ന്യൂഡൽഹി: ഇന്ത്യൻ ക്രിക്കറ്റിലെ വിസ്മയ ബാലൻ വൈഭവ് സൂര്യവംശി വീണ്ടും ചരിത്രം കുറിച്ചിരിക്കുന്നു. 2025-26 വിജയ് ഹസാരെ ട്രോഫിയിൽ അരുണാചൽ പ്രദേശിനെതിരെ ബീഹാറിന് വേണ്ടി കളിച്ച ഈ 14-കാരൻ, പക്വതയാർന്ന ബൗളർമാരെ നിഷ്പ്രഭരാക്കുന്ന പ്രകടനമാണ് കാഴ്ചവെച്ചത്. വെറും 84 പന്തിൽ നിന്ന് 190 റൺസ് അടിച്ചുകൂട്ടിയ വൈഭവ്, ലിസ്റ്റ്-എ ക്രിക്കറ്റിലെ പല വമ്പൻ റെക്കോർഡുകളും പഴങ്കഥയാക്കി.

മൈതാനത്ത് സിക്സർ മഴ

ബുധനാഴ്ച നടന്ന പ്ലേറ്റ് ഗ്രൂപ്പ് മത്സരത്തിൽ ആദ്യം ബാറ്റ് ചെയ്ത ബീഹാർ 50 ഓവറിൽ 574/6 എന്ന റെക്കോർഡ് സ്കോറാണ് നേടിയത്. വൈഭവിന്റെ ഇന്നിംഗ്സിലുടനീളം കണ്ടത് ആധുനിക ക്രിക്കറ്റിലെ വെടിക്കെട്ട് ബാറ്റിംഗായിരുന്നു.സ്ട്രൈക്ക് റേറ്റ് 226.19 എന്ന അവിശ്വസനീയ വേഗതയിൽ ബാറ്റ് വീശിയ താരം 16 ഫോറുകളും 15 സിക്സറുകളും പറത്തി.

റെക്കോർഡ് സിക്സറുകൾ

ഒരു ആഭ്യന്തര ലിസ്റ്റ്-എ മത്സരത്തിൽ ഒരു ഇന്ത്യൻ ബാറ്റ്സ്‌മാൻ നേടുന്ന ഏറ്റവും കൂടുതൽ സിക്സറുകൾ എന്ന റെക്കോർഡ് ഇതോടെ വൈഭവിന് സ്വന്തമായി.

ഡിവില്ലിയേഴ്സിനെ പിന്നിലാക്കി റെക്കോർഡ് വേഗത

ലോക ക്രിക്കറ്റിലെ അതികായന്മാരുടെ റെക്കോർഡുകൾ പോലും ഈ 14-കാരന് മുന്നിൽ വഴിമാറി.വെറും 59 പന്തിൽ നിന്നാണ് വൈഭവ് 150 റൺസ് തികച്ചത്. ഇതിഹാസ താരം എബി ഡിവില്ലിയേഴ്സിന്റെ (64 പന്ത്) റെക്കോർഡാണ് താരം മറികടന്നത്. 36 പന്തിൽ സെഞ്ച്വറി തികച്ച താരം, ലിസ്റ്റ്-എ ക്രിക്കറ്റിലെ വേഗതയേറിയ ആറാമത്തെ സെഞ്ച്വറിയും ഇന്ത്യക്കാരിലെ നാലാമത്തെ വേഗതയേറിയ സെഞ്ച്വറിയും സ്വന്തം പേരിലാക്കി.14 വയസ്സും 272 ദിവസവും മാത്രം പ്രായമുള്ളപ്പോൾ ലിസ്റ്റ്-എ സെഞ്ച്വറി നേടുന്ന ലോകത്തിലെ ഏറ്റവും പ്രായം കുറഞ്ഞ താരമായി വൈഭവ് മാറി.

"ലോക ക്രിക്കറ്റിനുള്ള മുന്നറിയിപ്പ്"

സമൂഹമാധ്യമങ്ങളിൽ വൈഭവിനെ പ്രശംസ കൊണ്ട് മൂടുകയാണ് ആരാധകർ. "ഇതൊരു വെറും ഇന്നിംഗ്‌സല്ല, ലോക ക്രിക്കറ്റിനുള്ള മുന്നറിയിപ്പാണ്" എന്നാണ് ഒരു ആരാധകൻ കുറിച്ചത്. 20 ഓവർ മത്സരങ്ങളിൽ പോലും ടീമുകൾ നേടാൻ പ്രയാസപ്പെടുന്ന 190 റൺസ്, 50 ഓവർ മത്സരത്തിൽ വൈഭവ് ഒറ്റയ്ക്ക് നേടിയത് അവിശ്വസനീയമാണെന്ന് ക്രിക്കറ്റ് ലോകം വിലയിരുത്തുന്നു.ഇന്ത്യൻ പ്രീമിയർ ലീഗിലെ പ്രായം കുറഞ്ഞ താരമെന്ന ഖ്യാതിക്ക് പിന്നാലെ ലിസ്റ്റ്-എ ക്രിക്കറ്റിലും തന്റെ ആധിപത്യം ഉറപ്പിച്ചിരിക്കുകയാണ് ഈ കൗമാര താരം.