ദുബൈ: വ്യോമപാതകളിലെ നിയന്ത്രണങ്ങളെത്തുടര്‍ന്ന് യു.എ.ഇ വിമാനക്കമ്പനികള്‍ സര്‍വീസുകള്‍ ഭാഗികമായി പുനരാരംഭിക്കുന്ന പശ്ചാത്തലത്തില്‍, യാത്രക്കാര്‍ക്ക് സുപ്രധാന നിര്‍ദേശങ്ങളുമായി എയര്‍ലൈനുകള്‍ രംഗത്ത്. എമിറേറ്റ്‌സ്, ഇത്തിഹാദ്, ഫ്‌ലൈദുബൈ, എയര്‍ അറേബ്യ തുടങ്ങിയ കമ്പനികള്‍ തങ്ങളുടെ പുതിയ സമയക്രമം പ്രഖ്യാപിച്ചിട്ടുണ്ട്. ഇതിനൊപ്പം തന്നെ വ്യാജ ടിക്കറ്റ്  റീഫണ്ട് തട്ടിപ്പുകള്‍ക്കെതിരെ ജാഗ്രത പാലിക്കാനും വിമാനക്കമ്പനികള്‍ നിര്‍ദേശിച്ചു.
വിസ കാലാവധി കഴിഞ്ഞ പ്രവാസികള്‍ക്ക് പുതിയ എന്‍ട്രി പെര്‍മിറ്റ് ഇല്ലാതെ തന്നെ തിരികെ വരാന്‍ യു.എ.ഇ അനുമതി നല്‍കിയിട്ടുണ്ട്. വിസ പുതുക്കാന്‍ സാധിക്കാത്ത അസാധാരണ സാഹചര്യങ്ങള്‍ പരിഗണിച്ച് ഫെബ്രുവരി 28 മുതല്‍ മാര്‍ച്ച് 31 വരെയാണ് ഈ താല്‍ക്കാലിക ഇളവ് അനുവദിച്ചിരിക്കുന്നത്.

എയര്‍ലൈന്‍ വിവരങ്ങളും സമയക്രമവും:

1. എമിറേറ്റ്‌സ് 
വ്യോമപാതകള്‍ ഭാഗികമായി തുറന്നതിനാല്‍ കുറഞ്ഞ സര്‍വീസുകള്‍ മാത്രമാണ് എമിറേറ്റ്‌സ് ഇപ്പോള്‍ നടത്തുന്നത്. ദുബൈ വഴിയുള്ള ട്രാന്‍സിറ്റ് യാത്രക്കാര്‍ക്ക് അവരുടെ കണക്റ്റിങ് ഫ്‌ലൈറ്റ് ഉറപ്പാക്കിയിട്ടുണ്ടെങ്കില്‍ മാത്രമേ യാത്രാനുമതി ലഭിക്കൂ. യാത്രക്കാര്‍ വിമാനത്താവളത്തിലേക്ക് പുറപ്പെടുന്നതിന് മുന്‍പായി ബുക്കിങ് സ്റ്റാറ്റസ് പരിശോധിക്കണം.

പ്രധാന സര്‍വീസുകള്‍: ഇന്ത്യയിലേക്ക് കൊച്ചി, തിരുവനന്തപുരം, ബെംഗളൂരു, ചെന്നൈ, ഡല്‍ഹി, ഹൈദരാബാദ്, കൊല്‍ക്കത്ത, മുംബൈ, അഹമ്മദാബാദ് എന്നിവിടങ്ങളിലേക്കും, സഊദിയിലെ ജിദ്ദ, മദീന, റിയാദ് എന്നിവിടങ്ങളിലേക്കും സര്‍വീസുകള്‍ പ്രഖ്യാപിച്ചിട്ടുണ്ട്. കൂടാതെ അമേരിക്ക, യു.കെ, ഓസ്‌ട്രേലിയ ഉള്‍പ്പെടെയുള്ള വിവിധ രാജ്യങ്ങളിലേക്കും തെരഞ്ഞെടുത്ത സര്‍വീസുകളുണ്ട്.
റീഫണ്ട് / ബുക്കിങ്: എമിറേറ്റ്‌സിന്റെ ഔദ്യോഗിക വെബ്‌സൈറ്റ് വഴി വിവരങ്ങള്‍ അറിയാം. സമൂഹമാധ്യമങ്ങളിലൂടെ ബുക്കിങ് വിവരങ്ങളോ വ്യക്തിഗത വിവരങ്ങളോ പങ്കുവെക്കരുതെന്നും കമ്പനി മുന്നറിയിപ്പ് നല്‍കുന്നു.

