കണ്ണൂര്‍: കണ്ണൂര്‍ സിറ്റി ഉരുവച്ചാലില്‍ വീട്ടുമുറ്റത്ത് നിര്‍ത്തിയിട്ട വാഹനങ്ങള്‍ കത്തിച്ചു. കണ്ണൂര്‍ കോര്‍പറേഷന്‍ ഡപ്യൂട്ടി മേയര്‍ പി.കെ രാഗേഷിന്റെ പാര്‍ട്ടിയായ ഐക്യജനാധിപത്യ സംരക്ഷണസമിതിയുടെ നേതാവും സിറ്റിയിലെ ഓട്ടോ ഡ്രൈവറുമായ എന്‍.പി സത്താറിന്റെ ഓട്ടോയും മകന്റെ ബൈക്കുമാണ് ഇന്നലെ പുലര്‍ച്ചെ 1.30ഓടെ ഒരു സംഘം തീയിട്ടത്. വീടിന്റെ രണ്ടു ഭാഗത്തായി നിര്‍ത്തിയ വാഹനങ്ങള്‍ ഒന്നിച്ച് മാറ്റിയിട്ടതിനുശേഷമാണു കത്തിച്ചത്. കണ്ണൂര്‍സിറ്റി പൊലിസ് സ്ഥലത്തെത്തി പരിശോധന നടത്തി. പാര്‍ട്ടി വിരുദ്ധ പ്രവര്‍ത്തനത്തിനു മുസ്‌ലിം ലീഗില്‍ നിന്നു പുറത്താക്കപ്പെട്ട സത്താര്‍ നിയമസഭാ തെരഞ്ഞെടുപ്പില്‍ പി.കെ രാഗേഷിനൊപ്പം ചേര്‍ന്ന് ഐക്യജനാധിപത്യ സംരക്ഷണസമിതി സ്ഥാനാര്‍ഥിയായി കണ്ണൂര്‍ മണ്ഡലത്തില്‍ മത്സരിച്ചിരുന്നു.
സംഭവത്തില്‍ മുസ്‌ലിംലീഗ് കണ്ണൂര്‍ മേഖലാ കമ്മിറ്റി അപലപിച്ചു.
പ്രതികളെ ഉടന്‍ പിടികൂടണമെന്നും രാഷ്ട്രീയ മുതലെടുപ്പിനു ശ്രമിക്കുന്ന തല്‍പര കക്ഷികളെ കരുതിയിരിക്കണമെന്നും കമ്മിറ്റി ആവശ്യപ്പെട്ടു. മന്ത്രി കടന്നപ്പള്ളി രാമചന്ദ്രന്‍, ലീഗ് നേതാക്കളായ ടി.എ തങ്ങള്‍, അഷ്‌റഫ് ബംഗാളിമൊഹല്ല, സി സമീര്‍, എം മുഫ്‌ലിഹ്, സിയാദ് തങ്ങള്‍ എന്നിവര്‍ സംഭവസ്ഥലം സന്ദര്‍ശിച്ചു.