കോഴിക്കോട്: തടമ്പാട്ടുതാഴം ഡിവിഷനില്‍ നിന്നും ജയിച്ച ഒ.സദാശിവന്‍ കോഴിക്കോട് കോര്‍പ്പറേഷന്‍ മേയറാകും. നിലവിലെ ആരോഗ്യസ്ഥിരം സമിതി അധ്യക്ഷ ഡോ.എസ്.ജയശ്രീ ഡെപ്യൂട്ടി മേയറാകും. കോട്ടൂളി ഡിവിഷനില്‍ നിന്നാണ് ജയശ്രീ ജയിച്ചത്. ഇന്ന് ചേര്‍ന്ന സിപിഎം യോഗത്തിലാണ് ഇതുസംബന്ധിച്ച് തീരുമാനമായത്. 

സിപിഎം കോഴിക്കോട് നോര്‍ത്ത് ഏരിയാ കമ്മറ്റി അംഗമാണ് സദാശിവന്‍. തിരുവനന്തപുരത്ത് നിന്നോ വ്യാഴാഴ്ച കോഴിക്കോട്ട് ചേരുന്ന എല്‍ഡിഎഫ് യോഗത്തിലോ ആവും ഔദ്യോഗിക തീരുമാനം അറിയിക്കുക.

നിലവില്‍ എല്‍ഡി എഫിന് കൗണ്‍സിലില്‍ ഇടതുമുന്നണിക്ക് കേവല ഭൂരിപക്ഷമില്ല. 76 അംഗ കൗണ്‍സിലില്‍ എല്‍ഡി എഫിന് 34 ഉം യുഡിഎഫിന് 26 ഉം എന്‍ഡിഎയ്ക്ക് 13 ഉം സീറ്റ് വീതമാണുള്ളത്.