ന്യൂഡൽഹി/ടെഹ്‌റാൻ: ഇറാൻ-യുഎസ് സംഘർഷം അതീവ ഗുരുതരമായ ഘട്ടത്തിലേക്ക് കടന്നതോടെ ഇറാനിലുള്ള തങ്ങളുടെ പൗരന്മാരെ സുരക്ഷിതമായി നാട്ടിലെത്തിച്ച് ഇന്ത്യ. ഏകദേശം 1,200 ഓളം ഇന്ത്യൻ പൗരന്മാരെയാണ് കേന്ദ്ര സർക്കാർ അടിയന്തരമായി അർമേനിയ, അസർബൈജാൻ വഴി  ഒഴിപ്പിച്ചത്. പശ്ചിമേഷ്യയിലുടനീളം യുദ്ധം പടരുന്ന സാഹചര്യത്തിൽ ആഗോള വിപണികളും നയതന്ത്ര കേന്ദ്രങ്ങളും വലിയ ആശങ്കയിലാണ്.

ട്രംപിന്റെ പ്രഖ്യാപനവും യുദ്ധമുഖത്തെ നീക്കങ്ങളും

അടുത്ത രണ്ടാഴ്ചയ്ക്കുള്ളിൽ ഇറാന് മേൽ അതിശക്തമായ ആക്രമണം നടത്തുമെന്ന് യുഎസ് പ്രസിഡന്റ് ഡൊണാൾഡ് ട്രംപ് പ്രഖ്യാപിച്ചു. ഇറാന്റെ സൈനിക അടിത്തറ തകർത്തെന്നും വിജയം സുനിശ്ചിതമാണെന്നും ട്രംപ് അവകാശപ്പെടുമ്പോഴും, യുദ്ധം നീണ്ടുപോകുന്നതിലുള്ള അമേരിക്കൻ ജനതയുടെ അതൃപ്തി അദ്ദേഹം സമ്മതിക്കുന്നുണ്ട്.

അതേസമയം, ഇസ്റാഈലിന് നേരെ ഇറാൻ ആറ് മണിക്കൂറിനുള്ളിൽ നാല് തരംഗങ്ങളിലായി മിസൈൽ വർഷം നടത്തി. മധ്യ ഇസ്റാഈലിൽ നാശനഷ്ടങ്ങൾ റിപ്പോർട്ട് ചെയ്തിട്ടുണ്ടെങ്കിലും ആളപായം കുറവാണ്. വടക്കൻ ഇസ്റാഈലിൽ ഹിസ്ബുള്ളയും മിസൈൽ-ഡ്രോൺ ആക്രമണങ്ങൾ ശക്തമാക്കിയിട്ടുണ്ട്.

മറ്റ് പ്രധാന സംഭവവികാസങ്ങൾ:

ഇറാഖിൽ അതീവ ജാഗ്രത: ബാഗ്ദാദിലെ യുഎസ് എംബസി ഹൈ-അലർട്ട് പ്രഖ്യാപിച്ചു. 48 മണിക്കൂറിനുള്ളിൽ ഇറാൻ അനുകൂല മിലിഷ്യകൾ ആക്രമണം നടത്തിയേക്കുമെന്ന് ഭയന്ന് എല്ലാ അമേരിക്കക്കാരോടും ഉടൻ രാജ്യം വിടാൻ നിർദ്ദേശിച്ചു.

അബുദബിയിൽ മിസൈൽ തടഞ്ഞു: അബുദബിയിലെ ഖലീഫ ഇക്കണോമിക് സോണിന് (KEZAD) സമീപം മിസൈൽ തടഞ്ഞുനശിപ്പിച്ചു. ഇത് സാമ്പത്തിക കേന്ദ്രങ്ങളിലേക്കും യുദ്ധം പടരുന്നു എന്നതിന്റെ സൂചനയാണ്.

എണ്ണവില കുതിക്കുന്നു: ഹോർമുസ് കടലിടുക്ക് വഴിയുള്ള ഊർജ്ജ വിതരണം തടസ്സപ്പെടുമെന്ന ഭീതിയിൽ ആഗോള വിപണിയിൽ എണ്ണവില 4 ശതമാനത്തിലധികം വർദ്ധിച്ചു. ഏഷ്യൻ ഓഹരി വിപണികൾ ഇടിഞ്ഞു.

ട്രംപിനെതിരെ മാക്രോൺ; 'നാറ്റോയെ തകർക്കുന്നു'

യുഎസ് പ്രസിഡന്റ് ഡൊണാൾഡ് ട്രംപിന്റെ നിലപാടുകൾക്കെതിരെ ഫ്രഞ്ച് പ്രസിഡന്റ് ഇമ്മാനുവൽ മാക്രോൺ രംഗത്തെത്തി. ട്രംപിന്റെ പ്രവചനാതീതമായ സംസാരവും നിലപാടുകളും നാറ്റോ സഖ്യത്തെ ദുർബലപ്പെടുത്തുകയാണെന്ന് മാക്രോൺ കുറ്റപ്പെടുത്തി. ഹോർമുസ് കടലിടുക്ക് സൈനിക ബലത്തിലൂടെ മോചിപ്പിക്കാമെന്ന അമേരിക്കൻ നിലപാട് 'അയാഥാർത്ഥ്യമാണെന്നും' കനത്ത ബാലിസ്റ്റിക് മിസൈൽ ശേഷിയുള്ള ഇറാനിയൻ റെവല്യൂഷണറി ഗാർഡിൽ നിന്ന് വലിയ വെല്ലുവിളി നേരിടേണ്ടി വരുമെന്നും അദ്ദേഹം മുന്നറിയിപ്പ് നൽകി.

നിലവിൽ മിസൈൽ ആക്രമണങ്ങളും പ്രോക്സി യുദ്ധങ്ങളും(വലിയ ശക്തികൾ (Major Powers) തങ്ങൾ നേരിട്ട് യുദ്ധം ചെയ്യാതെ, മറ്റ് ചെറിയ രാജ്യങ്ങളെയോ ഗ്രൂപ്പുകളെയോ ഉപയോഗിച്ച് നടത്തുന്ന സംഘർഷങ്ങളാണ് പ്രോക്സി യുദ്ധങ്ങൾ) രൂക്ഷമായി തുടരുന്നത് ലോകക്രമത്തെ തന്നെ അപകടത്തിലാക്കിയിരിക്കുകയാണ്.