മാവൂര്‍: ടെലിഫോണ്‍ എക്‌സ്‌ചേഞ്ചിലെ വിലപിടിപ്പുള്ള കോപ്പര്‍ കേബിളുകള്‍ മോഷ്ടിച്ച അന്തര്‍ജില്ലാ കള്ളന്മാരെ കുടുക്കി. ഓട്ടോ ഡ്രൈവറുടെ അവസരോചിതമായ ഇടപെടലാണ് പ്രതികള്‍ കുടുങ്ങാന്‍ കാരണമായത്. ആലപ്പുഴ സ്വദേശി വിനോദ് കുമാര്‍ (40), നെന്മാറ സ്വദേശി നാസറുദ്ദീന്‍ (34) എന്നിവരെയാണ് മാവൂര്‍ പൊലിസ് പൊക്കിയത്.

വ്യാഴാഴ്ച പുലര്‍ച്ചെ ആയിരുന്നു മാവൂര്‍ പൈപ്പ് ലൈന്‍ റോഡിലെ എക്‌സ്‌ചേഞ്ചില്‍ മോഷണം നടന്നത്. ഏകദേശം 35 മീറ്ററോളം വരുന്ന വില കൂടിയ കേബിളാണ് ഇരുവരും ചേര്‍ന്ന് മുറിച്ചെടുത്തത്. ഈ ലോഡും താങ്ങി നേരെ പോയത് കോഴിക്കോട് കെ.എസ്.ആര്‍.ടി.സി സ്റ്റാന്‍ഡിലേക്കും. അവിടെ നിന്ന് നിഷാദിന്റെ ഓട്ടോറിക്ഷയിലാണ് ഇവര്‍ കയറിയത്.

എന്നാല്‍, യാത്രയ്ക്കിടെ ഇവരുടെ സംസാരത്തിലും കൈയിലുള്ള ഭാരമേറിയ സാധനത്തിലും നിഷാദിന് പന്തികേട് തോന്നി. ഒട്ടും വൈകിപ്പിക്കാതെ നിഷാദ് കളി മാറ്റി. വണ്ടി നേരെ വിട്ടത് മെഡിക്കല്‍ കോളജ് പൊലിസ് സ്റ്റേഷന്റെ മുറ്റത്തേക്കും. സ്റ്റേഷന്‍ കണ്ടതും കള്ളന്മാര്‍ ഒന്നു പതറി.

പൊലിസ് ചോദ്യം ചെയ്തതോടെയാണ് കള്ളി വെളിച്ചത്തായത്. ഇവര്‍ നേരത്തെ ടെലിഫോണ്‍ എക്‌സ്‌ചേഞ്ചിന് കീഴില്‍ കരാര്‍ ജോലി ചെയ്യുന്നവരാണ്. ആ പരിചയം വച്ചാണ് മോഷണം പ്ലാന്‍ ചെയ്തത്. മാവൂര്‍ ഇന്‍സ്‌പെക്ടര്‍ മുഹമ്മദ് റഫീഖിന്റെ നേതൃത്വത്തില്‍ പ്രതികളെ അറസ്റ്റ് ചെയ്യുകയായിരുന്നു. ഇവരെ കോടതി റിമാന്‍ഡ് ചെയ്തു.

An observant auto-rickshaw driver in Kozhikode suspicious of his passengers' behavior drove them straight to the police station, leading to the arrest of two contract workers who had stolen 35 meters of copper cable from the Mavoor Telephone Exchange.