അബൂദബി: യമനിലെ ശേഷിക്കുന്ന എല്ലാ ഭീകരവിരുദ്ധ യൂനിറ്റുകളും അവസാനിപ്പിച്ചതായി യു.എ.ഇ പ്രഖ്യാപിച്ചു. 2019ല്‍ തന്നെ അവിടത്തെ തങ്ങളുടെ സൈനിക സാന്നിധ്യം അവസാനിച്ചുവെന്നും അധികൃതര്‍ പറഞ്ഞു. യമനിലെ തീവ്രവാദ വിരുദ്ധ യൂനിറ്റുകളുടെ പ്രവര്‍ത്തനം അവസാനിപ്പിക്കാനുള്ള തീരുമാനം സ്വമേധയാ ഉള്ളതാണെന്നും ഉദ്യോഗസ്ഥരുടെ സുരക്ഷ ഉറപ്പാക്കുന്ന രീതിയിലും ബന്ധപ്പെട്ട പങ്കാളികളുമായി ഏകോപിപ്പിച്ചും എടുത്തതാണതെന്നും യു.എ.ഇ പ്രതിരോധ മന്ത്രാലയം പ്രസ്താവനയില്‍ പറഞ്ഞു. സമീപ കാല സംഭവ വികാസങ്ങളുടെയും ഭീകര വിരുദ്ധ ദൗത്യങ്ങളുടെ സുരക്ഷയ്ക്കും ഫലപ്രാപ്തിക്കും, അവ ചെലുത്താന്‍ സാധ്യതയുള്ള പ്രത്യാഘാതങ്ങളുടെയും വെളിച്ചത്തിലാണ് അതെന്നും പ്രസ്താവനയില്‍ വിശദീകരിച്ചു.
നിലവിലെ ഘട്ടത്തിലെ ആവശ്യകതകളെക്കുറിച്ചുള്ള സമഗ്രമായ വിലയിരുത്തലിന്റെ ഭാഗമായും മേഖലയിലെ സുരക്ഷയും സ്ഥിരതയും പിന്തുണയ്ക്കുന്നതില്‍ യു.എ.ഇയുടെ പ്രതിബദ്ധതയ്ക്കും അതിന്റെ പങ്കിനും അനുസൃതമായും ഈ നടപടി സ്വീകരിക്കുന്നുവെന്ന് പ്രതിരോധ മന്ത്രാലയം സ്ഥിരീകരിക്കുന്നു. യമനിലെ നിയമസാധുതയെ പിന്തുണച്ച് 2015 മുതല്‍ യു.എ.ഇ യമനിലെ അറബ് സഖ്യത്തില്‍ പങ്കെടുത്തിട്ടുണ്ടെന്നും ഔദ്യോഗിക ചട്ടക്കൂടുകള്‍ക്കുള്ളില്‍ സമ്മതിച്ച നിര്‍ദിഷ്ട ദൗത്യങ്ങള്‍ പൂര്‍ത്തിയാക്കിയ ശേഷം 2019ല്‍ യു.എ.ഇയുടെ സായുധ സേന യെമനില്‍ തങ്ങളുടെ സൈനിക സാന്നിധ്യം അവസാനിപ്പിച്ചതായും പ്രതിരോധ മന്ത്രാലയം സ്ഥിരീകരിച്ചു.
അന്താരാഷ്ട്ര പങ്കാളികളുമായി ഏകോപിപ്പിച്ച്, തീവ്രവാദ വിരുദ്ധ പ്രവര്‍ത്തനങ്ങളില്‍ ഏര്‍പ്പെട്ടിരുന്ന പ്രത്യേക ടീമുകളില്‍ മാത്രമേ സംഘങ്ങളുടെ ശേഷിക്കുന്ന സാന്നിധ്യം പരിമിതപ്പെടുത്തിയിരുന്നുള്ളൂ. ഈ ലക്ഷ്യങ്ങള്‍ കൈവരിക്കുന്നതിനായി യു.എ.ഇയുടെ മക്കള്‍ വലിയ ത്യാഗങ്ങള്‍ ചെയ്തിട്ടുണ്ട്. സഊദി അറേബ്യയുടെ പ്രസ്താവനയ്ക്ക് മറുപടിയായി, യെമനിലെ നിലവിലെ സ്ഥിതിയെക്കുറിച്ച് യു.എ.ഇ വിദേശകാര്യ മന്ത്രാലയം (മോഫ) ഇന്നലെ നേരത്തെ ഒരു പ്രസ്താവന ഇറക്കിയിരുന്നു. സഊദിയുടെ പ്രസ്താവനയിലുള്ള വസ്തുതാപരമായ ഗുരുതര പിശകുകള്‍ ചൂണ്ടിക്കാട്ടിയ മോഫ, യമന്‍ വിഭാഗങ്ങള്‍ക്ക് ആയുധങ്ങള്‍ നല്‍കിയെന്നോ, സംഘര്‍ഷങ്ങള്‍ വര്‍ധിപ്പിക്കുന്നതിന് കാരണമായെന്നോ ഉള്ള അവകാശവാദങ്ങള്‍ നിഷേധിച്ചു.
യമന്‍ സംഘര്‍ഷത്തിന് ഇന്ധനം പകരുന്നുവെന്ന ആരോപണങ്ങള്‍ യു.എ.ഇ പൂര്‍ണമായും തള്ളിക്കളയുന്നുവെന്നും സ്ഥിരീകരിച്ചു. യമനിലെ മുകല്ല തുറമുഖത്ത് നടന്ന ഒരു സംഭവത്തെക്കുറിച്ചുള്ള സഊദിയുടെ പ്രസ്താവന അറബ് സഖ്യത്തിലെ അംഗ രാജ്യങ്ങളുമായി കൂടിയാലോചിക്കാതെയാണ് നടത്തിയതെന്നും യു.എ.ഇ പറഞ്ഞു.
സഊദി നേതൃത്വത്തിലുള്ള സഖ്യ സേനക്കായുള്ള ഒരു ഷിപ്‌മെന്റ് സംബന്ധിച്ചും പ്രസ്താവന സ്ഥിരീകരണം നല്‍കി. സഊദി പ്രസ്താവനയില്‍ പരാമര്‍ശിച്ച പ്രസ്തുത ഷിപ്‌മെന്റില്‍ ആയുധങ്ങളൊന്നും ഉണ്ടായിരുന്നില്ല. അതില്‍ പരാമര്‍ശിച്ച വാഹനങ്ങള്‍ ഒരു യെമന്‍ കക്ഷിക്കും അനുവദിച്ചതല്ലെന്നും മറിച്ച് യെമനില്‍ പ്രവര്‍ത്തിക്കുന്ന യു.എ.ഇ സേനയുടെ ഉപയോഗത്തിനായി അയച്ചതാണെന്നും പ്രസ്താവന വ്യക്തമാക്കി. യു.എ.ഇ പരിശോധനകള്‍ പൂര്‍ത്തിയാക്കുന്നതു വരെ വാഹനങ്ങള്‍ തുറമുഖത്ത് തന്നെ തുടരുമെന്ന് യു.എ.ഇയും സഊദി അറേബ്യയും തമ്മില്‍ കരാറിലേര്‍പ്പെട്ടിട്ടുണ്ടെന്നും പ്രസ്താവന കൂട്ടിച്ചേര്‍ത്തു.