ദുബൈ: എമിറേറ്റിലെ തിരക്കേറിയ റോഡുകളിൽ ഗതാഗതം സുഗമമാക്കുന്നതിനായുള്ള വലിയ പദ്ധതിയുടെ ഭാഗമായി രണ്ട് പുതിയ പാലങ്ങൾ കൂടി തുറന്ന് ദുബൈ ആർടിഎ. ശൈഖ് റാഷിദ് ഇടനാഴി വികസന പദ്ധതിയുടെ (Sheikh Rashid Corridor Development Project) ഭാഗമായുള്ള ഊദ് മൈത, അൽ അസായേൽ സ്ട്രീറ്റുകളിലെ പാലങ്ങളാണ് പ്രവർത്തനമാരംഭിച്ചത്.

ഗതാഗത ശേഷി വർധിക്കും, കുരുക്ക് ഒഴിയും

പുതിയ പാലങ്ങൾ തുറന്നതോടെ ഈ മേഖലയിലെ യാത്രാസമയത്തിൽ വൻ കുറവുണ്ടാകുമെന്നാണ് ആർടിഎ കണക്കാക്കുന്നത്. യാത്രാസമയം 20 മിനിറ്റിൽ നിന്ന് വെറും 5 മിനിറ്റായി കുറയും.

പുതിയ പാലങ്ങളുടെ പ്രത്യേകതകൾ

ഒന്നാം പാലം: അൽ അസായേൽ സ്ട്രീറ്റിനെയും അൽ വാസൽ ക്ലബ് സ്ട്രീറ്റിനെയും ബന്ധിപ്പിക്കുന്നു. മണിക്കൂറിൽ 2,400 വാഹനങ്ങളെ ഉൾക്കൊള്ളാൻ ശേഷിയുള്ള രണ്ട് വരി പാലമാണിത്.

രണ്ടാം പാലം: അൽ വാസൽ ക്ലബ് സ്ട്രീറ്റിനെയും അൽ ഖൈൽ റോഡിനെയും ബന്ധിപ്പിക്കുന്നു. ബിസിനസ് ബേ ക്രോസിംഗിലേക്കുള്ള ഗതാഗതം സുഗമമാക്കുന്ന ഈ പാലത്തിലൂടെ മണിക്കൂറിൽ 3,000 വാഹനങ്ങൾക്ക് സഞ്ചരിക്കാം.

സാബീൽ, അൽ ജദ്ദാഫ്, ഔദ് മൈത, ഉമ്മുഹുറൈർ തുടങ്ങിയ ജനസാന്ദ്രതയേറിയ മേഖലകളിലെ താമസക്കാർക്ക് ഈ വികസനം നേരിട്ട് പ്രയോജനം ചെയ്യും. കൂടാതെ ലത്തീഫ ഹോസ്പിറ്റൽ, അൽ വാസൽ ക്ലബ് എന്നിവിടങ്ങളിലേക്കുള്ള പ്രവേശനവും എളുപ്പമാകും. 2030-ഓടെ ഈ മേഖലയിലെ ജനസംഖ്യ 4.2 ലക്ഷം കവിയുമെന്നത് മുൻകൂട്ടി കണ്ടാണ് ആർടിഎ ഈ ബൃഹദ് പദ്ധതി നടപ്പിലാക്കുന്നത്.

നിലവിൽ പദ്ധതിയുടെ 72 ശതമാനം പൂർത്തിയായിക്കഴിഞ്ഞു. ദുബൈ-അൽ ഐൻ റോഡിനെ ഔദ് മൈത സർവീസ് റോഡുമായി ബന്ധിപ്പിക്കുന്ന തുരങ്കത്തിന്റെ നിർമ്മാണം 70 ശതമാനം പിന്നിട്ടു. 14 കിലോമീറ്റർ റോഡുകളും 4.3 കിലോമീറ്റർ നീളമുള്ള പാലങ്ങളും തുരങ്കങ്ങളും ഉൾപ്പെടുന്ന ഈ പദ്ധതി 2026-ന്റെ മൂന്നാം പാദത്തോടെ പൂർണ്ണമായി സജ്ജമാകുമെന്ന് ആർടിഎ ഡയറക്ടർ ജനറൽ മതാർ അൽ തായർ അറിയിച്ചു.

Roads and Transport Authority has opened two new bridges in Dubai to ease traffic congestion and improve road connectivity. the new infrastructure aims to reduce travel time and enhance smoother vehicle movement across key routes in the city.