റിയാദ്: സഊദി അറേബ്യയുടെ ഹ്യൂമൻ കേപ്പബിലിറ്റി ഡെവലപ്‌മെന്റ് പ്രോഗ്രാം സംഘടിപ്പിക്കുന്ന 'ഹ്യൂമൻ കേപ്പബിലിറ്റി ഇനിഷ്യേറ്റീവ്' കോൺഫറൻസിന്റെ മൂന്നാം പതിപ്പ് മെയ് 3, 4 തീയതികളിൽ നടക്കും. സഊദി കിരീടാവകാശി മുഹമ്മദ് ബിൻ സൽമാൻ രാജകുമാരന്റെ രക്ഷാകർതൃത്വത്തിൽ യുണൈറ്റഡ് കിംഗ്ഡം ആണ് 'കൺട്രി ഓഫ് ഓണർ' ആയി പങ്കെടുക്കുക. റിയാദിലെ കിങ് അബ്ദുൽ അസീസ് ഇന്റർനാഷണൽ കോൺഫറൻസ് സെന്ററിലാണ് കോൺഫറൻസ് അരങ്ങേറുക. ഇത്തവണത്തെ പ്രമേയം "ദ ഹ്യൂമൻ കോഡ്" എന്നാണ്. എ.ഐ കാലഘട്ടത്തിൽ മനുഷ്യശേഷി പരമാവധി പ്രയോജനപ്പെടുത്തേണ്ട ആവശ്യകതയെക്കുറിച്ചും അതിനായി തൊഴിൽ-പഠന സാഹചര്യങ്ങളെ എങ്ങനെ മെച്ചപ്പെടുത്തിയെടുക്കാമെന്നതും കോൺഫറൻസിൽ പ്രധാന വിഷയമായി ചർച്ച ചെയ്യും.

ALSO READ: യമനിൽ കൈത്താങ്ങായി കെ.എസ് റിലീഫ്; മൊബൈൽ ക്ലിനിക്കുകൾ വഴി ചികിത്സാ സഹായം ലഭിച്ചത് 558 പേർക്ക് 

15,000ലധികം പ്രമുഖരും 250ലേറെ പ്രഭാഷകരും പങ്കെടുക്കുമെന്നാണ് ഔദ്യോ​ഗിക വിവരം. സഊദി-ബ്രിട്ടീഷ് സ്ട്രാറ്റജിക് പാർട്‌ണർഷിപ്പ് കൗൺസിലിന്റെ സാമ്പത്തിക-സാമൂഹിക കമ്മിറ്റി ചെയർമാനും സഊദി വാണിജ്യ മന്ത്രിയുമായ മാജിദ് അൽ ഖസബി ബ്രിട്ടനെ 'കൺട്രി ഓഫ് ഓണർ' ആയി സ്വാഗതം ചെയ്തു. ഇരുരാജ്യങ്ങളും തമ്മിലുള്ള സഹകരണത്തിന്റെ തുടർച്ചയാണിതെന്നും സാമ്പത്തിക സഹകരണം, വിദ്യാഭ്യാസം, തൊഴിൽ വികസനം എന്നിവയിൽ ഈ പങ്കാളിത്തം പ്രധാനമാണെന്നും അദ്ദേഹം വ്യക്തമാക്കി.

കഴിഞ്ഞ വർഷങ്ങളിലെ രണ്ട് കോൺഫറൻസുകളിലായി 23,000ത്തിലധികം പേർ പങ്കെടുക്കുകയും 156 ഓളം പങ്കാളിത്ത കരാറുകൾ ഒപ്പിടുകയും ചെയ്തിട്ടുണ്ട്. സഊദി വിഷൻ 2030ന്റെ ഭാ​ഗം കൂടിയാണ് ഈ കോൺഫറൻസ്. പൗരന്മാരുടെ കഴിവുകൾ വികസിപ്പിച്ച് മത്സരശേഷി വർദ്ധിപ്പിക്കുകയാണ് ഇതിലൂടെ ലക്ഷ്യമിടുന്നത്. 

Saudi Arabia announces the 3rd edition of the Human Capability Initiative (HCI) in Riyadh on May 3-4, 2026. Under the theme 'The Human Code,' the conference features the UK as the Country of Honor and focuses on human potential in the AI era.