ഉപയോക്താക്കള്‍ക്ക് ഇഷ്ടപ്പെടുന്ന തരത്തിലുള്ള മാറ്റങ്ങള്‍ കൊണ്ടുവരുകയാണ് യൂട്യൂബ്. ഇപ്പോഴിതാ മറ്റൊരു റിപ്പോര്‍ട്ട് കൂടി പുറത്തുവന്നിരിക്കുകയാണ്. ടീനേജേഴ്‌സിന് അനുയോജ്യമായിട്ടുള്ള രീതിയില്‍ യൂട്യൂബ് അപ്‌ഡേറ്റ് ചെയ്യുന്നതായി അറിയിച്ചിരിക്കുകയാണ് നിര്‍മ്മാതാക്കള്‍. ഇഷ്ടാനുസൃത ബെഡ്‌ടൈം, ടേക്ക് എ ബ്രേക്ക് റിമൈന്‍ഡറുകള്‍, ഉയര്‍ന്ന നിലവാരമുള്ള കൗമാരക്കാരുടെ ഉള്ളടക്കത്തിനായുള്ള ബ്ലൂപ്രിന്റ്, ഉചിതമായ പ്രായത്തിനനുസരിച്ച് ശരിയായ അനുഭവം ക്യൂറേറ്റ് ചെയ്യല്‍ എന്നിവ പോലുള്ള നിയന്ത്രണങ്ങള്‍ കൊണ്ടുവരുന്നതായാണ് റിപ്പോര്‍ട്ടുകള്‍.

മാതാപിതാക്കള്‍ക്ക് നിയന്ത്രിക്കാന്‍ കഴിയുന്ന വിധത്തിലാണ് പുതിയ യുട്യൂബ് അപ്‌ഡേറ്റ് സജ്ജീകരിച്ചിട്ടുള്ളത്. ഷോര്‍ട്ട്‌സിന്റെ സ്‌ക്രോള്‍ ചെയ്യുന്ന സമയം നിയന്ത്രിക്കാന്‍ കഴിയും. യൂട്യൂബ് പ്രൊഡക്ഷന്‍ മാനേജ്‌മെന്റ് വൈസ് പ്രസിഡന്റ് ജെന്നിഫര്‍ ഫ്‌ലാനറി ഒ'കോണര്‍ ബ്ലോഗ് പോസ്റ്റില്‍ പറഞ്ഞു. ഉടന്‍ തന്നെ ടൈമര്‍ സജ്ജീകരിക്കാനുള്ള ഓപ്ഷന്‍ മാതാപിതാക്കള്‍ക്ക് കാണാനാകുമെന്ന് അവര്‍ കൂട്ടിച്ചേര്‍ത്തു. കുട്ടികള്‍ കാണുന്ന ഹ്രസ്വരൂപത്തിലുള്ള ഉള്ളടക്കത്തിന്റെ സമയം മാതാപിതാക്കള്‍ക്ക് കര്‍ശനമായി നിയന്ത്രിക്കാന്‍ കഴിയുന്ന ആദ്യത്തേതാണിത്.

യൂട്യൂബ് ഉപയോഗിച്ച് കുട്ടികള്‍ പഠിക്കുകയാണെങ്കില്‍ മാതാപിതാക്കള്‍ക്ക് ഷോര്‍ട്ട്‌സ് ഫീഡ് പരിധി പൂജ്യമായി സജ്ജീകരിക്കാന്‍ കഴിയും. കൂടാതെ, രക്ഷിതാക്കള്‍ക്ക് ഇഷ്ടാനുസൃതമായി ബെഡ്‌ടൈം, ടേക്ക് എ ബ്രേക്ക് റിമൈന്‍ഡറുകള്‍ സജ്ജീകരിക്കാന്‍ കഴിയുമെന്ന് കമ്പനി പറഞ്ഞു.