ദുബൈ: ഇമാറാത്തിലെ ബിസിനസ് മേഖലയെയും താമസക്കാരെയും പിന്തുണയ്ക്കുന്നതിനായി 100 കോടി (1 ബില്യൺ) ദിർഹത്തിന്റെ വമ്പൻ സാമ്പത്തിക പാക്കേജ് പ്രഖ്യാപിച്ച് ദുബൈ. റെസിഡൻസി പെർമിറ്റുകൾക്കുള്ള നടപടികൾ എളുപ്പത്തിലാക്കുക, സർക്കാർ ഫീസുകളിൽ ഇളവ് നൽകുക തുടങ്ങി ഒട്ടേറെ ആനുകൂല്യങ്ങളാണ് ഇതിൽ ഉൾപ്പെടുന്നത്. വ്യക്തികൾക്കും കുടുംബങ്ങൾക്കും ബിസിനസുകൾക്കും ആത്മവിശ്വാസത്തോടെ മുന്നോട്ടുപോകാൻ ഈ നടപടികൾ സഹായകരമാകുമെന്ന് ദുബൈ കിരീടാവകാശി ശൈഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂം പറഞ്ഞു.

റെസിഡൻസി പെർമിറ്റുകൾ നൽകുന്നതിലും പുതുക്കുന്നതിലും വലിയ ലഘൂകരണമാണ് വരുത്തിയിരിക്കുന്നത്. ഇതുവഴി കമ്പനികൾക്ക് പുതിയ ജീവനക്കാരെ നിയമിക്കുന്നതും അവർക്ക് ദുബൈയിൽ ജോലി ചെയ്യുന്നതും കൂടുതൽ സുഗമമാകും. പ്രതിഭകളെ ദുബൈയിലേക്ക് ആകർഷിക്കാനും നിലനിർത്താനുമാണ് ഇതിലൂടെ ലക്ഷ്യമിടുന്നത്.

ALSO READ: താമസക്കാരുടെ ഉറക്കം കെടുത്തി ജുമൈറയിലെ രാത്രികാല നിർമ്മാണ പ്രവർത്തനങ്ങൾ; നടപടി വേണമെന്ന ആവശ്യം ശക്തം

ബിസിനസ് - ടൂറിസം മേഖലകൾക്ക് ഇളവ്

ഏപ്രിൽ 1 മുതൽ പ്രാബല്യത്തിൽ വന്ന പുതിയ സാമ്പത്തിക ഇളവുകൾ ദുബൈയിലെ ടൂറിസം, വ്യാപാര മേഖലകൾക്ക് വലിയ ആശ്വാസമാണ് പകരുന്നത്. ടൂറിസം ദിർഹം ഫീസും ഹോട്ടലുകളുടെ വിൽപ്പന ഫീസും മൂന്ന് മാസത്തേക്ക് മാറ്റിവെച്ചതോടെ ഹോസ്പിറ്റാലിറ്റി മേഖലയിൽ പണലഭ്യത വർദ്ധിപ്പിക്കാൻ സാധിക്കും. കൂടാതെ, ഇറക്കുമതി-കയറ്റുമതി വ്യാപാരികളെ സഹായിക്കുന്നതിനായി കസ്റ്റംസ് ഡാറ്റയുമായി ബന്ധപ്പെട്ട ഗ്രേസ് പിരീഡ് 30 ദിവസത്തിൽ നിന്നും 90 ദിവസമായി ഉയർത്തിയിട്ടുണ്ട്. ഇത് വ്യാപാരികൾക്ക് വലിയ രീതിയിലുള്ള സാമ്പത്തിക വഴക്കം നൽകും.

ബിസിനസ് സംരംഭങ്ങളുടെ സാമ്പത്തിക സമ്മർദ്ദം ലഘൂകരിക്കുന്നതിനായി വിവിധ സർക്കാർ ഫീസുകൾ അടയ്ക്കുന്നതിനും മൂന്ന് മാസത്തെ അധിക സാവകാശം അനുവദിച്ചിട്ടുണ്ട്. ഇമാറാത്തിൽ ബിസിനസ്സ് ചെയ്യുന്നത് കൂടുതൽ എളുപ്പമാക്കാനും വിപണിയിൽ സ്ഥിരത ഉറപ്പാക്കാനുമാണ് ഈ നടപടികളിലൂടെ ലക്ഷ്യമിടുന്നത്. അടിയന്തര സാമ്പത്തിക ബാധ്യതകളിൽ നിന്ന് മോചനം നൽകുന്നതിലൂടെ നിക്ഷേപകർക്കും ബിസിനസ് സ്ഥാപനങ്ങൾക്കും ആത്മവിശ്വാസത്തോടെ മുന്നോട്ട് പോകാൻ ഈ പാക്കേജ് സഹായകരമാകും.

വളരുന്ന സമ്പദ്‌വ്യവസ്ഥ

2025-ൽ ദുബൈയുടെ ജിഡിപി 5.4 ശതമാനം വർധിച്ച് 937 ബില്യൺ ദിർഹത്തിൽ എത്തി നിൽക്കുമ്പോഴാണ് ഈ പുതിയ പ്രഖ്യാപനം വരുന്നത്. "വെല്ലുവിളികളെ അവസരങ്ങളാക്കി മാറ്റാൻ ദുബൈയ്ക്ക് അറിയാം. ലോകമെമ്പാടുമുള്ള നിക്ഷേപകർക്ക് ദുബൈയിലുള്ള വിശ്വാസം വർദ്ധിപ്പിക്കാൻ ഈ നടപടികൾ കാരണമാകും," ശൈഖ് ഹംദാൻ വ്യക്തമാക്കി.

dubai government simplifies residency permit procedures while offering major incentives for businesses, boosting investment and economic growth across the emirate.