കൊല്ലം: ശബരിമല സ്വര്‍ണക്കൊള്ളയില്‍ ഇഡി (എന്‍ഫോഴ്‌സ്‌മെന്റ് ഡയറക്ടറേറ്റ് കേസെടുത്ത് അന്വേഷിക്കും. കൊല്ലം വിജിലന്‍സ് കോടതിയുടേതാണ് ഉത്തരവ്. ഇഡിക്ക് മുഴുവന്‍ രേഖകളും നല്‍കാന്‍ കോടതി ഉത്തരവിട്ടു. 

റിമാന്‍ഡ് റിപ്പോര്‍ട്ടും എഫ്‌ഐആറും അടക്കമുള്ള രേഖകള്‍ ഇഡിക്ക് കൈമാറണം. 

കേസ് ഇഡിക്ക് കൈമാറുന്നതിന് എസ്.ഐ.ടി ശക്തമായി എതിര്‍പ്പ് അറിയിച്ചെങ്കിലും വിജിലന്‍സ് കോടതി തള്ളി. ഇഡി സമാന്തര അന്വേഷണം നടത്തുന്നതിനെ എസ്.ഐ.ടി എതിര്‍ത്തിരുന്നു.

വിവരങ്ങള്‍ കൈമാറുന്നതില്‍ കുഴപ്പമില്ല. എന്നാല്‍, ഇ.ഡി ആവശ്യപ്പെടുന്നപോലെ കള്ളപ്പണം വെളുപ്പിക്കല്‍ നിരോധന നിയമത്തിന്റെ പരിധിയില്‍ മാത്രമേ അന്വേഷണം പാടുള്ളുവെന്നാണ് കോടതിയില്‍ പ്രോസിക്യൂഷന്‍ വാദിച്ചത്. മറ്റു കുറ്റകൃത്യങ്ങളില്‍ ഇ.ഡി അന്വേഷണം നടത്തിയാല്‍ നിലവിലെ അന്വേഷണത്തെ ബാധിക്കുമെന്നും പ്രോസിക്യൂഷന്‍ കോടതിയില്‍ അറിയിച്ചിരുന്നു. കുറ്റകൃത്യങ്ങളിലൂടെ ലഭിച്ച തുകയെ സംബന്ധിച്ച അന്വേഷണത്തിനാണ് പകര്‍പ്പുകള്‍ ആവശ്യപ്പെടുന്നതെന്നായിരുന്നു ഇ.ഡിയുടെ അഭിഭാഷകന്റെ വാദം. 

നേരത്തെ ഹൈക്കോടതിയിലും കൊല്ലം വിജിലന്‍സ് കോടതിയിലും രേഖകള്‍ കൈമാറാന്‍ കഴിയില്ലെന്ന നിലപാടാണ് പ്രത്യേക അന്വേഷണ സംഘം സ്വീകരിച്ചത്. കഴിഞ്ഞ തവണ അപേക്ഷ പരിഗണിച്ചപ്പോള്‍ എതിര്‍വാദം രേഖമൂലം അറിയിക്കാന്‍ സമയം വേണമെന്ന് അന്വേഷണ സംഘം അറിയിച്ചിരുന്നു. ഇതേ തുടര്‍ന്നാണ് കേസ് ഇന്നലത്തേക്ക് മാറ്റിയത്. കള്ളപ്പണ ഇടപാട് നടന്നോ എന്ന് അറിയാനാണ് രേഖകള്‍ ഇ.ഡി ആവശ്യപ്പെട്ടത്.  

ഇ.ഡി അന്വേഷണം നടത്തിയാല്‍ കൂടുതല്‍ ഉന്നതര്‍ കുടുങ്ങുമെന്ന ഭയം സര്‍ക്കാരിനുണ്ട്. അത് തെരഞ്ഞെടുപ്പില്‍  പ്രതിപക്ഷം ആയുധമാക്കുമെന്ന വിലയിരുത്തലിനെ തുടര്‍ന്നാണ് നേരത്തെ എതിര്‍ത്തിരുന്നത്. തെരഞ്ഞെടുപ്പ് കഴിഞ്ഞതിനാല്‍ നിലപാട് മാറ്റുകയും ചെയ്തു. ഇപ്പോള്‍ രേഖകള്‍ കൊടുക്കുന്നതില്‍ കുഴപ്പമില്ല എന്ന നിലപാടാണ് സര്‍ക്കാരിനുള്ളത്.

കേസുകളില്‍ കള്ളപ്പണം വെളുപ്പിക്കല്‍ നിരോധന നിയമത്തിലെ ഐ.പി.സി 467ാം വകുപ്പ് ഉള്‍പ്പെടുത്തിയിട്ടുണ്ട്. ഇ.ഡി അസി. ഡയരക്ടര്‍ (കൊച്ചി സോണ്‍) ആഷു ഗോയലാണ് അപേക്ഷ നല്‍കിയത്.

The Enforcement Directorate (ED) will investigate the Sabarimala gold smuggling case following an order issued by the Kollam Vigilance Court. The court has directed that all relevant documents, including the FIR and remand report, be handed over to the ED to facilitate the probe.