തിരുവനന്തപുരം: ഓപ്പറേഷന്‍ തൂഫാന് ഐക്യദാര്‍ഢ്യം പ്രഖ്യാപിക്കാനെന്ന പേരില്‍ കെ സുധാകരന്‍ എംപി കൊച്ചിയില്‍ വിളിച്ചുചേര്‍ത്ത യോഗത്തെ തള്ളി ആഭ്യന്തരമന്ത്രി രമേശ് ചെന്നിത്തല. കൊച്ചിയില്‍ തൂഫാന്റെ പേരില്‍ ഒരു യോഗവും വിളിച്ചിട്ടില്ലെന്ന് അദ്ദേഹം പറഞ്ഞു. ചില മാധ്യമ വാര്‍ത്തകളില്‍ പറയുന്ന യോഗത്തെക്കുറിച്ച് താന്‍ അറിഞ്ഞിട്ടില്ല. തൂഫാന്‍ യോഗങ്ങള്‍ പൊലിസ് ഉദ്യഗസ്ഥരാണ് വിളിച്ചുചേര്‍ക്കുന്നത്. ഇത് ആര് വിളിച്ചതാണെന്ന് അറിയില്ല. ആരൊക്കെ പങ്കെടുത്തുവെന്നും അറിയില്ലെന്നും അദ്ദേഹം പറഞ്ഞു.

ഓപ്പറേഷന്‍ തൂഫാന്റെ പേരില്‍ ഇങ്ങനെയൊരു യോഗം കൊച്ചിയില്‍ വിളിച്ചു ചേര്‍ത്തിട്ടില്ല. സര്‍ക്കാരിന്റെ ലഹരി വിരുദ്ധ പ്രവര്‍ത്തനമായ ഓപ്പറേഷന്‍ തൂഫാനെ തകര്‍ക്കാന്‍ ആരു വിചാരിച്ചാലും സാധിക്കില്ലെന്നും മന്ത്രി മാധ്യമങ്ങളോട് വ്യക്തമാക്കി. 

കെ.സുധാകരന്‍ വിളിച്ചുചേര്‍ത്ത യോഗത്തില്‍ ഗുണ്ടകള്‍ പങ്കെടുത്തതുമായി ബന്ധപ്പെട്ട മാധ്യമപ്രവര്‍ത്തകരുടെ ചോദ്യത്തിന് മറുപടിയായാണ് ആഭ്യന്തര മന്ത്രിയുടെ പ്രതികരണം.യോഗത്തിന്റെ ദൃശ്യങ്ങള്‍ സമൂഹ മാധ്യമങ്ങളില്‍ പ്രചരിച്ചതിന് പിന്നാലെയാണ് വിമര്‍ശനമുണ്ടായത്.