തിരുവനന്തപുരം: ബിസ്മീറിന്റെ ചികിത്സയില്‍ പിഴവ് സംഭവിച്ചിട്ടില്ലെന്ന് വിളപ്പില്‍ ശാല ആരോഗ്യ കേന്ദ്രം. ബിസ്മിറിനെ ചികിത്സിക്കുന്നതില്‍ പിഴവ് സംഭവിച്ചിട്ടില്ലെന്ന് വിളപ്പില്‍ ശാല മെഡിക്കല്‍ ഓഫിസര്‍ ഇന്‍ചാര്‍ജ് ഡോ.എല്‍.രമ വ്യക്തമാക്കി. 

19 -ാം തിയതി പുലര്‍ച്ചെ സാമൂഹികാരോഗ്യ കേന്ദ്രത്തില്‍ എത്തിച്ച ബിസ്മിറിന് ഓക്‌സിജന്‍ വെന്റിലേഷനും നെബുലൈസേഷനും ഇഞ്ചക്ഷനും സാമൂഹികാരോഗ്യ കേന്ദ്രത്തില്‍ നിന്ന് നല്‍കിയിട്ടുണ്ടെന്നാണ് അവര്‍ അവകാശപ്പെട്ടത്.  16-ാം തിയതി ഇയാള്‍ ശ്വാസ തടസത്തെതുടര്‍ന്ന് സാമൂഹികാരോഗ്യ കേന്ദ്രത്തില്‍ എത്തിയിരുന്നു.  ഫിസിഷ്യനെ കാണിക്കാന്‍ ഡോക്ടര്‍ അന്നു തന്നെ നിര്‍ദേശം നല്‍കിയിരുന്നുവെന്നും ഡോ എല്‍ രമ പറഞ്ഞതായി സ്വകാര്യചാനല്‍ റിപ്പോര്‍ട്ട് ചെയ്യുന്നു. 

ALSO READ: ആശുപത്രിയിലെത്തിയത് ശ്വാസമെടുക്കാന്‍ പോലുമാകാത്ത അവസ്ഥയില്‍, എന്നിട്ടും  ഡോക്ടര്‍ എത്തിയില്ല, സ്വിഗ്ഗി ജീവനക്കാരന്റെ മരണത്തില്‍ വിളപ്പില്‍ ശാല ആശുപത്രിക്കെതിരെ പരാതി

അതേസമയം ചികിത്സാപ്പിഴവ് ആരോപണത്തില്‍ കുടുംബം ഇന്ന് ജില്ലാ മെഡിക്കല്‍ ഓഫിസര്‍ക്ക് പരാതി നല്‍കുമെന്നാണ് സൂചന. ഇ-മെയില്‍ മുഖേനയായിരിക്കും പരാതി നല്‍കുക.

ജനുവരി 19 ന് പുലര്‍ച്ചെ ഒന്നരമണിയോടെയാണ് ബിസ്മീറും ഭാര്യയും ആശുപത്രിയില്‍ എത്തുന്നത്.  
എന്നാല്‍ രോഗിയെ എത്തിച്ചിട്ടും ഡോക്ടര്‍മാരോ നഴ്‌സോ എത്താനോ പ്രാഥമിക ചികിത്സ നല്‍കാനോ തയ്യാറായില്ലെന്ന് കാണിക്കുന്ന ദൃശ്യങ്ങള്‍ കഴിഞ്ഞ ദിവസം പുറത്തു വന്നിരുന്നു.

ഗുരുതരാവസ്ഥയില്‍ രോഗി എത്തിയതിനുശേഷം പുറത്ത് കാത്തുനില്‍ക്കുന്നത് ദൃശ്യങ്ങളില്‍ കാണാം. ഇരിക്കാന്‍ പോലുമാവാതെ ഇയാള്‍ സാഹസപ്പെടുന്നതും സഹായത്തിനായി ഭാര്യ ഓടിനടക്കുന്നതും വ്യക്തമാണ്.  ബിസ്മീറിന് ശ്വാസമെടുക്കാന്‍ സാധിക്കാതെ ഗുരുതരാവസ്ഥയില്‍ ആശുപത്രിയില്‍ എത്തിയിട്ടും അധികൃതര്‍ ഗ്രില്‍ തുറന്നുകൊടുക്കാന്‍ തയ്യാറാവുന്നില്ല. 

അതേസമയം, പട്ടി കയറുന്നതിനാലാണ് ആശുപത്രിയുടെ ഗേറ്റ് പൂട്ടിയിട്ടത് എന്നണ് ആശുപത്രി അധികൃതരുടെ വിശദീകരണം. വേണ്ട ചികിത്സ നല്‍കിയിട്ടുണ്ടെന്നും വീഴ്ചയുണ്ടായിട്ടില്ലെന്നുമാണ് ആശുപത്രി സൂപ്രണ്ട് വ്യക്തമാക്കുന്നത്.

വിളപ്പില്‍ശാലയില്‍ നിന്നും തിരുവനന്തപുരം മെഡിക്കല്‍ കോളജിലേക്ക് ബിസ്മീറിനെ എത്തിച്ചിരുന്നു. എന്നാല്‍ 20 മിനിട്ട് മുന്നേ രോഗി മരിച്ചു എന്നാണ് അധികൃതര്‍ കുടുംബത്തെ അറിയിച്ചത്.  സ്വിഗ്ഗി ജീവനക്കാരനായിരുന്നു കൊല്ലംകൊണം സ്വദേശിയായ ബിസ്മീര്‍(37).

vilappilshala health centre denies any medical negligence in the treatment of bismira, while the family plans to submit a complaint to the district medical officer.