മനാമ: ഈ വര്‍ഷത്തെ വിശുദ്ധ റമദാന്‍ ഫെബ്രുവരി 18ന് ആരംഭിക്കാന്‍ സാധ്യതയുണ്ടെന്ന് ബഹ്‌റൈനിലെ വിദഗ്ധര്‍  സൂചിപ്പിക്കുന്നു. ഔദ്യോഗികമായി ചന്ദ്രദര്‍ശനം സ്ഥിരീകരിച്ച ശേഷമായിരിക്കും അന്തിമ പ്രഖ്യാപനം ഉണ്ടാകുക. എന്നാല്‍ നിലവിലെ കണക്കുകള്‍ പ്രകാരം ഫെബ്രുവരി 18ന് വ്രതാരംഭമാകുമെന്നാണ് വിലയിരുത്തല്‍.

റമദാന്‍ അടുത്തെത്തുന്നതിനോടനുബന്ധിച്ച് സര്‍ക്കാര്‍ സാമൂഹ്യ സുരക്ഷാ ആനുകൂല്യങ്ങള്‍ ഇരട്ടിയാക്കാന്‍ തീരുമാനിച്ചു. മന്ത്രിസഭാ യോഗത്തിലാണ് ഇത് സംബന്ധിച്ച തീരുമാനം കൈകൊണ്ടത്. സമൂഹത്തിലെ അര്‍ഹരായ വിഭാഗങ്ങള്‍ക്ക് ലഭിക്കുന്ന മാസാന്ത്യ സഹായത്തുകയാണ് വര്‍ധിപ്പിക്കുന്നത്. റമദാന്‍ മാസത്തില്‍ ചെലവുകള്‍ കൂടുന്ന സാഹചര്യത്തില്‍ സാമ്പത്തികമായി പിന്നാക്കം നില്‍ക്കുന്ന കുടുംബങ്ങള്‍ക്ക് ആശ്വാസമാകുമെന്ന വിലയിരുത്തലിലാണ് നടപടി.

സാമൂഹ്യ വികസന മന്ത്രാലയത്തോടാണ് വര്‍ധിപ്പിച്ച തുക റമദാന്‍ ആരംഭിക്കുന്നതിന് മുമ്പായി തന്നെ വിതരണം ചെയ്യാന്‍ നിര്‍ദേശം നല്‍കിയിരിക്കുന്നത്. സാധാരണ ലഭിക്കുന്ന ആനുകൂല്യത്തിന്റെ ഇരട്ടിയോളം തുക അര്‍ഹരായവര്‍ക്ക് നല്‍കും. ഭിന്നശേഷിക്കാരായവര്‍ക്ക് ലഭിക്കുന്ന അലവന്‍സും ഇതില്‍ ഉള്‍പ്പെടും.

അതേസമയം, പൗരന്മാര്‍ക്ക് വൈദ്യുതി ചാര്‍ജില്‍ ഇളവ് നല്‍കുന്നതിനും മന്ത്രിസഭ അനുമതി നല്‍കിയിട്ടുണ്ട്. സ്വന്തമായി വീടുകളില്‍ താമസിക്കുന്ന ബഹ്‌റൈന്‍ പൗരന്മാര്‍ക്കായിരിക്കും ഈ ഇളവ് ബാധകമാകുക. ഇതുമായി ബന്ധപ്പെട്ട കൂടുതല്‍ വിശദാംശങ്ങള്‍ ബന്ധപ്പെട്ട വകുപ്പുകള്‍ പിന്നീട് അറിയിക്കും.

റമദാന്‍ കാലയളവില്‍ പൊതുസ്ഥലങ്ങളില്‍ നിയമലംഘനങ്ങള്‍ക്കെതിരെ കര്‍ശന നടപടി തുടരുമെന്ന് അധികൃതര്‍ മുന്നറിയിപ്പ് നല്‍കി. പകല്‍ സമയത്ത് പൊതുവേദികളില്‍ ഭക്ഷണം കഴിക്കല്‍, വെള്ളം കുടിക്കല്‍, പുകവലി എന്നിവ നിരോധിതമാണ്. നിയമലംഘനം നടത്തിയാല്‍ തടവോ പിഴയോ ലഭിക്കാമെന്ന് അധികൃതര്‍ വ്യക്തമാക്കി.

ALSO READ: ബഹ്‌റൈനില്‍ റമദാനോട് അനുബന്ധിച്ച് സര്‍ക്കാര്‍ ഓഫീസുകള്‍ക്ക് പുതിയ സമയക്രമം

റമദാന്‍ ആത്മീയതയും സഹാനുഭൂതിയും പങ്കിടലും പ്രാധാന്യമാക്കുന്ന മാസമാണെന്ന് സര്‍ക്കാര്‍ പ്രസ്താവനയില്‍ ഓര്‍മ്മിപ്പിച്ചു. സാമൂഹിക ഐക്യം ശക്തിപ്പെടുത്തുന്നതിനും ആവശ്യമുള്ളവര്‍ക്ക് പിന്തുണ നല്‍കുന്നതിനുമുള്ള നടപടികളുടെ ഭാഗമായാണ് സഹായങ്ങള്‍ വര്‍ധിപ്പിച്ചതെന്ന് അധികൃതര്‍ അറിയിച്ചു.

Ramadan is likely to begin on February 18 in Bahrain, as the government announces doubled social security benefits and additional support measures ahead of the holy month.