠിനമായ സന്ദർഭങ്ങളിൽ ഹൃദയസ്തംഭനം എന്നിവയ്ക്ക് കാരണമാകും.

medical experts in the uae have warned drivers that consuming coffee and energy drinks before driving can cause overstimulation and reckless speeding, increasing accident risks. doctors advise moderation and awareness about the side effects of caffeine and sugar overload.