തലശ്ശേരി: സിപിഎം പ്രവര്‍ത്തകനെ വധിക്കാന്‍ ശ്രമിച്ച നിയുക്ത ബിജെപി കൗണ്‍സിലര്‍ കുറ്റക്കാരനെന്ന് കോടതി. കൊമ്മല്‍വയല്‍ വാര്‍ഡ് കൗണ്‍സിലര്‍ യു. പ്രശാന്തിനെയാണ് കോടതി കുറ്റക്കാരനായി കണ്ടെത്തിയത്. പ്രശാന്തിനെ കൂടാതെ 10 ബിജെപി പ്രവര്‍ത്തകരും കുറ്റക്കാരാണെന്ന് തലശ്ശേരി അഡീഷണല്‍ സെഷന്‍സ് കോടതിയാണ് വിധി പുറപ്പെടുവിച്ചത്. 

പ്രതികള്‍ക്ക് 36 വര്‍ഷം തടവുശിക്ഷയാണ് കോടതി വിധിച്ചത്. പ്രതികള്‍ ഉയര്‍ന്ന ശിക്ഷയായ പത്തു വര്‍ഷം അനുഭവിച്ചാല്‍ മതിയാകും.

2007 ഡിസംബര്‍ 15-നാണ് പ്രതികള്‍ തലശ്ശേരി നഗരസഭ മുന്‍ കൗണ്‍സിലറും സിപിഎം പ്രവര്‍ത്തകനുമായ കൊമ്മല്‍വയലിലെ പി. രാജേഷിനെ വീട് ആക്രമിച്ച് വധിക്കാന്‍ ശ്രമിച്ചത്. പ്രതികള്‍ വീട് കയറി രാജേഷിനെയും സഹോദരനെയും പിതൃസഹോദരിയെയും ആക്രമിക്കുകയായിരുന്നു. ബോംബ് എറിഞ്ഞ് ഭീകാരന്തരീക്ഷം സൃഷ്ടിച്ച ശേഷം രാജേഷിനെ വെട്ടിക്കൊല്ലാനായിരുന്നു പ്രതികളുടെ ശ്രമം.