കാസര്‍കോട്: മുസ് ലിം ലീഗ് സ്ഥാനാര്‍ഥി നിര്‍ണയത്തില്‍ അതൃപ്തി പ്രകടിപ്പിച്ച് വനിതാ ലീഗ് ദേശീയ സെക്രട്ടറി സ്ഥാനം രാജിവെച്ച നൂര്‍ബിന റഷീദിന് വിശദീകരണം ചോദിച്ച് നോട്ടിസ് അയച്ചതായി പാര്‍ട്ടി സംസ്ഥാന സെക്രട്ടറി പി.എം.എ സലാം. നൂര്‍ബിന തെറ്റ് തിരുത്തുമെന്നാണ് വിശ്വാസം ഇല്ലെങ്കില്‍ വിശദീകരണം ചോദിച്ച് നടപടിയെടുക്കുമെന്നും അദ്ദേഹം വ്യക്തമാക്കി.

സ്ഥാനാര്‍ഥി നിര്‍ണയത്തില്‍ അതൃപ്തിയുണ്ടെങ്കില്‍ അവര്‍ പറയേണ്ടത് പാര്‍ട്ടിയോടായിരുന്നു. മാധ്യമങ്ങളോടല്ല പറയേണ്ടിയിരുന്നത്. കടുത്ത അച്ചടക്ക ലംഘനമാണ് നൂര്‍ബിന നടത്തിയത്. വനിതാ ലീഗിന്റെ പൊതു നിലപാട് ഇതല്ല, അത് പറയേണ്ടത് സംസ്ഥാന കമ്മിറ്റിയോ ദേശീയ കമ്മിറ്റിയോ ആണെന്നും അദ്ദേഹം പറഞ്ഞു. 

നിലവില്‍ അവര്‍ ഉയര്‍ത്തിയ ആരോപണങ്ങളെല്ലാം ചായക്കോപ്പയിലെ കൊടുങ്കാറ്റ് മാത്രമാണ്. പാര്‍ട്ടിയില്‍ നില്‍ക്കുമ്പോള്‍ പാലിക്കേണ്ടതായ ചില അച്ചടക്കങ്ങളുണ്ട്. അത് പാലിക്കാന്‍ കഴിയുന്നില്ലെങ്കില്‍ പാര്‍ട്ടിയുടെ പിന്തുണ വേണോ പുറത്തു നിന്നുള്ളവരുടെ വേണോയെന്ന് നൂര്‍ബിന തീരുമാനിക്കട്ടെയെന്നും സലാം പറഞ്ഞു. 

ലീഗ് സംസ്ഥാന നേതൃത്വത്തിനെതിരെയും പേരാമ്പ്രയിലെ സ്ഥാനാര്‍ഥി ഫാത്തിമ തെഹ്‌ലിയക്കെതിരെയും രൂക്ഷ വിമര്‍ശനങ്ങള്‍ ഉന്നയിച്ചാണ് നൂര്‍ബിന സ്ഥാനം രാജിവെച്ചത്.