ഫുജൈറ: യുഎഇയിൽ തുടരുന്ന കനത്ത മഴയ്ക്കിടയിൽ ഫുജൈറയിലുണ്ടായ വാഹനാപകടത്തിൽ ഒരാൾക്ക് പരുക്കേറ്റു. ശക്തമായ മഴയിൽ ഷെയ്ഖ് ഖലീഫ സ്ട്രീറ്റിലൂടെ ഫുജൈറയിലേക്ക് വരികയായിരുന്ന കാർ നിയന്ത്രണം വിട്ട് മറിയുകയായിരുന്നു. അപകടത്തിൽ നിസ്സാര പരുക്കേറ്റ ഡ്രൈവറെ ഉടൻ തന്നെ ഫുജൈറ ആശുപത്രിയിൽ പ്രവേശിപ്പിച്ചു. ഫുജൈറ പൊലിസിലെ ട്രാഫിക് ആൻഡ് പട്രോൾസ് വകുപ്പ് ഡയറക്ടർ ബ്രിഗേഡിയർ സാലിഹ് മുഹമ്മദ് അബ്ദുല്ല അൽ ധൻഹാനിയാണ് ഇക്കാര്യം സ്ഥിരീകരിച്ചത്.

പ്രതികൂല കാലാവസ്ഥ കണക്കിലെടുത്ത് എമിറേറ്റിലുടനീളം അതീവ ജാഗ്രതാ നിർദ്ദേശമാണ് പൊലിസ് നൽകിയിരിക്കുന്നത്. റോഡുകളിലെ അപകടസാധ്യത കുറയ്ക്കുന്നതിനായി പ്രധാന പാതകളിലും വെള്ളക്കെട്ട് രൂപപ്പെടാൻ സാധ്യതയുള്ള ഇടങ്ങളിലും കൂടുതൽ പട്രോളിംഗ് സംഘങ്ങളെ വിന്യസിച്ചിട്ടുണ്ട്.

ALSO READ: യുഎഇയിൽ കനത്ത മഴയും ഇടിമിന്നലും: വിമാനങ്ങൾ റദ്ദാക്കി; അതീവ ജാഗ്രത തുടരുന്നു | uae heavy rain 

ഓപ്പറേഷൻസ് റൂം വഴി തത്സമയ നിരീക്ഷണം നടത്തി അടിയന്തര സാഹചര്യങ്ങളിൽ വേഗത്തിൽ ഇടപെടാൻ പ്രത്യേക സംഘങ്ങൾ സജ്ജമാണെന്ന് അധികൃതർ വ്യക്തമാക്കി. മഴയുള്ളപ്പോൾ വാഹനമോടിക്കുന്നവർ വേഗത കുറയ്ക്കണമെന്നും സുരക്ഷിതമായ അകലം പാലിക്കണമെന്നും മൊബൈൽ ഫോൺ ഉപയോഗിക്കുന്നത് ഒഴിവാക്കണമെന്നും പൊലിസ് കർശന നിർദ്ദേശം നൽകി.

മഴവെള്ളം നീക്കം ചെയ്യുന്നതിനായി ഫുജൈറ മുനിസിപ്പാലിറ്റിയും പൊലിസും ചേർന്ന് 24 മണിക്കൂറും പ്രവർത്തിക്കുന്ന വിപുലമായ സജ്ജീകരണങ്ങളാണ് ഒരുക്കിയിരിക്കുന്നത്. വെള്ളക്കെട്ട് ഒഴിവാക്കാൻ പുതുതായി അഞ്ച് വലിയ പമ്പുകൾ കൂടി അടിയന്തര സംവിധാനത്തിന്റെ ഭാഗമായി വിന്യസിച്ചു.

ALSO READ: കടൽക്ഷോഭവും കനത്ത മഴയും; ദുബൈ - ഷാർജ ഫെറി സർവിസുകൾ നിർ‍ത്തിവെച്ച് ആർടിഎ 

എമിറേറ്റിലെ 77 കിലോമീറ്ററോളം ദൈർഘ്യമുള്ള മഴവെള്ള ഡ്രെയിനേജ് ശൃംഖലയുടെ നിർമ്മാണം പൂർത്തിയായത് ജലസംഭരണം ഗണ്യമായി കുറയ്ക്കാൻ സഹായിക്കുമെന്ന് ഫുജൈറ മുനിസിപ്പാലിറ്റി ഡയറക്ടർ ജനറൽ എഞ്ചിനീയർ മുഹമ്മദ് സെയ്ഫ് അൽ അഫ്ഖാം അറിയിച്ചു. ലോക്കൽ എമർജൻസി ആൻഡ് ഡിസാസ്റ്റർ മാനേജ്‌മെന്റ് ടീമുമായി ചേർന്നാണ് നിലവിൽ ശുചീകരണ പ്രവർത്തനങ്ങൾ ഏകോപിപ്പിക്കുന്നത്.

A person was injured in a car accident in Fujairah amid ongoing heavy rains in the UAE. The car, which was coming towards Fujairah along Sheikh Khalifa Street, lost control and overturned during heavy rains. The driver, who suffered minor injuries in the accident, was immediately admitted to Fujairah Hospital. Brigadier Salih Mohammed Abdullah Al Dhanhani, Director of Traffic and Patrols Department at Fujairah Police, confirmed the incident.