കൊച്ചി: വിദേശത്തുനിന്ന് നെടുമ്പാശേരി വിമാനത്താവളത്തിൽ വന്നിറങ്ങിയ യുവാവിനെ തോക്കുചൂണ്ടി തട്ടിക്കൊണ്ടുപോയി കവർച്ച നടത്തിയ കേസിൽ അഞ്ച് പ്രതികളെ നെടുമ്പാശേരി പൊലിസ് അറസ്റ്റ് ചെയ്തു. കൊച്ചി സ്വദേശികളായ യുവാക്കളാണ് പിടിയിലായത്.

മട്ടാഞ്ചേരി പീടികപ്പറമ്പിൽ ആൻ്റണി നിസ്‌റ്റൽ കോൺ (20), ഫോർട്ട് കൊച്ചി ചിറപ്പുറം ഒന്നാരക്കാട്ടിൽ ഹംദാൻ ഹരീഷ് (21) ചുള്ളിക്കൽ മലയിൽ ബിബിൻ (26), പള്ളുരുത്തി രാമേശ്വരം തെക്കേവാരിയം വിഷ്‌ണു വിനോദ് (21), ഫോർട്ട് കൊച്ചി നസ്രത്ത് മൂലൻകുഴി പുല്ലൻതറ ജോയൽ ജോർജ് (22) എന്നിവരെയാണു സംഭവത്തിൽ നെടുമ്പാശേരി പൊലിസ് അറസ്‌റ്റ് ചെയ്തത്.

സംഭവത്തിന്റെ പശ്ചാത്തലം

കാസർഗോഡ് സ്വദേശിയായ മുഹമ്മദ് ഷാഫിയെയാണ് സംഘം വിമാനത്താവളത്തിന് പുറത്തുവെച്ച് തട്ടിക്കൊണ്ടുപോയത്. സ്വർണ്ണക്കടത്തുമായി ബന്ധപ്പെട്ട തർക്കങ്ങളും സാമ്പത്തിക ഇടപാടുകളുമാണ് ഈ അക്രമത്തിന് പിന്നിലെന്നാണ് പൊലിസിന്റെ പ്രാഥമിക നിഗമനം.യാത്രക്കാരന്റെ പക്കലുണ്ടായിരുന്ന ബാഗേജുകളും വിലപിടിപ്പുള്ള ഐഫോണും (iPhone) സംഘം കവർന്നു.തോക്കുചൂണ്ടി ഭീഷണിപ്പെടുത്തി വാഹനത്തിൽ കയറ്റിക്കൊണ്ടുപോയ ഷാഫിയെ പിന്നീട് വഴിയിൽ ഉപേക്ഷിക്കുകയായിരുന്നു.

അന്വേഷണ സംഘം

ഡിവൈഎസ്പി ടി.ആർ. രാജേഷ്, ഇൻസ്‌പെക്ടർ ആർ. രാജേഷ് എന്നിവരുടെ നേതൃത്വത്തിലുള്ള പ്രത്യേക സംഘമാണ് പ്രതികളെ വലയിലാക്കിയത്. എസ്ഐമാരായ എസ്.എസ്. ശ്രീലാൽ, പി.ടി. അനൂപ്, പി.ജി. സാബു, എഎസ്ഐ എം.വി. ബിനു, സിവിൽ പൊലീസ് ഓഫീസർമാരായ ജെയിംസ് ജോൺ, ഇ.എസ്. സജാസ്, സ്മിജിത്ത് ബാബു എന്നിവരും അന്വേഷണ സംഘത്തിലുണ്ടായിരുന്നു. പ്രതികളെ കോടതിയിൽ ഹാജരാക്കി റിമാൻഡ് ചെയ്തു.