മസ്‌കത്ത്: ഒമാനില്‍ നിന്നുള്ള ചരക്കുനീക്കം കൂടുതല്‍ എളുപ്പവും ചെലവുകുറഞ്ഞതുമാക്കാന്‍ പുതിയ തീരുമാനവുമായി ഷാര്‍ജ ഭരണകൂടം. ഒമാനില്‍ നിന്ന് യു.എ.ഇയിലേക്ക് പ്രവേശിക്കുന്ന ചരക്കുലോറികള്‍ക്ക് ഷാര്‍ജയിലെ ടോള്‍ ഗേറ്റുകളില്‍ ഇളവ് അനുവദിക്കുമെന്ന് ബന്ധപ്പെട്ട അധികൃതര്‍ പ്രഖ്യാപിച്ചു. വ്യാപാരലോജിസ്റ്റിക് മേഖലയില്‍ ഇരുരാജ്യങ്ങള്‍ക്കുമിടയിലെ സഹകരണം കൂടുതല്‍ ശക്തിപ്പെടുത്തുന്നതിന്റെ ഭാഗമായാണ് പുതിയ നീക്കം.

ഷാര്‍ജ പോര്‍ട്ട്‌സ്, കസ്റ്റംസ് ആന്‍ഡ് ഫ്രീ സോണ്‍സ് അതോറിറ്റിയും ഷാര്‍ജ റോഡ്‌സ് ആന്‍ഡ് ട്രാന്‍സ്‌പോര്‍ട്ട് അതോറിറ്റിയും ചേര്‍ന്നാണ് പദ്ധതി നടപ്പാക്കുന്നത്. ഖത്മത് മലാഹ, അല്‍ മദാം അതിര്‍ത്തി കവാടങ്ങള്‍ വഴി പ്രവേശിക്കുന്ന ചരക്കുവാഹനങ്ങള്‍ക്കാണ് ടോള്‍ ഇളവ് ബാധകമാകുക. എന്നാല്‍ അംഗീകൃത ലോജിസ്റ്റിക്‌സ് കോറിഡോര്‍ സംവിധാനത്തില്‍ രജിസ്റ്റര്‍ ചെയ്ത ട്രക്കുകള്‍ക്കു മാത്രമേ ഈ ആനുകൂല്യം ലഭിക്കൂ.

ഒമാനിലെ തുറമുഖങ്ങളില്‍ നിന്ന് യു.എ.ഇയിലെ വ്യാപാര കേന്ദ്രങ്ങളിലേക്കുള്ള ചരക്കുനീക്കം കൂടുതല്‍ വേഗത്തിലാക്കുകയാണ് പദ്ധതിയുടെ പ്രധാന ലക്ഷ്യം. സുഹാര്‍, സലാല, ദുഖം തുറമുഖങ്ങളില്‍ നിന്ന് എത്തുന്ന ചരക്കുകള്‍ ഷാര്‍ജയിലൂടെയും മറ്റു എമിറേറ്റുകളിലേക്കും എളുപ്പത്തില്‍ എത്തിക്കാന്‍ ഇതിലൂടെ സാധിക്കുമെന്നാണ് വിലയിരുത്തല്‍. ചരക്കുനീക്കവുമായി ബന്ധപ്പെട്ട സമയനഷ്ടവും അധിക ചെലവും കുറയ്ക്കാന്‍ ഈ തീരുമാനം സഹായകരമാകും.

ALSO READ: ജി.സി.സിക്ക് 45 വയസ്സ്; സാമ്പത്തിക ശക്തിയായി ഗള്‍ഫ് രാജ്യങ്ങള്‍

ഖത്മത് മലാഹ അതിര്‍ത്തി കവാടം സുഹാര്‍ തുറമുഖത്തോട് അടുത്തായി നിലകൊള്ളുന്നതിനാല്‍ ട്രക്കുകള്‍ക്ക് കൂടുതല്‍ വേഗത്തില്‍ യു.എ.ഇയിലേക്ക് പ്രവേശിക്കാനാകും. അതേസമയം അല്‍ മദാം അതിര്‍ത്തി കവാടം പ്രധാന ഗതാഗതപാതകളുമായി ബന്ധിപ്പിക്കപ്പെട്ടതിനാല്‍ ഇറക്കുമതികയറ്റുമതി മേഖലക്കും പുതിയ തീരുമാനം ഗുണകരമാകുമെന്നാണ് ലോജിസ്റ്റിക്‌സ് രംഗത്തുള്ളവരുടെ വിലയിരുത്തല്‍.

വ്യാപാര സ്ഥാപനങ്ങള്‍ക്കും ഗതാഗത കമ്പനികള്‍ക്കും പ്രവര്‍ത്തനച്ചെലവ് കുറയ്ക്കാന്‍ പുതിയ സംവിധാനം സഹായിക്കുമെന്നാണ് അധികൃതര്‍ പറയുന്നത്. ടോള്‍ ഫീസ് ഒഴിവാക്കുന്നതിലൂടെ ദീര്‍ഘദൂര ചരക്കുനീക്കത്തില്‍ ഏര്‍പ്പെട്ടിരിക്കുന്ന ട്രാന്‍സ്‌പോര്‍ട്ട് കമ്പനികള്‍ക്ക് വലിയ സാമ്പത്തിക ആശ്വാസം ലഭിക്കുമെന്നും അവര്‍ ചൂണ്ടിക്കാട്ടുന്നു.

അതിര്‍ത്തി നടപടിക്രമങ്ങള്‍ വേഗത്തിലാക്കല്‍, കസ്റ്റംസ് ക്ലിയറന്‍സ് ലളിതമാക്കല്‍, ചരക്കുകളുടെ നേരിട്ടുള്ള ഗതാഗത സൗകര്യം വര്‍ധിപ്പിക്കല്‍ തുടങ്ങിയ പദ്ധതികളും ലോജിസ്റ്റിക്‌സ് കോറിഡോര്‍ സംവിധാനത്തിന്റെ ഭാഗമായി നടപ്പിലാക്കുന്നുണ്ട്. ഗള്‍ഫ് മേഖലയിലെ വ്യാപാര ബന്ധങ്ങള്‍ കൂടുതല്‍ ശക്തിപ്പെടുത്തുന്നതിനും മേഖലയുടെ സാമ്പത്തിക പ്രവര്‍ത്തനങ്ങള്‍ക്ക് പുതിയ ഉണര്‍വ് നല്‍കുന്നതിനും ഈ തീരുമാനം സഹായിക്കുമെന്നാണ് വിലയിരുത്തല്‍.

Sharjah has announced toll exemptions for goods trucks arriving from Oman through designated border crossings to strengthen trade and logistics cooperation.