ദുബൈ: ആഗോളതലത്തിൽ കപ്പൽ ഗതാഗതവും ചരക്കുനീക്കവും കടുത്ത വെല്ലുവിളികൾ നേരിടുമ്പോഴും, ഭക്ഷ്യലഭ്യതയിൽ വിട്ടുവീഴ്ചയില്ലാതെ ദുബൈ. പെട്ടെന്ന് കേടുവരുന്ന പഴം-പച്ചക്കറികൾ ഉൾപ്പെടെയുള്ള അവശ്യവസ്തുക്കളുടെ തടസ്സമില്ലാത്ത വിതരണം ഉറപ്പാക്കാൻ എമിറേറ്റിന് സാധിക്കുന്നുണ്ടെന്ന് പ്രമുഖ വ്യാപാരികൾ വ്യക്തമാക്കി. ദുബൈ ചേംബർ ഓഫ് കൊമേഴ്‌സിന് കീഴിലുള്ള ഫ്രൂട്ട് ആൻഡ് വെജിറ്റബിൾ ട്രേഡേഴ്‌സ് ബിസിനസ് ഗ്രൂപ്പാണ് ഇക്കാര്യം വ്യക്തമാക്കിയത്.

ശക്തമായ അടിസ്ഥാന സൗകര്യങ്ങളും യുദ്ധകാലാടിസ്ഥാനത്തിലുള്ള സർക്കാർ നടപടികളുമാണ് ഈ നേട്ടത്തിന് പിന്നിൽ. ജബൽ അലി തുറമുഖം, ഡിപി വേൾഡ് എന്നിവയുടെ ഏകോപനത്തിലൂടെ ചരക്കുകൾ എത്തിക്കാൻ ബദൽ പാതകൾ ഒരുക്കിയതും കസ്റ്റംസ് ക്ലിയറൻസ് വേഗത്തിലാക്കിയതും വിതരണ ശൃംഖലയെ കരുത്തുറ്റതാക്കി. ചരക്ക് ട്രക്കുകൾക്ക് വിതരണ കേന്ദ്രങ്ങളിലേക്ക് സുഗമമായി എത്തുന്നതിന് റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (RTA) പ്രത്യേക ക്രമീകരണങ്ങൾ ഏർപ്പെടുത്തിയതും വിപണിയിൽ ഉൽപ്പന്നങ്ങൾ യഥാസമയം എത്തുന്നതിന് കാരണമായി.

ALSO READ: യുഎഇയിൽ തിങ്കളാഴ്ച വരെ മഴയ്ക്കും പൊടിക്കാറ്റിനും സാധ്യത; വാഹനമോടിക്കുന്നവർക്ക് ജാഗ്രതാനിർദ്ദേശവുമായി അധികൃതർ

ഒരു പ്രത്യേക വിപണിയെ മാത്രം ആശ്രയിക്കാതെ സോഴ്‌സിംഗ് വൈവിധ്യവൽക്കരിച്ചതും ഇതര ഷിപ്പിംഗ് റൂട്ടുകൾ പ്രയോജനപ്പെടുത്തിയതും ദുബൈയുടെ തന്ത്രപരമായ വിജയമായി വ്യാപാരികൾ ചൂണ്ടിക്കാട്ടുന്നു. കോൾഡ് സ്റ്റോറേജ് സംവിധാനങ്ങളുടെ മികവും വെയർഹൗസിംഗ് കാര്യക്ഷമതയും കേടുവരുന്ന സാധനങ്ങളുടെ ഗുണനിലവാരം നിലനിർത്താൻ സഹായിക്കുന്നുണ്ട്. സർക്കാർ നടത്തുന്ന കൃത്യമായ വില നിരീക്ഷണവും വിപണിയിൽ ഉപഭോക്താക്കളുടെ ആത്മവിശ്വാസം വർദ്ധിപ്പിച്ചു. ആഗോള പ്രതിസന്ധികൾക്കിടയിലും ഭക്ഷ്യസുരക്ഷ ഉറപ്പാക്കുന്നതിൽ ദുബൈ ലോകത്തിന് മാതൃകയാണെന്ന് ഫ്രഷ് ഫ്രൂട്ട്സ് കമ്പനി സിഇഒ റെദ അൽ മൻസൂരി ഉൾപ്പെടെയുള്ള പ്രമുഖർ അഭിപ്രായപ്പെട്ടു.

Dubai maintains a steady flow of fresh food and perishables through strategic logistics, efficient port operations, and proactive government measures despite global shipping challenges.