ദോഹ: പരിശുദ്ധ റമദാന്‍ മാസത്തിന് മുന്നോടിയായി പ്രവാസി മലയാളി സമൂഹത്തിനായി വിപുലമായ പ്രഭാഷണ പരമ്പര സംഘടിപ്പിച്ച് ശൈഖ് അബ്ദുല്ല ബിന്‍ സെയ്ദ് അല്‍ മഹ്മൂദ് ഇസ്ലാമിക് കള്‍ച്ചറല്‍ സെന്റര്‍ (Abdulla Bin Zaid Al Mahmoud Islamic Cultural Center).  അറബി ഇതര ഭാഷ സംസാരിക്കുന്ന മുസ്ലിംങ്ങള്‍ക്കിടയില്‍ മതപരമായ അറിവും അവബോധവും വളര്‍ത്തുന്നതിന്റെ ഭാഗമായാണ് പരിപാടി സംഘടിപ്പിച്ചത്. പ്രമുഖ പണ്ഡിതന്‍ അലിയാര്‍ അല്‍ ഖാസിമി വിവിധ കേന്ദ്രങ്ങളില്‍ പ്രഭാഷണം നടത്തി.
ഇസ്ലാമിക് കള്‍ച്ചറല്‍ സെന്ററില്‍ നടന്ന പ്രധാന പരിപാടിയില്‍ 'പ്രതിസന്ധികളിലെ മതനിഷ്ഠ' എന്ന വിഷയത്തില്‍ അദ്ദേഹം സംസാരിച്ചു. പ്രതിസന്ധികള്‍ക്കിടയിലും വിശ്വാസത്തില്‍ ഉറച്ചുനില്‍ക്കുന്നത് ആത്മീയ സന്തോഷത്തിനും സമാധാനത്തിനും അനിവാര്യമാണെന്ന് അദ്ദേഹം ഓര്‍മ്മിപ്പിച്ചു. 850 പേര്‍ ഈ ചടങ്ങില്‍ സംബന്ധിച്ചു.

 

 

അല്‍ വക്രയിലെ ഹംസ ബിന്‍ അബ്ദുല്‍ മുത്തലിബ് പള്ളിയില്‍ നടന്ന പ്രഭാഷണത്തില്‍ 'മുസ്ലിം കുടുംബങ്ങള്‍ നേരിടുന്ന വെല്ലുവിളികള്‍' എന്നതായിരുന്നു വിഷയം.  കുടുംബം സമൂഹത്തിന്റെ അടിത്തറയാണെന്നും കുട്ടികളെ ഉത്തമമായ രീതിയില്‍ വളര്‍ത്തുന്നതില്‍ മാതാപിതാക്കള്‍ ശ്രദ്ധിക്കണമെന്നും അദ്ദേഹം പറഞ്ഞു. 
മലയാളി സമൂഹത്തിന്റെ വലിയ പങ്കാളിത്തം കൊണ്ട് ശ്രദ്ധേയമായിരുന്നു ഈ പ്രഭാഷണ പരമ്പര. വരും ദിവസങ്ങളിലും സമാനമായ ബോധവല്‍ക്കരണ പരിപാടികള്‍ മന്ത്രാലയത്തിന് കീഴില്‍ തുടരും.

The Sheikh Abdulla Bin Zaid Al Mahmoud Islamic Cultural Center organised a series of lectures for the Malayalam-speaking community, attended by hundreds of speakers of this language. The center seeks to enhance religious awareness among Muslims who do not speak Arabic ahead of the blessed month of Ramadan.