കുന്നംകുളം: എസ്.എന്‍.ഡി.പി യോഗം കുന്നംകുളം യൂനിയന്റെ ആഭിമുഖ്യത്തില്‍ 162ാം ശ്രീ നാരായണ ഗുരുദേവ ജയന്തി ദിനമായ സെപ്റ്റംബര്‍ 16 ന് വിവിധ പരിപാടികള്‍ സംഘടിപ്പിക്കുമെന്ന് ഭാരവാഹികള്‍ വാര്‍ത്താ സമ്മേളനത്തില്‍ അറിയിച്ചു. ഉച്ചക്ക് മൂന്ന് മണിക്ക് കക്കാട് ശ്രീ മഹാഗണപതി ക്ഷേത്ര സന്നിധിയില്‍ നിന്ന് നൂറുകണക്കിന് ഗുരുദേവഭക്തര്‍ പങ്കെടുക്കുന്ന വര്‍ണശബളമായ ജയന്തി ഘോഷയാത്രയോടെ പരിപാടികള്‍ക്ക് തുടക്കമാവും.
എസ്.എന്‍.ഡി.പി തലപ്പിളളി യൂനിയന്‍ മുന്‍ പ്രസിഡന്റ് പന്തായില്‍ സുകുമാരന്‍ പതാക ചെയര്‍മാന്‍ കെ.രഘുനാഥിന് കൈമാറും. കുന്നംകുളം നഗരം ചുറ്റി ഘോഷയാത്ര തലക്കോട്ടുകര മഹാദേവ ക്ഷേത്ര സന്നിധിയില്‍ സമാപിക്കും. പൊതു സമ്മേളനം ജയന്തി ആഘോഷ കമ്മറ്റി ചെയര്‍മാന്‍ കെ.രഘുനാഥന്‍ ഉദ്ഘാടനം ചെയ്യും. റിട്ടയേര്‍ഡ് ഡി.വൈ.എസ്.പി ഡോ. കെ.ബി സുരേഷ് മുഖ്യപ്രഭാഷണം നടത്തും. എം.എ ബാലകൃഷ്ണന്‍ വിദ്യാഭ്യാസ പുരസ്‌ക്കാരം വിതരണം നിര്‍വഹിക്കും. കെ.രഘുനാഥന്‍, വി.എ ഗംഗാധരന്‍, കെ.എ മാധവന്‍, ചന്ദ്രന്‍ കിളിയംപറമ്പില്‍ എന്നിവര്‍ വാര്‍ത്താ സമ്മേളനത്തില്‍ പങ്കെടുത്തു.