കണ്ണൂര്‍: ആരോഗ്യ വകുപ്പില്‍ പല പദ്ധതികളോടും ചിലരുടെ നിസഹകരണം ശ്രദ്ധയില്‍പ്പെട്ടതായും ജനങ്ങളെ നേരിട്ടു ബാധിക്കുന്ന പ്രശ്‌നങ്ങളായതിനാല്‍ ഇത്തരത്തിലുള്ളവര്‍ക്കെതിരേ കടുത്ത നടപടി സ്വീകരിക്കേണ്ടി വരുമെന്നും മന്ത്രി കെ.കെ ശൈലജ.
ജില്ലാ ആശുപത്രിയുടെ വികസന മാസ്റ്റര്‍പ്ലാന്‍ കൈമാറ്റ ചടങ്ങില്‍ സംസാരിക്കുകയായിരുന്നു മന്ത്രി. ജീവനക്കാരുടെ നിസഹരണം കാരണം പദ്ധതികള്‍ മുടങ്ങിയാല്‍ അതിനു കാരണക്കാരായവരെ ഒറ്റപ്പെടുത്തേണ്ടിവരും. എല്ലാ പദ്ധതികള്‍ക്കും മുഴുവന്‍ പേരുടെയും സജീവ ഇടപെടല്‍ ആവശ്യമാണ്. ശിശുമരണ നിരക്ക് 2020 ഓടെ പകുതിയായി കുറച്ചുകൊണ്ടുവരുന്നതിന്റെ ഭാഗമായി പ്രസവ വാര്‍ഡുകള്‍ ആധുനിക വല്‍ക്കരിക്കുന്നതോടൊപ്പം പ്രസവ വേളയില്‍ ശിശുരോഗ വിദഗ്ധരുടെ സേവനം കൂടി ലഭ്യമാക്കും.
നിലവില്‍ ജില്ലാ ആശുപത്രിയില്‍ ഒഴിഞ്ഞുകിടക്കുന്ന തസ്തികകള്‍ നികത്തുകയും വികസനം യാഥാര്‍ഥ്യമാവുന്ന മുറയ്ക്ക് ആവശ്യമായി വരുന്ന പുതിയ തസ്തികകള്‍ അനുവദിക്കുകയും ചെയ്യും. സംസ്ഥാനത്ത് ആദ്യമായി ജില്ലാ ആശുപത്രി വികസന മാസ്റ്റര്‍ പ്ലാന്‍ തയാറാക്കി സമര്‍പ്പിച്ച കണ്ണൂര്‍ ജില്ലാ പഞ്ചായത്തിനെ ആരോഗ്യ മന്ത്രി അഭിനന്ദിച്ചു.