എറണാകുളം: ആശുപത്രി പ്രവര്‍ത്തനങ്ങള്‍ക്ക് സുപ്രധാന മാര്‍ഗ നിര്‍ദേശവുമായി ഹൈക്കോടതി. ഇനിമുതല്‍ സേവനങ്ങള്‍ ചികിത്സാ നിരക്കുകള്‍ എന്നിവ ആശുപത്രിയുടെ റിസപ്ഷനിലും വെബ്‌സൈറ്റിലും പ്രദര്‍ശിപ്പിക്കണം. ആശുപത്രി റിസപ്ഷനിലും വെബ്‌സൈറ്റിലും മലയാളത്തിലും ഇംഗ്ലീഷിലും ചികിത്സ നിരക്കുകള്‍ വ്യക്തമായി പ്രദര്‍ശിപ്പിക്കണം. ഓരോ ചികിത്സയുടെയും കൃത്യമായ നിരക്കുകള്‍ രോഗികള്‍ക്കും ബന്ധുക്കള്‍ക്കും എളുപ്പത്തില്‍ മനസിലാക്കാന്‍ കഴിയണം എന്നും കോടതി നിര്‍ദ്ദേശിച്ചു.

അത്യാഹിത വിഭാഗത്തില്‍ എത്തുന്ന രോഗികളെ പരിശോധിച്ച് നില ഭദ്രമാക്കണം. പണമില്ല എന്ന പേരില്‍ ചികിത്സ നിഷേധിക്കരുത്. തുടര്‍ച്ചികിത്സ ആവശ്യമെങ്കില്‍ മറ്റൊരു ആശുപത്രിയിലേക്ക് മാറ്റേണ്ട ഉത്തരവാദിത്തം ആശുപത്രിക്കെന്നും കോടതി പറഞ്ഞു. രോഗികളെ ഡിസ്ചാര്‍ജ് ചെയ്യുമ്പോള്‍ പരിശോധന ഫലങ്ങളും റിപ്പോര്‍ട്ടുകളും രോഗിക്ക് കൈമാറണം എന്നും കോടതി.