തിരുവനന്തപുരം: തലസ്ഥാനത്ത് പൊലിസ് സേനയ്ക്ക് തന്നെ നാണക്കേടുണ്ടാക്കുന്ന സംഭവം. കഴക്കൂട്ടം പൊലിസ് സ്റ്റേഷന് മുന്നിൽ നിർത്തിയിട്ട കാറിനുള്ളിലിരുന്ന് മദ്യപിച്ച ആറ് പൊലിസ് ഉദ്യോഗസ്ഥർക്കെതിരെ അന്വേഷണത്തിന് ഉത്തരവിട്ടു. സ്പെഷ്യൽ ബ്രാഞ്ച് എസ്.പി പ്രമോദ് കുമാറാണ് സംഭവത്തിൽ അടിയന്തര അന്വേഷണം നടത്തി റിപ്പോർട്ട് നൽകാൻ നിർദ്ദേശിച്ചത്.

സ്റ്റേഷനിലെ ഉദ്യോഗസ്ഥനായ സിവിൽ പൊലിസ് ഓഫീസറുടെ സ്വകാര്യ സ്കോർപിയോ കാറിനുള്ളിലിരുന്നായിരുന്നു സംഘം മദ്യപിച്ചത്. സ്റ്റേഷനിൽ പരാതി നൽകാനെത്തിയ ഒരു വ്യക്തിയാണ് ഈ ദൃശ്യങ്ങൾ മൊബൈൽ ഫോണിൽ പകർത്തിയത്.

ALSO READ: ധനരാജ് രക്തസാക്ഷി ഫണ്ട് വിവാദം: ജനങ്ങളിൽ നിന്നും സമാഹരിച്ച പണത്തിന്റെ കണക്കുകൾ പുറത്തുവിടില്ല; കണക്കുകൾ പാർട്ടിയിൽ മാത്രമെന്ന് കണ്ണൂർ ജില്ലാ സെക്രട്ടറി

സ്റ്റേഷന് തൊട്ടുമുന്നിൽ പാർക്ക് ചെയ്തിരുന്ന കാറിനുള്ളിൽ യൂണിഫോമിലും അല്ലാതെയും ഉദ്യോഗസ്ഥർ മദ്യപിക്കുന്ന ദൃശ്യങ്ങൾ സമൂഹമാധ്യമങ്ങളിൽ പ്രചരിച്ചതോടെയാണ് ഉന്നത ഉദ്യോഗസ്ഥർ ഇടപെട്ടത്. പരാതിക്കാരുടെ മുന്നിൽ മാതൃകയാകേണ്ട നിയമപാലകർ തന്നെ പരസ്യമായി മദ്യപിച്ചത് സേനയ്ക്കുള്ളിൽ വലിയ അതൃപ്തിക്ക് കാരണമായിട്ടുണ്ട്. സംഭവത്തെക്കുറിച്ച് വിശദമായ റിപ്പോർട്ട് സമർപ്പിക്കാൻ സ്പെഷ്യൽ ബ്രാഞ്ച് എസ്.പി നിർദ്ദേശിച്ചു. കുറ്റക്കാരെന്ന് കണ്ടെത്തുന്നവർക്കെതിരെ കർശനമായ അച്ചടക്ക നടപടി സ്വീകരിക്കും എന്നും സ്പെഷ്യൽ ബ്രാഞ്ച് എസ്.പി വ്യക്തമാക്കി.

ALSO READ: സഹപ്രവർത്തകയെ കൊലപ്പെടുത്തി; ശിരസ്സറ്റ മ‍ൃതദേഹം ചാക്കിലാക്കി പാലത്തിൽ നിന്ന് വലിച്ചെറിഞ്ഞു; യുവാവ് അറസ്റ്റിൽ

ലഭിച്ച ദൃശ്യങ്ങളുടെ അടിസ്ഥാനത്തിൽ മദ്യപാന സംഘത്തിലുണ്ടായിരുന്ന മുഴുവൻ ഉദ്യോഗസ്ഥരെയും തിരിച്ചറിയാനുള്ള ശ്രമത്തിലാണ് അന്വേഷണ സംഘം. സ്പെഷ്യൽ ബ്രാഞ്ച് റിപ്പോർട്ട് ലഭിച്ചാലുടൻ സസ്പെൻഷൻ അടക്കമുള്ള നടപടികളിലേക്ക് നീങ്ങാനാണ് സാധ്യത.

An investigation has been launched after six police officers were caught drinking alcohol inside a private Scorpio SUV parked right in front of the Kazhakkoottam police station in Thiruvananthapuram. The incident came to light after a visitor at the station filmed the officers and the footage went viral. Following the breach of discipline, the Special Branch SP has ordered a formal probe into the matter to identify the officers and initiate disciplinary action.