മുംബൈ: ഇന്ത്യൻ ക്രിക്കറ്റിലെ സ്പിൻ മാന്ത്രികൻ യുസ്വേന്ദ്ര ചാഹൽ ഇപ്പോൾ വിവാദച്ചുഴിയിൽ അകപ്പെട്ടിരിക്കുകയാണ്. കളിക്കളത്തിലെ തമാശകളും സ്പിൻ മാന്ത്രികതയും കൊണ്ട് ആരാധകരുടെ പ്രിയ താരമായ ചാഹൽ, പൊതുമധ്യത്തിൽ കാട്ടിയ ഒരു അശ്രദ്ധമായ പ്രവൃത്തിയാണ് ഇപ്പോൾ വലിയ വിമർശനങ്ങൾക്ക് വഴിയോരുക്കിയത്.

ഐപിഎല്ലിൽ പഞ്ചാബ് കിങ്സ് താരമായ ചാഹൽ കാറോടിക്കുന്നതിനിടെ സിഗരറ്റ് വലിക്കുകയും പിന്നീട് അതിന്റെ കുറ്റി പുറത്തേക്ക് വലിച്ചെറിയുകയും ചെയ്യുന്ന ദൃശ്യങ്ങളാണ് സോഷ്യൽ മീഡിയയിൽ കാട്ടുതീ പോലെ പടരുന്നത്. മറ്റൊരു വാഹനത്തിലുള്ളവർ പകർത്തിയ ഈ വീഡിയോ ദൃശ്യങ്ങൾ പുറത്തുവന്നതോടെ താരം കടുത്ത സൈബർ ആക്രമണമാണ് നേരിടുന്നത്. വീഡിയോയുടെ ആധികാരികതയോ ഇത് എവിടെ വെച്ച് എടുത്തതാണ് എന്നതോ സംബന്ധിച്ച് ഔദ്യോഗിക സ്ഥിരീകരണങ്ങൾ ഇതുവരെ ലഭിച്ചിട്ടില്ല,എന്നാലുംവീഡിയോയിലെ വ്യക്തി ചാഹൽ തന്നെയാണെന്ന് ആരാധകർ ഉറപ്പിച്ചു പറയുന്നു.

Yuzi chahal smoking while driving his car 🫣 pic.twitter.com/bzYM3S5kNN

— DB (@Brevisnation7) April 10, 2026

നേരത്തെ പറഞ്ഞത് തിരുത്തിയോ?

തന്റെ ജീവിതശൈലിയിൽ വലിയ മാറ്റങ്ങൾ വരുത്തിയെന്ന് അടുത്തിടെ ഒരു അഭിമുഖത്തിൽ ചാഹൽ പറഞ്ഞിരുന്നു. എബി ഡിവില്ലിയേഴ്സുമായുള്ള പോഡ്‌കാസ്റ്റിൽ താരം പറഞ്ഞ വാക്കുകൾ ഇങ്ങനെയാണ്."ഞാൻ മദ്യപാനം നിർത്തിയിട്ട് ഇപ്പോൾ ആറു മാസത്തിലേറെയായി. 35-ാം വയസ്സിൽ കൂടുതൽ കരുത്തോടെ ടീമിനായി 150 ശതമാനം നൽകാനാണ് ഞാൻ ആഗ്രഹിക്കുന്നത്. യുവതാരങ്ങൾക്ക് ഒരു മികച്ച മാതൃകയാകാൻ ഞാൻ ശ്രമിക്കുകയാണ്."

ഇത്തരത്തിൽ ഒരു തിരിച്ചുപോക്കിനെക്കുറിച്ച് സംസാരിച്ച താരം തന്നെ സിഗരറ്റ് വലിക്കുന്ന ദൃശ്യങ്ങളിൽ പ്രത്യക്ഷപ്പെട്ടത് ആരാധകരെ ആകെ നിരാശരാക്കിയിരിക്കുകയാണ്.

രൂക്ഷവിമർശനം:

"യുവതാരങ്ങൾക്ക് മാതൃകയായി മാറേണ്ട ഒരു മുതിർന്ന താരം പൊതുയിടത്തിൽ ഇത്രയും ഉത്തരവാദിത്തമില്ലാതെ പെരുമാറുന്നത് ശരിയല്ല" എന്നാണ് സോഷ്യൽ മീഡിയയിൽ ഉയരുന്ന വാദം. റോഡ് നിയമങ്ങൾ ലംഘിച്ചതിനും പൊതുസ്ഥലത്ത് പുകവലിച്ചതിനും താരത്തിനെതിരെ നടപടി വേണമെന്ന ആവശ്യവും ശക്തമായി ഉയർന്നു വരുന്നുണ്ട്.

ക്രിക്കറ്റ് കരിയർ:

ഐപിഎൽ ചരിത്രത്തിൽ ഏറ്റവും കൂടുതൽ വിക്കറ്റുകൾ വീഴ്ത്തിയ ബൗളറായ ചാഹൽ, നിലവിൽ പഞ്ചാബ് കിങ്‌സ് താരമാണ്. കഴിഞ്ഞ സീസണിൽ പഞ്ചാബിനെ ഫൈനലിലെത്തിക്കുന്നതിൽ നിർണ്ണായക പങ്കുവഹിച്ചെങ്കിലും ഇന്ത്യൻ ദേശീയ ടീമിൽ ഇപ്പോൾ കുറച്ചു കാലമായി താരത്തിന് ഇടം ലഭിക്കുന്നില്ല. 2024 ട്വി20 ലോകകപ്പ് നേടിയ ടീമിൽ അംഗമായിരുന്നെങ്കിലും ഒരു മത്സരത്തിൽ പോലും കളിക്കാൻ അവസരം ലഭിച്ചിരുന്നില്ല.

പുതിയ വിവാദത്തെക്കുറിച്ച് ചാഹലോ പഞ്ചാബ് കിങ്‌സ് മാനേജ്‌മെന്റോ ഇതുവരെ ഔദ്യോഗികമായി ഒരു പ്രതികരണവും നടത്തിയിട്ടില്ല. ഒരുകാലത്ത് കൈയടി നേടിയ താരം ഈ വിവാദത്തിൽ നിന്ന് എങ്ങനെ തലയൂരുമെന്നാണ് കായികലോകം ഇപ്പോൾ ഉറ്റുനോക്കി കൊണ്ടിരിക്കുന്നത്.