മംഗലാപുരം: കള്ളപ്പണം വെളുപ്പിക്കല്‍ കേസില്‍ കാര്‍വാര്‍ എംഎല്‍എ സതീശ് കൃഷ്ണ സെയിലിയുടെ സ്വത്ത് ഇഡി കണ്ടുകെട്ടി. അനധികൃതമായി ഇരുമ്പയിര് കയറ്റുമതി ചെയ്തതുമായി ബന്ധപ്പെട്ട കേസിലാണ് 62 കോടിയുടെ സ്വത്ത് ഇഡി കണ്ടുകെട്ടിയത്. കഴിഞ്ഞ സെപ്റ്റംബറില്‍ എംഎല്‍എയെ ഇഡി അറസ്റ്റ് ചെയ്തിരുന്നു. പിന്നാലെ ആരോഗ്യ കാരണങ്ങള്‍ ചൂണ്ടിക്കാട്ടി ജാമ്യത്തില്‍ വിട്ടു. 

ഗോവ ആസ്ഥാനമായുള്ള ശ്രീ മല്ലികാര്‍ജുന്‍ ഷിപ്പിങ് പ്രൈവറ്റ് ലിമിറ്റഡ് എന്ന കമ്പനിയിലൂടെ സെയിലിന്റെ കൈവശമുള്ള ആസ്തികള്‍ ഉള്‍പ്പെടുത്തി കള്ളപ്പണം വെളുപ്പിക്കല്‍ തടയല്‍ നിയമം ചുമത്തിയാണ് ഇഡി നടപടി. ഗോവയില്‍ സെയിലിന്റെ ഉടമസ്ഥതയിലുള്ള 12,500 ചതുരശ്ര മീറ്റര്‍ ഭൂമി, സൗത്ത് ഗോവയിലെ 16,850 ചതുരശ്ര മീറ്റര്‍ കാര്‍ഷിക സ്വത്ത്, ഗോവ വാസ്‌കോഡഗാമയിലെ വാണിജ്യ കെട്ടിടം എന്നിവയും കണ്ടുകെട്ടിയതില്‍ ഉള്‍പ്പെടും. 

ALSO READ: പാഠപുസ്തകങ്ങളില്‍ ആര്‍എസ്എസ് വല്‍ക്കരണം; വെട്ടിമാറ്റിയ പാഠങ്ങള്‍ പഠിപ്പിക്കുമെന്ന് വി ശിവന്‍കുട്ടി 

സെയിലിയുമായി ബന്ധപ്പെട്ട കമ്പനി മുഖാന്തിരം നിയമവിരുദ്ധമായി ഇരുമ്പയിര് കയറ്റി അയച്ച കേസ് ഏറെ കോളിളക്കം സൃഷ്ടിച്ചിരുന്നു. 2010ല്‍ കര്‍ണാടക ലോകായുക്ത കേസ് അന്വേഷിച്ചപ്പോള്‍ ബെല്ലാരിയില്‍ നിന്ന് ബെലെക്കേരി തുറമുഖത്തേക്ക് ഏകദേശം എട്ട് ലക്ഷം ടണ്‍ ഇരുമ്പയിര് കടത്തിയതായാണ് ഇഡി കണ്ടെത്തല്‍. ഇവ എംവി കൊളംബിയ, എംവി മന്ദാരിന്‍ ഹാര്‍വെസ്റ്റ് തുടങ്ങിയ കപ്പലുകള്‍ വഴി ചൈനയിലേക്ക് കയറ്റുമതി ചെയ്തതായും ഹോങ്കോങ്ങില്‍ മറ്റൊരു കമ്പനി തുറന്നുവെന്നും ഇഡി പറയുന്നു.

in a money laundering case, the ed attached assets of karwar mla satish krishna saili. the 62-crore worth assets were seized in a case related to illegal iron ore exports.