ആലപ്പുഴ: എസ്എന്‍ഡിപിയുമായുള്ള ഐക്യത്തില്‍ നിന്ന് എന്‍എസ്എസ് പിന്മാറിയ സാഹചര്യത്തില്‍ എല്ലാം അറിഞ്ഞ ശേഷം പ്രതികരിക്കാമെന്ന് വെള്ളാപ്പള്ളി നടേശന്‍. എന്‍എസ്എസ് പിന്മാറ്റത്തെ കുറിച്ച് ഒരു അറിയിപ്പും ലഭിച്ചിട്ടില്ലെന്ന് വെള്ളാപ്പള്ളി നടേശന്‍ പറഞ്ഞു. ഇതുസംബന്ധിച്ച് മാധ്യമങ്ങളിലൂടെ അറിഞ്ഞതേയുള്ളൂ. അതിന്റെ അടിസ്ഥാനത്തില്‍ മറുപടി പറയുന്നത് ശരിയല്ലെന്നും വെള്ളാപ്പള്ളി. കാര്യങ്ങള്‍ പൂര്‍ണമായി അറിഞ്ഞ ശേഷം മറുപടി പറയാം. ചോദ്യങ്ങളും മറുപടികളും ഇപ്പോള്‍ അപ്രസക്തമാണ്. കുറച്ചുകഴിയട്ടെ' വെള്ളാപ്പള്ളി നടേഷന്‍ കൂട്ടിച്ചേര്‍ത്തു.

പെരുന്നയില്‍ എന്‍എസ്എസ് ബോര്‍ഡ് ചേര്‍ന്ന യോഗത്തിലാണ് ഐക്യം പ്രായോഗികമല്ലെന്ന എന്‍എസ്എസ് തീരുമാനം. ഐക്യനീക്കം എന്‍എസ്എസ് ഡയറക്ടര്‍ ബോര്‍ഡ് തള്ളുകയും ചെയ്തു.പലതവണ എന്‍എസ്എസ്എസ്എന്‍ഡിപി ഐക്യശ്രമം വിജയിക്കാത്ത സാഹചര്യത്തില്‍ വീണ്ടും ഒരു ഐക്യം ഇപ്പോഴത്തെ രാഷ്ട്രീയ സാഹചര്യത്തില്‍ പരാജയം ആകുമെന്ന് എന്‍എസ്എസ് വ്യക്തമാക്കി.

എന്‍എസ്എസിന്റെ അടിസ്ഥാന മൂല്യങ്ങളില്‍ നിന്നും വ്യതിചലിക്കാന്‍ സാധിക്കില്ലെന്നും അതിനാല്‍ വീണ്ടും ഐക്യം പ്രായോഗികമല്ലെന്നും എന്‍എസ്എസിനോട് എല്ലാ രാഷ്ട്രീയ പാര്‍ട്ടികളോടും സമദൂര നിലപാടാണ് ഉള്ളതെന്നും മറ്റെല്ലാ സമുദായങ്ങളോടും പോലെ എസ്എന്‍ഡിപിയോടും സമവായത്തില്‍ വര്‍ത്തിക്കാനാണ് എസ്എന്‍എസ്എസ് ആഗ്രഹിക്കുന്നതെന്നും വാര്‍ത്താക്കുറുപ്പില്‍ ജനറല്‍ സെക്രട്ടറി ജി സുകുമാരന്‍ നായര്‍ അറിയിച്ചു.