കണ്ണൂര്‍: കണ്ണാടിപ്പറമ്പില്‍ ഭീതി വിതച്ച് വിരണ്ടോടിയ ആനയെ മണിക്കൂറുകള്‍ നീണ്ട പരിശ്രമത്തിനൊടുവില്‍ തളച്ചു. ഇന്ന് പുലര്‍ച്ചെ അഞ്ച് മണിയോടെ നാറാത്ത് ആലങ്കീല്‍ ഭാഗത്ത് വച്ചാണ് ആനയെ പൂര്‍ണമായും നിയന്ത്രണത്തിലാക്കിയത്. ഇതോടെ വലിയൊരു ദുരന്തഭീതി ഒഴിഞ്ഞ ആശ്വാസത്തിലാണ് നാട്ടുകാര്‍.

കണ്ണാടിപ്പറമ്പ് ധര്‍മ്മശാസ്താ ക്ഷേത്രത്തിലെ ഉത്സവത്തിനിടെയാണ് ആന വിരണ്ടോടിയത്. പാപ്പാന്‍മാര്‍ക്ക് നിയന്ത്രിക്കാന്‍ കഴിയുന്നതിന് മുമ്പ് തന്നെ ആന ക്ഷേത്രപരിസരത്ത് ഭീകരാന്തരീക്ഷം സൃഷ്ടിച്ചു. വാഹനങ്ങളും തകര്‍ത്തു. ക്ഷേത്രമുറ്റത്ത് നിര്‍ത്തിയിട്ടിരുന്ന ഒരു ഓട്ടോറിക്ഷയും കാറുമാണ് ആന തകര്‍ത്തത്. കണ്ണാടിപ്പറമ്പ്  സ്റ്റെപ്പ് റോഡ് വഴി ഓടിയ ആന ഒടുവില്‍ ആലങ്കീല്‍ ഭാഗത്താണ് നിലയുറപ്പിച്ചത്.

ആലങ്കീലില്‍ വച്ച് ആനയെ മരത്തില്‍ കെട്ടിയിടാന്‍ ശ്രമം നടന്നുവെങ്കിലും ആന വീണ്ടും കുതറിയോടാന്‍ ശ്രമിച്ചു. എന്നാല്‍, അപ്രതീക്ഷിതമായി ഒരു മരത്തിന്റെ ഭാഗം ആനയുടെ കാലില്‍ കുരുങ്ങിയത് വലിയൊരു അപകടം ഒഴിവാക്കാന്‍ സഹായിച്ചു. കൂടുതല്‍ ദൂരേക്ക് വേഗത്തില്‍ ഓടാന്‍ കഴിയാതെ വന്നതോടെ എലിഫന്റ് സ്‌ക്വാഡിനും പാപ്പാന്‍മാര്‍ക്കും ആനയെ എളുപ്പത്തില്‍ തളയ്ക്കാന്‍ സാധിച്ചു.

An elephant that went on a rampage at the Kannadipparamba Dharma Sastha Temple, damaging vehicles and causing widespread panic, was finally brought under control near Narath early this morning.