2. ഇത്തിഹാദ് എയര്‍വേസ് 
മാര്‍ച്ച് 15 വരെയുള്ള പുതുക്കിയ ഫ്‌ലൈറ്റ് ഷെഡ്യൂള്‍ ഇത്തിഹാദ് പുറത്തിറക്കി. നിലവില്‍ ടിക്കറ്റ് ബുക്ക് ചെയ്തവര്‍ക്ക് ലഭ്യമായ വിമാനങ്ങളില്‍ യാത്രാസൗകര്യം ഒരുക്കും.
റീഫണ്ട് / ബുക്കിങ്: ഫെബ്രുവരി 28നോ അതിനു മുന്‍പോ എടുത്ത, മാര്‍ച്ച് 21 വരെയുള്ള ടിക്കറ്റുകള്‍ക്ക് മെയ് 15 വരെയുള്ള തിയ്യതികളിലേക്ക് സൗജന്യമായി മാറ്റിയെടുക്കാം.
ജാഗ്രതാ നിര്‍ദേശം: ടിക്കറ്റ് റീഫണ്ട് ചെയ്തുതരാമെന്ന് വാഗ്ദാനം ചെയ്ത് വ്യാജ അക്കൗണ്ടുകള്‍ വഴി വരുന്ന സന്ദേശങ്ങളോട് പ്രതികരിക്കരുത്. പാസ്‌വേഡുകളോ ഒ.ടി.പി നമ്പറുകളോ ബാങ്ക് വിവരങ്ങളോ ഇത്തിഹാദ് സമൂഹമാധ്യമങ്ങളിലൂടെ ആവശ്യപ്പെടില്ല.

3. ഫ്‌ലൈദുബൈ 
ഫ്‌ലൈദുബൈയും സര്‍വീസുകള്‍ വെട്ടിച്ചുരുക്കിയിട്ടുണ്ട്. ഫെബ്രുവരി 28 മുതല്‍ മാര്‍ച്ച് 31 വരെയുള്ള തിയ്യതികളില്‍ ടിക്കറ്റ് ബുക്ക് ചെയ്തവര്‍ക്ക്, യാത്രാ തിയ്യതി മുതല്‍ 30 ദിവസത്തിനുള്ളില്‍ അതേ സ്ഥലത്തേക്ക് തന്നെ പിഴ കൂടാതെ ടിക്കറ്റ് മാറ്റിയെടുക്കാം. ദുബൈ വഴിയുള്ള കണക്റ്റിങ് ഫ്‌ലൈറ്റുകള്‍ ഓപ്പറേറ്റ് ചെയ്യുന്നുണ്ടെങ്കില്‍ മാത്രമേ യാത്രക്കാരെ അനുവദിക്കൂ.

4. എയര്‍ അറേബ്യ
ഷാര്‍ജ, അബുദാബി, റാസല്‍ഖൈമ എന്നിവിടങ്ങളില്‍ നിന്ന് തെരഞ്ഞെടുത്ത സ്ഥലങ്ങളിലേക്ക് മാര്‍ച്ച് 22 വരെ എയര്‍ അറേബ്യ സര്‍വീസ് നടത്തും. ഇതില്‍ വിയന്ന, ചിറ്റഗോങ്, ധാക്ക, കെയ്‌റോ, ഏഥന്‍സ്, അമ്മാന്‍, ബാങ്കോക്ക് തുടങ്ങിയ സ്ഥലങ്ങള്‍ ഉള്‍പ്പെടുന്നു. വിമാനം റദ്ദാക്കപ്പെട്ട യാത്രക്കാര്‍ക്ക് തുക പൂര്‍ണ്ണമായും തിരികെ നല്‍കുകയോ, സൗജന്യമായി മറ്റൊരു തിയ്യതിയിലേക്ക് ടിക്കറ്റ് മാറ്റി നല്‍കുകയോ ചെയ്യും.

യാത്രക്കാര്‍ക്കുള്ള പൊതുനിര്‍ദേശങ്ങള്‍:
* പാസ്‌വേഡുകള്‍, ബാങ്ക് വിവരങ്ങള്‍, ബുക്കിങ് വിവരങ്ങള്‍ എന്നിവ ഓണ്‍ലൈനില്‍ അപരിചിതരുമായി പങ്കുവെക്കരുത്.
* വിവരങ്ങള്‍ക്കായി വിമാനക്കമ്പനികളുടെ ഔദ്യോഗിക വെബ്‌സൈറ്റുകളെയോ സമൂഹമാധ്യമ അക്കൗണ്ടുകളെയോ മാത്രം ആശ്രയിക്കുക.
* യാത്ര പുറപ്പെടുന്നതിന് മുന്‍പ് ഫ്‌ലൈറ്റ് സ്റ്റാറ്റസ് പരിശോധിക്കുകയും കമ്പനികളില്‍ നിന്നുള്ള ഇമെയിലുകള്‍ ശ്രദ്ധിക്കുകയും ചെയ്യുക.

ALSO READ: പാചകവാതക ബുക്കിങ് ഇടവേള 45 ദിവസമാക്കി; പ്രതിസന്ധി മറികടക്കാന്‍ ഉല്‍പാദനം 28 ശതമാനം വര്‍ധിപ്പിച്ചു

English Summary: As UAE airlines gradually resume operations amid regional airspace restrictions, carriers including Emirates, Etihad, flydubai, and Air Arabia have announced updated but limited flight schedules for March 13. The airlines are offering flexible rebooking and refund options for affected passengers. Notably, the UAE has temporarily allowed expats with expired residency visas to return without a new entry permit until March 31. Additionally, airlines have issued strict warnings against online ticket and refund scams, urging passengers not to share personal, financial, or booking details on social media. Travelers are advised to verify all flight statuses exclusively through official channels before heading to the airport.